تۈركىيە جۇمھۇرىيىتىنىڭ جۇمھۇر رەئىسى رەجەپ تاييىپ ئەردوغان لىۋىيە مەملىكەتلىك بىرلىك ھۆكۈمىتىنىڭ باش مىنىستىرى ئابدۇلھەمىد دىبەيبە بىلەن ئىككى تەرەپلىك مۇناسىۋەتلەر ۋە رايونلۇق مەسىلىلەرنى مۇزاكىرە قىلدى.
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر-ئالاقە ئىدارىسىنىڭ بۇ ھەقتىكى باياناتىغا ئاساسلانغاندا، جۇمھۇر رەئىس ئەردوغان جۈمە كۈنىدىكى تېلېفون سۆھبىتىدە، تۈركىيەنىڭ لىۋىيەدىكى ئۆزگىرىشلەرنى «يېقىندىن كۆزىتىۋاتقانلىقى»نى، شۇنداقلا «بىخەتەرلىك ۋە مۇقىملىقنى كاپالەتلەندۈرۈش يولىدا ئۈستىگە چۈشكەن مەسئۇلىيەتنى داۋاملىق ئادا قىلىدىغانلىقى»نى تەكىتلىگەن.
جۇمھۇر رەئىس ئەردوغان يەنە تۈركىيە بىلەن لىۋىيە ئوتتۇرىسىدا، باشتا ئېنېرگىيە بولۇپ، نۇرغۇن ساھەدىكى ھەمكارلىقنىڭ مۇھىملىقىنى ئەسكەرتىپ، ئىككى دۆلەتنىڭ شەرقىي ئاقدېڭىزدىكى ئورتاق ھوقۇق-مەنپەئەتلىرىنى قوغداش ئۈچۈن ئېلىپ بېرىلىۋاتقان تىرىشچانلىقلارنىڭ داۋاملىشىدىغانلىقىنى ئېيتتى.
تۈركىيە بىلەن لىۋىيە 2025-يىلى 7-ئايدا كانچىلىق، ئېنېرگىيە ۋە ئۇل ئەسلىھە ساھەلىرىدە ھەمكارلىشىش ئۈچۈن بىر ھەمكارلىق ئەسلەتمىسى ئىمزالىغانىدى.
بۇ كېلىشىمگە تۈركىيە تاشقى ئىقتىسادىي مۇناسىۋەتلەر كېڭىشى (DEİK)، تۈركىيە-لىۋىيە سودا كېڭىشى، لىۋىيە دۆلەتلىك كانچىلىق ئىدارىسى، لىۋىيە كۆرگەزمە ۋە يىغىنلار باش ئىدارىسى بىلەن ئىمار لىۋىيە پاي كونتروللۇق شىركىتى ئىمزا قويغان.
مەزكۇر ئۈچ ساھەدىكى ئىككى تەرەپلىك سودا ھەجىمىنى ئاشۇرۇشنىمۇ مەقسەت قىلغان بۇ ھەمكارلىق كېلىشىمى، تۈركىيە تاشقى ئىقتىسادىي مۇناسىۋەتلەر كېڭىشى (DEİK) قارمىقىدىكى تۈركىيە-لىۋىيە سودا كېڭىشىنىڭ رەئىسى مۇرتەزا كارانفىل بىلەن ئىمار لىۋىيە پاي كونتروللۇق شىركىتىنىڭ باش ئىجرائىيە ئەمەلدارى فۇئاد ئەلئەۋۋام تەرىپىدىن ئىمزالانغان.
