تۈركىيە جۇمھۇرىيىتى تاشقى ئىشلار مىنىستىرلىقى مەسجىدى ئەقسانىڭ تارىخىي ۋە قانۇنىي كىملىكى دەپسەندە قىلىنغان بۇ ئىغۋاگەرچىلىك خاراكتېرلىك ھەرىكەتلەرنىڭ رايوندىكى جىددىيچىلىك ۋە مۇقىمسىزلىقنى تېخىمۇ ئەۋج ئالدۇرۇۋېتىش خەۋپى بارلىقىنى بىلدۈردى.
تۈركىيە پەيشەنبە كۈنى، ئىسرائىلىيەلىك بىر مىنىستىرنىڭ بىر تۈركۈم ئىسرائىلىيەلىك قانۇنسىز كۆچمەنلەر بىلەن بىرلىكتە چارشەنبە كۈنى ئېلىپ بارغان مەسجىدى ئەقساغا باستۇرۇپ كىرىش ھەرىكىتىنى ئەيىبلىدى.
تاشقى ئىشلار مىنىستىرلىقىنىڭ بۇ ھەقتە ئېلان قىلىنغان باياناتىدا مۇنداق دېيىلدى:
«ئىسرائىلىيەلىك بىر مىنىستىرنىڭ بىر تۈركۈم قانۇنسىز كۆچمەنلەر بىلەن بىرلىكتە مەسجىدى ئەقساغا قىلغان باستۇرۇپ كىرىش ھەرىكىتىنى قاتتىق ئەيىبلەيمىز.
مۇسۇلمانلارغا تەۋە مۇقەددەس جاي بولغان مەسجىدى ئەقسانىڭ تارىخىي ۋە قانۇنىي كىملىكى دەپسەندە قىلىنغان بۇ ئىغۋاگەرچىلىك ھەرىكەتلىرىنىڭ، رايوندىكى جىددىيچىلىك ۋە مۇقىمسىزلىقنى تېخىمۇ ئەۋج ئالدۇرۇۋېتىش خەۋپى باردۇر.
خەلقئارا جەمئىيەتنى يەنە بىر قېتىم پەلەستىن خەلقىنىڭ قانۇنىي ھەق – ھوقۇقلىرىنى قوغداش ۋە ئىشغالىيەت ئاستىدىكى شەرقىي قۇددۇس بىلەن مۇقەددەس جايلارغا قارىتىلغان دەپسەندىچىلىكلەرنىڭ ئالدىنى ئېلىش ئۈچۈن زىممىسىگە يۈكلەنگەن مەسئۇلىيەتنى ئادا قىلىشقا چاقىرىمىز.»
نېگېۋ ۋە جەلىلىيە ئىشلىرى مىنىستىرى يىتزاق ۋاسسېرلاۋف، ئىبرانىي تەقۋىمى بويىچە ئىسرائىلىيەنىڭ 1967-يىلى شەرقىي قۇددۇسنى بېسىۋالغانلىقىنى خاتىرىلەشتىن ئىككى كۈن بۇرۇن، يەنى چارشەنبە كۈنى مەسجىدى ئەقسا قورۇسىغا باستۇرۇپ كىردى.
ۋاسسېرلاۋف دۆلەت خەۋپسىزلىك ئىشلىرى مىنىستىرى ئىتامار بېن-گۋىر رەھبەرلىكىدىكى ئاشقۇن ئوڭچىل «ئوتزما يەھۇدىت» پارتىيەسىنىڭ ئەزاسى بولۇپ، ئىلگىرىمۇ بېن-گۋىر بىلەن بىرلىكتە مەسجىدى ئەقسا قورۇسىغا باستۇرۇپ كىرگەن ئىدى؛ بۇ ئەھۋال پەلەستىنلىكلەر بىلەن بىرگە مۇسۇلمان ۋە ئەرەب ئەللىرى تەرىپىدىنمۇ قاتتىق ئەيىبلەنگەن ئىدى.
ئاشقۇن ئوڭچىل ئىسرائىلىيە گۇرۇھلىرى، شەرقىي قۇددۇسنىڭ 1967-يىلىدىكى ئىشغالىيىتىنى خاتىرىلەش ئۈچۈن مەسجىدى ئەقسا قورۇسىغا تېخىمۇ كۆپ باستۇرۇپ كىرىش چاقىرىقىدا بولدى، شۇنداقلا پەيشەنبە كۈنى شەھەردە «بايراق يۈرۈشى» پائالىيىتى ئېلىپ بېرىشنى پىلانلىدى.
