گېرمانىيە سۈرىيەدىكى ئەلچىخانىسىنى رەسمىي ھالدا قايتا ئاچتى. تاشقى ئىشلار مىنىستىرلىقى مەنبەسىنىڭ بىلدۈرۈشىچە، دەمەشىقتە كىچىك بىر دىپلوماتىك گۇرۇپپا خىزمەت باشلىغان.
گېرمانىيە تاشقى ئىشلار مىنىستىرى ئاننالېنا بائېربوك پەيشەنبە كۈنى— ئەسەد تۈزۈمى ئاغدۇرۇلۇپ تەخمىنەن ئۈچ ئايدىن كېيىن — يوليورۇق چۈشۈرۈپم سۈرىيەدىكى ئىچكى ئۇرۇش سەۋەبىدىن 2012-يىلى تاقىۋېتىلگەن ئەلچىخانىسىنى قايتا ئېچىشنى بۇيرۇغان.
مەنبەنىڭ قوشۇمچە قىلىشىچە، كونسۇلخانا ئىشلىرى ۋە ۋىزا مەسىلىلىرى سۈرىيەدىكى بىخەتەرلىك ۋەزىيىتى سەۋەبىدىن لىۋاننىڭ پايتەختى بېيرۇتتا بېجىرىلىدىكەن.
مەنبە: «دىكتاتور ئەسەدنىڭ ئاغدۇرۇلۇشىدىن كېيىن، گېرمانىيە سۈرىيە خەلقىنىڭ تېخىمۇ مۇقىم كەلگۈسى بەرپا قىلىش يولىدىكى تىرىشچانلىقلىرىنى قوللايدىغانلىقى توغرىسىدا ۋەدە بەردى» دېدى.
دىپلوماتىك ئالاقە ئورنىتىش
گېرمانىيە تاشقى ئىشلار مىنىستىرلىقى مەنبەسى يەنە، «گېرمانىيە مۇقىم سۈرىيە بەرپا قىلىشقا ئالاھىدە ئەھمىيەت بېرىدۇ. بىز يەرلىك ۋەزىيەتنى مۇقىملاشتۇرۇشتەك ئېغىر ۋەزىپىگە تېخىمۇ ياخشى تۆھپە قوشالايمىز.» دېدى.
ئۇ سۆزىنى داۋاملاشتۇرۇپ: «سۈرىيە زېمىنىدا مەۋجۇت بولۇش ئارقىلىق بىز مۇھىم دىپلوماتىك ئالاقىلەرنى قۇرالايمىز ۋە شۇنىڭ بىلەن بىرگە، خەلقنىڭ بارلىق قاتلاملىرىنىڭ مەنپەئەتىگە كاپالەتلىك قىلىدىغان ئومۇميۈزلۈك سىياسىي باسقۇچقا ئۆتۈش مۇساپىسىنى ئىلگىرى سۈرەلەيمىز» دېگەنلەرنى قەيت قىلدى.
ئۇ يەنە، «دىپلوماتلىرىمىز نەق مەيداندا بولغاچقا، ئەمدى بىز پۇقرالار جەمئىيىتى بىلەن مۇھىم ھەمكارلىقلارنى قايتا يولغا قويالايمىز. بۇنىڭدىن سىرت، ئېغىر سەلبىي ئۆزگىرىشلەرگە بىۋاسىتە ۋە دەرھال ئىنكاس قايتۇرالايمىز» دېگەنلەرنى سۆزلىرىگە ئىلاۋە قىلدى.
