دانىيە مۇداپىئە مىنىستىرلىقى، ھاۋا ئارمىيە تىك ئۇچارىغا خەلقئارالىق دېڭىز تەۋەلىكىدە رۇسىيە قوغدىغۇچى پاراخوتىدىن سىگنال ئوقى ئېتىلغانلىقىنى بىلدۈردى.
مىنىستىرلىقتىن ئېلان قىلىنغان يازما باياناتتا، تىك ئۇچارنىڭ دانىيەنىڭ فالستېر ئارىلىنىڭ جەنۇبىي ئۇچىغا جايلاشقان گېدسېر دېڭىز تەۋەلىكى سىرتىدىكى خەلقئارالىق دېڭىز تەۋەلىكىدە دائىملىق سۈرەتكە تارتىش ۋەزىپىسىنى ئىجرا قىلىۋاتقانلىقى بىلدۈرۈلدى.
تىك ئۇچارغا خەلقئارالىق دېڭىز تەۋەلىكىدىكى رۇسىيە قوغدىغۇچى پاراخوتىدىن سىگنال ئوقى ئېتىلغانلىقى قەيت قىلىنغان باياناتتا: «2 دانە سىگنال ئوقى ئېتىلدى. ئېتىلغان ئوقلاردىن بىرى تىك ئۇچارنىڭ ناھايىتى يېقىنىدىن ئۆتۈپ كەتتى» دېگەن سۆزلەرگە ئورۇن بېرىلدى.
باياناتتا تىك ئۇچار بىلەن ئۇنىڭدىكى خادىملارنىڭ زىيانغا ئۇچرىمىغانلىقى بىلدۈرۈلدى.
رۇسىيەنىڭ كوپېنھاگېندىكى باش ئەلچىسى تاشقى ئىشلار مىنىستىرلىقىغا چاقىرتىلدى
دانىيە تاشقى ئىشلار مىنىستىرلىقىنىڭ X ئىجتىمائىي تاراتقۇ ھېسابىدىن ئېلان قىلىنغان يازمىدا، تاشقى ئىشلار مىنىستىرى لارس لوككې راسمۇسسېننىڭ كۆز قارىشىغا ئورۇن بېرىلدى.
راسمۇسسېن يۈز بەرگەن ئىشلارنىڭ «قوبۇل قىلغىلى بولمايدىغانلىقىنى» بىلدۈرۈپ، رۇسىيەنىڭ كوپېنھاگېندىكى باش ئەلچىسى ۋلادىمىر باربىننى مىنىستىرلىققا چاقىرتىپ كەلگەنلىكىنى ئىپادىلىدى.
دانىيە باش مىنىستىرى مېتتې فرېدېرىكسېنمۇ رۇسىيەنىڭ تېخىمۇ بەك «تاجاۋۇزچىلىق» پوزىتسىيەسىنى نامايان قىلىۋاتقانلىقىنى ئىلگىرى سۈرۈپ: «شىمالىي ئاتلانتىك ئەھدى تەشكىلاتىنى سىناۋاتىدۇ ۋە قىستىۋاتىدۇ. بىزنىڭ جاۋابىمىز بولسا تېخىمۇ يېقىنلىشىش، شۇنداقلا دانىيە بىلەن ياۋروپانىڭ مۇداپىئەسىنى كۈچەيتىش بولىدۇ» دېدى.
