تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر - ئالاقە ئىدارىسى باشلىقى بۇرھانەتتىن دوران، جۇمھۇر رەئىس رەجەپ تاييىپ ئەردوغاننىڭ لىۋىيە ئارمىيە باش ئىشتاب باشلىقىنىڭ ئۆلۈمىنى كەلتۈرۈپ چىقارغان ئايروپىلان ۋەقەسىدىن كېيىن، لىۋىيە باش مىنىستىرى ئابدۇلھەمىد دىبەيبەگە تەزىيە بىلدۈرگەنلىكىنى ئېيتتى.
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر - ئالاقە ئىدارىسى باشلىقى بۇرھانەتتىن دوران، جۇمھۇر رەئىس ئەردوغاننىڭ لىۋىيە باش مىنىستىرى ئابدۇلھەمىد دىبەيبە بىلەن تېلېفوندا كۆرۈشكەنلىكىنى ۋە ئۇنىڭغا تۈركىيەنىڭ زېمىنىدا يۈز بەرگەن ئايروپىلان ۋەقەسىدە لىۋىيە ئارمىيە باش ئىشتاب باشلىقى ۋە باشقا يۇقىرى دەرىجىلىك ھەربىي ئەمەلدارلارنىڭ ھاياتىدىن ئايرىلغانلىقى مۇناسىۋىتى بىلەن تەزىيە بىلدۈرگەنلىكىنى ئۇقتۇردى.
دوراننىڭ ئېيتىشىچە، ئەردوغان چارشەنبە كۈنى ئابدۇلھەمىد دىبەيبە بىلەن ئېلىپ بارغان تېلېفون سۆھبىتىدە: «لىۋىيە ئارمىيە باش ئىشتاب باشلىقى، گېنېرال مۇھەممەد ئەلى ئەل-ھەدداد ۋە ئۇنىڭ ھەمراھلىرىنى توشۇۋاتقان ئايروپىلاننىڭ چۈشۈپ كېتىشى نەتىجىسىدە ئۇلارنىڭ ھاياتىدىن ئايرىلغانلىقىدىن قاتتىق قايغۇردۇم ۋە تەزىيە بىلدۈرىمەن» دېگەن.
ئىچكى ئىشلار مىنىستىرى ئەلى يەرلىكايا بۇنىڭدىن ئىلگىرى، ئەنقەرە ئەسەنبوغا ئايرودرومىدىن تىرىپولىغا بېرىش ئۈچۈن سەيشەنبە كۈنى ھاۋاغا كۆتۈرۈلگەن Falcon 50 تىپلىق ئايروپىلاننىڭ خارابىلىكىنىڭ، ژاندارما ئەترەتلىرى تەرىپىدىن ئەنقەرەنىڭ ھايمانا ناھىيەسىگە قاراشلىق كېسىككاۋاقنىڭ تەخمىنەن 2 كىلومېتىر جەنۇبىدىن تېپىلغانلىقىنى ئېيتقان ئىدى.
يەرلىكايا ئايروپىلاننىڭ قارا قۇتىسى ۋە ئۇچۇش ئۆيىدىكى ئاۋاز خاتىرىلەش ئۈسكۈنىسىنىڭ چارشەنبە كۈنى سەھەردە تېپىلغانلىقىنى ۋە چىقىرىلغانلىقىنى بىلدۈردى.
يەرلىكايا ۋەقەنىڭ كېلىپ چىقىش سەۋەبىنى ئېنىقلاش ئۈچۈن بۇ ئۈسكۈنىلەرنى تەكشۈرۈش خىزمەتلىرىنىڭ باشلانغانلىقىنىمۇ سۆزىگە ئىلاۋە قىلدى.
بۇ ئۆلۈم ۋەقەلىرىدىن كېيىن، لىۋىيە مىللىي بىرلىك ھۆكۈمىتى ئۈچ كۈنلۈك مەملىكەتلىك ماتەم ئېلان قىلدى.
