تۈركىيە ئىستىخبارات ئىدارىسى بىلەن ساقچى ئورگانلىرى روژدېستۋا ۋە يېڭى يىل پائالىيەتلىرى ھارپىسىدا، مەملىكەت مىقياسىدا ئېلىپ بېرىلغان دائېشقا قارشى ھەرىكەتلەر جەريانىدا، مالاتيا شەھىرىدە بىر دائېش گۇماندارىنى قولغا چۈشۈردى.

بىخەتەرلىك تارماقلىرىنىڭ خەۋىرىگە قارىغاندا، تۈركىيە بىخەتەرلىك تارماقلىرى يېڭى يىل پائالىيەتلىرىدە تېررورلۇق ھۇجۇمى قىلىشقا تەييارلىق قىلغان دەپ قارالغان بىر دائېش تېررورچىسىنى قولغا ئالغان.

تۈركىيە ئىستىخبارات ئىدارىسى (MİT) ساقچى ئورگانلىرى بىلەن ھەمكارلىشىپ، مالاتيا ۋىلايىتىدە ئىبراھىم بۇرتاكۇجىن (Ibrahim Burtakucin) ئىسىملىك گۇماندارنى قولغا چۈشۈردى.

ئىستىخبارات ئۇچۇرلىرىدا كۆرسىتىلىشىچە، بۇرتاكۇجىن تۈركىيەدە تېررورلۇق تەشكىلاتى دائېشقا ۋاكالىتەن پائالىيەت قىلغان ھەمدە پۇرسەت بولسىلا توقۇنۇش رايونلىرىغا بېرىپ تەشكىلاتقا قوشۇلۇشنى پىلانلىغان.

ئۇنىڭ يەنە تۈركىيە ئىچى ۋە سىرتىدىكى دائېشنىڭ نۇرغۇن قوللىغۇچىلىرى بىلەن ئالاقە قىلغانلىقى مۆلچەرلەنمەكتە.

ھەرىكەت جەريانىدا، گۇماندار ۋە مەزكۇر تېررورلۇق تەشكىلاتى بىلەن مۇناسىۋەتلىك رەقەملىك ماتېرىياللار ۋە چەكلەنگەن نەشر بۇيۇملىرى مۇسادىرە قىلىنغان. بۇ قېتىملىق تۇتۇش ھەرىكىتى تۈركىيە مىقياسىدا دائېش تورىغا قارشى كۈچەيتىلگەن تېررورلۇققا زەربە بېرىش ھەرىكىتى جەريانىدا ئېلىپ بېرىلدى.

ئىستانبۇل باش تەپتىش مەھكىمىسى چارشەنبە (2025-يىلى 24-دېكابىر) كۈنى ئىستانبۇل ساقچىلىرىنىڭ روژدېستۋا ۋە يېڭى يىل پائالىيەتلىرىنى نىشان قىلغان دائېش پىلانى بىلەن مۇناسىۋەتلىك 115 گۇماندارنى قولغا ئالغانلىقىنى بىلدۈرگەن ئىدى.

تۈركىيە ئىستىخبارات ئىدارىسى بۇ ھەپتىنىڭ بېشىدا ئافغانىستان-پاكىستان رايونىدا تېررورلۇق تەشكىلاتى ئىچىدە يۇقىرى دەرىجىلىك ۋەزىپە ئۆتىگەن بىر تۈركىيە پۇقراسىنى قولغا ئېلىپ، تۈركىيەگە ئېلىپ كەلگەنلىكىنى ئېلان قىلغان ئىدى.

بىخەتەرلىك مەنبەلىرىنىڭ ئاشكارىلىشىچە، مەزكۇر دائېش ئەزاسى ئافغانىستان، پاكىستان، تۈركىيە ۋە ياۋروپادىكى پۇقرالارنى نىشان قىلغان ئۆزىنى ئۆلتۈرۈۋېلىش خاراكتېرلىك ھۇجۇملارنى ئورۇنلاشتۇرۇشقا مەسئۇل بولغان.

دائېش (< ISIS > دەپمۇ ئاتىلىدۇ)  2019-يىلى سۈرىيەدە قۇرۇقلۇقتىن قىلىنغان ھۇجۇملاردا مەغلۇب قىلىنغان بولسىمۇ، لېكىن كەڭرى كەتكەن چۆل رايونلاردا يەنىلا مەۋجۇتلۇقىنى ساقلاپ كەلمەكتە. دائېش تېررورلۇق تەشكىلاتىنىڭ يەنە دۇنيانىڭ باشقا جايلىرىدىمۇ رايونلۇق تارماقلىرى بار، مەسىلەن، ئوتتۇرا ۋە جەنۇبىي ئاسىيادىكى دائېش-خوراسان (Daesh-K) گۇرۇھى شۇلار جۈملىسىدىندۇر.

13-دېكابىر، تۈركىيە تاشقى ئىشلار مىنىستىرلىقى بۇ تەشكىلاتنىڭ سۈرىيەدىكى سۈرىيە ۋە ئامېرىكا قىسىملىرىنى نىشان قىلغان تېررورلۇق ھۇجۇمىنى ئەيىبلىدى ھەمدە ئەنقەرەنىڭ مۇقىملىق ۋە بىخەتەرلىكنى كۈچەيتىش، تېررورلۇققا قارشى تۇرۇش تىرىشچانلىقلىرىنى داۋاملىق قوللايدىغانلىقىنى بىلدۈردى.