ھىندىستان باش مىنىستىرى نارېندرا مودى، تەخمىنەن 30 يىلدىن كېيىن غەربىي ئافرىقا دۆلىتى گانادا تۇنجى قېتىم رەسمىي زىيارەتتە بولۇش ئۈچۈن گاناغا يېتىپ باردى.
چارشەنبە كۈنى باشلانغان بۇ زىيارەت، ھىندىستاننىڭ ئافرىقا، كارىب دېڭىزى ۋە جەنۇبىي ئامېرىكادىكى ئىقتىسادىي ۋە ئىستراتېگىيەلىك مەۋجۇتلۇقىنى كۈچەيتىشنى مەقسەت قىلغان تېخىمۇ كەڭ دائىرىلىك بىر دىپلوماتىك ساياھىتىنىڭ بىر قىسمى سۈپىتىدە باھالاندى. بۇ تىرىشچانلىقلار خىتاي ۋە رۇسىيە بىلەن كۈنسېرى كۈچىيىۋاتقان رىقابەتنىڭ سايىسى ئاستىدا ئېلىپ بېرىلماقتا.
مودى گانانىڭ پايتەختى ئاككرادا بۇ يىلنىڭ بېشىدا ۋەزىپىگە ئولتۇرغان پىرېزىدېنت جون ماھاما بىلەن ئىككى تەرەپلىك سۆھبەت ئۆتكۈزىدۇ. سۆھبەتنىڭ سودا مۇناسىۋەتلىرىنى تەرەققىي قىلدۇرۇش ۋە ھەر قايسى ساھەلەردىكى ھەمكارلىقنى كېڭەيتىش قاتارلىق مەسىلىلەرگە مەركەزلىشىشى مۆلچەرلەنمەكتە.
مودى يەنە گانا پارلامېنتىدا نۇتۇق سۆزلەش بىلەن بىرگە، دۆلەتتىكى تەخمىنەن 15 مىڭ كىشىلىك ھىندىستانلىقلار جامائىتى بىلەن كۆرۈشىدۇ. بۇ جامائەت ئىچىدە، گانانىڭ مۇستەقىللىققا ئېرىشكەنلىكىگە تەخمىنەن 70 يىل بولغان ۋاقىتتىن بۇيان گانادا ياشاۋاتقان ئائىلىلەرمۇ بار.
ئىستراتېگىيەلىك شېرىك
قىتئەدىكى ئەڭ چوڭ ئالتۇن ئىشلەپچىقارغۇچى ۋە كاكائو ئېكسپورتىدا مۇھىم رول ئوينايدىغان گانا، ھىندىستان ئۈچۈن ئىستراتېگىيەلىك شېرىك بولۇپ كەلمەكتە. ھىندىستان تاشقى ئىشلار مىنىستىرلىقىنىڭ بىلدۈرۈشىچە، 2024-2025-يىللىق مالىيە يىلىدا ئىككى دۆلەت ئوتتۇرىسىدىكى سودا ھەجىمى 3.1 مىليارد دوللارغا يەتكەن.
گانادىن قىلىنغان ئېكسپورتتا ھىندىستاننىڭ ئەڭ مۇھىم ئېكسپورت بازىرى بولۇشىنىڭ چوڭ سەۋەبى ھىندىستاننىڭ گانا ئالتۇنىنى كۆپلەپ ئىمپورت قىلىشىدۇر.
مودىنىڭ گانا زىيارىتى تىرىنىداد، توباگو، ئارگېنتىنا، بىرازىلىيە ۋە نامىبىيەنى ئۆز ئىچىگە ئالغان كۆپ دۆلەتلىك ساياھىتىنىڭ تۇنجى بېكىتى ھېسابلىنىدۇ. مودىنىڭ 6-7-ئىيۇل كۈنلىرى رىئو-دې-ژانېيرودا ئۆتكۈزۈلىدىغان ئالتۇن كېسەك دۆلەتلىرى باشلىقلار يىغىنىغا قاتنىشىشى كۈتۈلمەكتە.
