تۈركىيە سودا ئىشلىرى مىنىستىرى ئۆمەر بولات جۈمە كۈنى ئېلان قىلغان باياناتىدا، تۈركىيەنىڭ سۈرىيە بىلەن بولغان ئىقتىسادىي ۋە سودا مۇناسىۋەتلىرىنى كۈچەيتىش ئۈچۈن تىرىشىۋاتقانلىقىنى، شۇنىڭ بىلەن بىر ۋاقىتتا ھەلەبنى قايتىدىن قۇرۇپ چىقىش ۋە ئىقتىسادىي تەرەققىياتىنى قوللايدىغان ھەمكارلىق دائىرىسىنى كېڭەيتىۋاتقانلىقىنى بىلدۈردى.
سودا مىنىستىرلىقىنىڭ ئېلان قىلغان باياناتىغا ئاساسلانغاندا، بولات ھەلەب زىيارىتى دائىرىسىدە «شەيخ نەججار» سانائەت رايونىنى كۆزدىن كەچۈرۈپ، سانائەتچىلەر ۋە سودا ساھەسىنىڭ ۋەكىللىرى بىلەن بىر يەرگە جەم بولدى. رايوندىكى ئىشلەپچىقىرىش پائالىيەتلىرى، سانائەت ئۇل ئەسلىھەلىرى ۋە سودا پۇرسەتلىرى ھەققىدە مەلۇمات ئالغان بولات، ھەلەبنىڭ سۈرىيە ئىقتىسادىنى قايتىدىن جانلاندۇرۇشتىكى مەركىزىي رولىغا دىققەت تارتتى.
مىنىستىر بولات: «تۈركىيە-سۈرىيە ئىقتىسادىي ۋە سودا مۇناسىۋەتلىرىنى كۈچەيتىش بىلەن بىرگە، ھەلەبنىڭ قايتىدىن قۇرۇلۇشىغا ۋە ئىقتىسادىي تەرەققىياتىغا تۆھپە قوشىدىغان ھەمكارلىق ئىمكانىيەتلىرىنىمۇ تەرەققىي قىلدۇرۇۋاتىمىز» دېدى. ئۇ كۈچلۈك ئىككى تەرەپلىك ئىقتىسادىي ۋە سودا مۇناسىۋەتلىرىنىڭ ھەر ئىككى دۆلەتنىڭ پاراۋانلىقىغا تۆھپە قوشىدىغانلىقىنى تەكىتلەپ، ئىشلەپچىقىرىش، سېلىنما ۋە ئېكسپورتنى رىغباتلەندۈرىدىغان قەدەملەرنىڭ مۇھىملىقىنى ئەسكەرتتى.
سودا ساھەسى ۋەكىللىرىگە خىتاب قىلغان بولات، ئىشلەپچىقىرىش ئەسلىھەلىرىنىڭ قايتىدىن ئىشقا كىرىشتۈرۈلۈشى، ئىشقا ئورۇنلاشتۇرۇشنىڭ ئاشۇرۇلۇشى ۋە سودا لىنىيەلىرىنىڭ كۈچەيتىلىشىنىڭ ھەلەبنىڭ ئىقتىسادىي جەھەتتىن ئەسلىگە كېلىشى ئۈچۈن ھالقىلىق ئەھمىيەتكە ئىگە ئىكەنلىكىنى بايان قىلدى. تۈركىيە بىلەن ھەلەب ئوتتۇرىسىدىكى مۇناسىۋەتلەرنىڭ سودىنىڭ دائىرىسىدىن ھالقىپ كەتكەنلىكىنى بىلدۈرگەن بولات، رايوندىكى تەخمىنەن مىڭ يىللىق ئۇرۇق –تۇغقانچىلىق، قوشنىدارچىلىق ۋە ئورتاق مەدەنىيەت رىشتىسىنىڭ ناھايىتى زور ئەھمىيەتكە ئىگە ئىكەنلىكىنى ئالاھىدە تەكىتلىدى. مىنىستىر بولات سانائەت رايونىدىكى ئۇچرىشىشلىرىدىن كېيىن، تۈركىيە ۋە سۈرىيە سودىگەرلىرى قاتناشقان يۇمىلاق ئۈستەل يىغىنىغا رىياسەتچىلىك قىلدى.
يىغىندا ئىككى تەرەپلىك سودا مۇناسىۋەتلىرى، ھەلەبنىڭ ئىقتىسادىي ئەھۋالى، شەھەرنىڭ قايتىدىن قۇرۇلۇشى ھەمدە سانائەت ۋە سودا ئۇل ئەسلىھەلىرىنى تەرەققىي قىلدۇرىدىغان قەدەملەر مۇزاكىرە قىلىندى. بولات ھەلەبنى قايتىدىن جانلاندۇرۇش خىزمەتلىرىنىڭ پۈتۈن رايوننىڭ كەلگۈسى ئۈچۈن ناھايىتى زور ئەھمىيەتكە ئىگە ئىكەنلىكىنى سۆزلىرىگە ئىلاۋە قىلدى.
