تۈركىيە بىلەن پاكىستان پەلەستىن خەلقىنى داۋاملىق قوللايدىغانلىقىنى بىلدۈردى
پاكىستان پىرېزىدېنتى ئاسىف ئەلى زەردارى پاكىستاننىڭ پەلەستىن خەلقىگە ھەر خىل سىياسىي، دىپلوماتىك، ئىنسانپەرۋەرلىك ۋە ئەخلاقىي ياردەملەرنى بېرىشنى داۋاملاشتۇرىدىغانلىقىنى ئېيتتى.
ئەنقەرە بىلەن ئىسلامئاباد 29 – نويابىر پەلەستىن خەلقى بىلەن خەلقئارالىق ھەمكارلىق كۈنىنى تەبرىكلەش بىلەن بىرگە، پەلەستىن دەۋاسى ئۈچۈن ئادىل ۋە ئۇزۇن مۇددەتلىك ھەل قىلىش چارىسى تېپىش چاقىرىقلىرىنى تەكرارلىدى.
تاشقى ئىشلار مىنىستىرلىقى شەنبە كۈنى ئېلان قىلغان باياناتىدا، تۈركىيەنىڭ پەلەستىن دەۋاسىغا ئۇزۇندىن بۇيان داۋاملىشىپ كەلگەن ساداقىتىنىڭ ئۈزلۈكسىز داۋاملىشىدىغانلىقىنى تەكىتلىدى.
مىنىستىرلىق تۈركىيەنىڭ 1967-يىلىدىكى چېگرا لىنىيەلىرى ئاساسىدا مۇستەقىل، ئىگىلىك ھوقۇقلۇق ۋە زېمىن پۈتۈنلۈكىگە ئىگە بىر پەلەستىن دۆلىتىنىڭ قۇرۇلۇشىنى قوللاشنى داۋاملاشتۇرىدىغانلىقىنى يەنە بىر قېتىم تەكىتلىدى. مىنىستىرلىق يەنە، بۇنداق بىر دۆلەتنىڭ رايوننىڭ تىنچلىقى ۋە مۇقىملىقىنىڭ ئىشقا ئاشۇرۇلۇشى ئۈچۈن ھېلىھەم ناھايىتى زور ئەھمىيەتكە ئىگە ئىكەنلىكىنى بىلدۈردى.
ئەنقەرە يەنە، پەلەستىنلىكلەرگە بېرىۋاتقان ياردىمىنىڭ «تەۋرەنمەس» ئىكەنلىكىنى بىلدۈرۈپ، رايوندىكى داۋاملىشىۋاتقان جىددىيچىلىكلەر بىلەن ئىنسانىي قىيىنچىلىقلار نەزەردە تۇتۇلغاندا، پەلەستىن خەلقى بىلەن ھەمكارلىشىشنىڭ ناھايىتى زور ئەھمىيەتكە ئىگە ئىكەنلىكىنى ئىپادىلىدى.
مىنىستىرلىقنىڭ خەلقئارا جەمئىيەتكە كەڭ كۆلەملىك بىر ھەل قىلىش چارىسى ئۈچۈن تىرىشچانلىقلارنى كۈچەيتىش چاقىرىقى بىلەن ئاخىرلاشقان باياناتىدا، تۈركىيەنىڭ پەلەستىن خەلقىنىڭ ھەق – ھوقۇقلىرى ھەم ئەركىنلىكلىرىنى كاپالەتكە ئىگە قىلىشقا قارىتىلغان بارلىق تەشەببۇسلارغا ھەسسە قوشۇشقا تەييار ئىكەنلىكى تەكىتلەندى.
ئىسرائىلىيەگە پەلەستىن زېمىنلىرىدىن پۈتۈنلەي چېكىنىپ چىقىپ كېتىش چاقىرىقى
پاكىستان ئاخبارات ئاگېنتلىقى (APP) نىڭ بىلدۈرۈشىچە، ئىسلامئابادمۇ پەلەستىن خەلقى بىلەن خەلقئارالىق ھەمكارلىق كۈنى مۇناسىۋىتى بىلەن پەلەستىن خەلقىنى قوللايدىغانلىقىنى تەكرارلىغان.
پاكىستان پىرېزىدېنتى ئاسىف ئەلى زەردارى پاكىستاننىڭ پەلەستىن خەلقىگە ھەر خىل سىياسىي، دىپلوماتىك، ئىنسانپەرۋەرلىك ۋە ئەخلاقىي ياردەملەرنى بېرىشنى داۋاملاشتۇرىدىغانلىقىنى ئەسكەرتىپ مۇنداق دېگەن:
«1967-يىلى ئىيۇندىن ئىلگىرىكى چېگرا لىنىيەلىرى ئاساسىدا، پايتەختى قۇددۇس بولغان مۇستەقىل، ئىگىلىك ھوقۇقلۇق، ياشىغىلى بولىدىغان ۋە بىر پۈتۈن پەلەستىن دۆلىتىنىڭ قۇرۇلۇشىنى قەتئىي ئىرادە بىلەن قوللايدىغانلىقىمىزنى يەنە بىر قېتىم تەكىتلەيمىز.»
زەردارى پاكىستاننىڭ ھەر دائىم پەلەستىن خەلقىنى قەتئىي قوللايدىغانلىقىنى، ئىسلامئابادنىڭ پەلەستىن دەۋاسىغا بېرىۋاتقان ياردىمىنىڭ ئىنسانىي قەدىر - قىممەت، ھەققانىيەت ۋە ئادالەتكە ئوخشىغان ئالەمشۇمۇل قىممەت قاراشلارنى ئاساس قىلىدىغانلىقىنى ئېيتتى.
پاكىستان باش مىنىستىرى شاھباز شېرىف ئايرىم بىر باياناتىدا، پەلەستىنلىكلەرنىڭ «دەۋرىمىزنىڭ ئەڭ ۋەيران قىلغۇچى تىراگېدىيەلىرىدىن بىرىگە دۇچ كەلگەنلىكىنى — ئۆز تەقدىرىنى ئۆزى بەلگىلەش ھوقۇقىدىن مەھرۇم قالدۇرۇلغانلىقىنى، زېمىنلىرىنىڭ تارتىۋېلىنغانلىقىنى ۋە ھۇزۇرىنىڭ بۇزۇپ تاشلانغانلىقىنى» تەكىتلەپ مۇنداق دېدى:
«بۇ ئېغىر رېئاللىقلاردىن كېيىن خەلقئارا قانۇنغا ئۇيغۇن ھالدا، ئىسرائىلىيە تەرىپىدىن پەلەستىنلىكلەرگە قارشى سادىر قىلىنغان ئۇرۇش جىنايەتلىرى ۋە ئىرقىي قىرغىنچىلىق خاراكتېرىدىكى ھەرىكەتلەر ئۈچۈن تولۇق ھەم ئىشەنچلىك بىر جاۋابكارلىقنى سۈرۈشتۈرۈش بولۇشى كېرەك.
پەلەستىن خەلقى مەڭگۈلۈك تىنچلىق ۋە پاراۋانلىققا لايىقتۇر. شۇڭا ئىسرائىلىيە ئارمىيەسىنىڭ غەززەنىمۇ ئۆز ئىچىگە ئالغان ئىشغال ئاستىدىكى پەلەستىن زېمىنلىرىدىن پۈتۈنلەي چېكىنىپ چىقىپ كېتىشى شەرت.»
پەلەستىن قارشىلىق كۆرسىتىش ھەرىكىتى (خاماس) بىلەن ئىسرائىلىيە ئوتتۇرىسىدا، مىسىرلىق، قاتارلىق ۋە تۈركىيەلىك مۇرەسسەچىلەر بىلەن ئامېرىكانىڭ ياردىمىدە ھاسىل قىلىنغان ئۇرۇش توختىتىش كېلىشىمىنىڭ تۇنجى باسقۇچى 10-ئۆكتەبىردە كۈچكە ئىگە بولدى.
ئىسرائىلىيە 2023-يىلى ئۆكتەبىردىن بۇيان غەززەدە داۋاملاشتۇرۇۋاتقان ھۇجۇملىرىدا كۆپىنچىسى ئاياللار ۋە بالىلاردىن تەشكىل تاپقان تەخمىنەن 70 مىڭ كىشىنى ئۆلتۈردى، 170 مىڭدىن ئارتۇق كىشىنى يارىلاندۇردى.