مۇناسىۋەتلىك دائىرىلەر ياپونىيەنىڭ ئوكىناۋا رايونىدىكى بىر ئامېرىكا ھاۋا ئارمىيە بازىسى ئىچىدىكى بىر ياپونىيە ھەربىي نۇقتىسىدا پارتلاش يۈز بەرگەنلىكىنى بىلدۈردى. يەرلىك تاراتقۇلار بولسا، ۋەقەدە ھاياتىي خەۋپكە ئۇچرىغانلارنىڭ يوقلۇقىنى خەۋەر قىلدى.
كيودو ئاخبارات ئاگېنتلىقى پارتلاشنىڭ ياپونىيە ئۆزىنى قوغداش قىسمى خادىملىرىنىڭ بومبا تازىلاش ھەرىكىتىگە تەييارلىق قىلىۋاتقان جەرياندا يۈز بەرگەنلىكىنى بىلدۈردى.
ياپونىيە دۆلەت مۇداپىئە مىنىستىرلىقىنىڭ باياناتچىسىمۇ ياپونىيەنىڭ جەنۇبىدىكى كادېنا ھاۋا ئارمىيە بازىسىغا جايلاشقان ئۆزىنى قوغداش قىسمى نۇقتىسدا پارتلاش يۈز بەرگەنلىكى ھەققىدە دوكلات تاپشۇرۇۋالغانلىقىنى ئېيتتى.
جىجى ئاگېنتلىقى ۋە باشقا يەرلىك تاراتقۇلار ۋەقەدە تۆت كىشىنىڭ يارىلانغانلىقىنى، ئەمما يارىلىنىشنىڭ ھاياتىي خەۋپ پەيدا قىلمىغانلىقىنى خەۋەر قىلدى.
جامائەت رادىيو-تېلېۋىزىيە شىركىتى NHK، دۆلەت مۇداپىئە مىنىستىرلىقى مەنبەلىرىنى نەقىل كەلتۈرۈپ، پارتلاشنىڭ پارتلىمىغان بومبىلار ۋاقىتلىق ساقلىنىدىغان بىر جايدا يۈز بەرگەنلىكى مۇمكىنلىكىنى ۋە دائىرىلەرنىڭ ئەھۋالنى دەلىللەشكە تىرىشىۋاتقانلىقىنى خەۋەر قىلدى.
ئوكىناۋانىڭ يومىتان يېزىسىدىكى يەرلىك ئەمەلدار يۇتا ماتسۇدا AFP ئاگېنتلىقىغا بەرگەن باياناتىدا: «ئۆزىنى قوغداش قىسمىغا تەۋە نۇقتىدا پارتلاش يۈز بېرىپ، يارىلانغانلارنىڭ بارلىقىنى ئاڭلىدۇق، ئەمما تېخىمۇ تەپسىلىي ئۇچۇرىمىز يوق» دېدى.
يەرلىك دائىرىلەر يەنە ئەتراپتىكى ئاھالىلەر ئۈچۈن تارقاقلاشتۇرۇش بۇيرۇقى چۈشۈرۈلمىگەنلىكىنى بىلدۈردى. ئوكىناۋا ياپونىيەدىكى ئامېرىكا ھەربىي بازىلىرىنىڭ كۆپ قىسمىغا ساھىبخانلىق قىلىدۇ.
خىتاي بىلەن ياپونىيە ئوتتۇرىسىدىكى جىددىيلىك
شۇنىڭ بىلەن بىر ۋاقىتتا، خىتايغا تەۋە بىر ئاۋىئاماتكا ھەپتە ئاخىرىدا ياپونىيەنىڭ ئىقتىسادىي سۇ تەۋەلىكىگە كىرىپ، ئۇرۇش ئايروپىلانلىرى قاتناشقان مانېۋىرلارنى ئۆتكۈزگەندىن كېيىن رايوندىن ئايرىلدى. ياپونىيە دۆلەت مۇداپىئە مىنىستىرلىقى، لياۋنىڭ ئاۋىئاماتكىسى، ئىككى باشقۇرۇلىدىغان بومبا قوغلىغۇچى پاراخوتى ۋە بىر تېز سۈرئەتلىك تەمىنات پاراخوتىنىڭ شەنبە كۈنى ياپونىيەنىڭ ئەڭ شەرقىدىكى مىنامىتورى ئارىلىنىڭ تەخمىنەن 300 كىلومېتىر غەربىي جەنۇبىدا كۆرۈلگەنلىكىنى ئېلان قىلدى.
ياپونىيە دۆلەت مۇداپىئە مىنىستىرلىقىنىڭ باياناتچىسى AFP ئاگېنتلىقىغا خىتاي ئاۋىئاماتكىسىنىڭ تۇنجى قېتىم ياپونىيەنىڭ مەخسۇس ئىقتىسادىي رايونىنىڭ بۇ قىسمىغا كىرگەنلىكىنى بىلدۈردى. ئۇ يەنە: «بىز خىتاي ئارمىيەسىنىڭ ھەرىكەت ئىقتىدارىنى ۋە يىراق رايونلاردا ھەرىكەت قىلىش قابىلىيىتىنى تەرەققىي قىلدۇرۇشقا تىرىشىۋاتىدۇ دەپ قارايمىز» دېدى.
خىتاينىڭ كۈنسېرى كۈچىيىۋاتقان ھەربىي كۈچى ھەمدە دېڭىز ۋە ھاۋا ئامىللىرىدىن پايدىلىنىپ تالاش-تارتىشلىق زېمىن ئىگىدارلىق ھوقۇقىنى ئىلگىرى سۈرۈشى، ئاسىيا-تىنچ ئوكيان رايونىدىكى ئامېرىكا ۋە ئۇنىڭ ئىتتىپاقداشلىرىنى ئەندىشىگە سالماقتا.
توكيو ھۆكۈمىتى مىنىستىرلار كابىنېتى باش كاتىپى يوشىماسا ھاياشى دۈشەنبە كۈنى مۇخبىرلارغا قىلغان سۆزىدە، ھۆكۈمەتنىڭ «خىتاي تەرەپكە مۇۋاپىق ئۇچۇر يەتكۈزگەنلىكىنى»، ئەمما رەسمىي نارازىلىق بىلدۈرۈلمىگەنلىكىنى ئېيتتى.
