خىتاي دۆلەتلەرنىڭ «دۇنيانىڭ خوجايىنى»دەك ھەرىكەت قىلسا بولمايدىغانلىقىنى تەكىتلىدى

خىتاي تاشقى ئىشلار مىنىستىرى ۋاڭ يى ئامېرىكا ۋېنېزۇئېلا پىرېزىدېنتى نىكولاس مادۇرۇنى تۇتقۇن قىلغاندىن كېيىن، بېيجىڭنىڭ ھېچقانداق بىر دۆلەتنىڭ «دۇنيانىڭ خوجايىنى»دەك ھەرىكەت قىلىشىنى قوبۇل قىلالمايدىغانلىقىنى بىلدۈردى.

ۋاڭ يى يەكشەنبە كۈنى بېيجىڭدا پاكىستانلىق مەنسەپدىشى ئىسھاق دار بىلەن كۆرۈشكەندە، ئامېرىكانىڭ نامىنى بىۋاسىتە تىلغا ئالماي تۇرۇپ «ۋېنېزۇئېلادىكى تۇيۇقسىز ئۆزگىرىشلەر»گە ئىشارەت قىلىپ: «بىز ھېچقانداق دۆلەتنىڭ دۇنيانىڭ ساقچىسىدەك ھەرىكەت قىلالايدىغانلىقىغا ئىشەنمەيمىز، ھېچقانداق مىللەتنىڭ دۇنيانىڭ خوجايىنى ئىكەنلىكىنى دەۋا قىلىشىنىمۇ قوبۇل قىلمايمىز» دېدى.

خىتاي تاشقى ئىشلار مىنىستىرى 63 ياشلىق مادۇرۇنىڭ كۆزى تېڭىلغان ۋە قولىغا كويزا سېلىنغان ھالەتتىكى كۆرۈنۈشلىرى شەنبە كۈنى ۋېنېسۇئېلالىقلارنى چۆچۈتۈۋەتكەندىن بۇيانقى تۇنجى باياناتىدا: «بارلىق دۆلەتلەرنىڭ ئىگىلىك ھوقۇقى ۋە بىخەتەرلىكى خەلقئارا قانۇن دائىرىسىدە تولۇق قوغدىلىشى كېرەك» دەپ تەكىتلىدى.

زەھەرلىك چېكىملىك ئەيىبلەشلىرى سەۋەبلىك دۈشەنبە كۈنى سوتقا چىقىدىغان مادۇرۇ نيۇيوركتىكى بىر قاماقخانىدا تۇتۇپ تۇرۇلماقتا. ئەمما ئامېرىكا پىرېزىدېنتى دونالد ترامپنىڭ ئامېرىكانىڭ ۋېنېزۇئېلا ھۆكۈمىتىنى ھازىرچە نازارەت قىلىدىغانلىقى ھەققىدىكى دەۋاسى، بېيجىڭ بىلەن كاراكاسنىڭ 2023-يىلى ئىمزالىغان «ھەر قانداق شارائىتتىكى ئەتراپلىق ئىستراتېگىيەلىك ھەمكارلىق مۇناسىۋىتى» ئۈچۈن ئېغىر بىر سىناقتۇر.

خىتاي ھۆكۈمەت ئەمەلدارلىرىنىڭ بىلدۈرۈشىچە، بۇ ئەھۋال خىتاي ئۈچۈن زور بىر زەربە بولغان، چۈنكى خىتاي ۋېنېزۇئېلاغا ئىشەنچلىك بىر دوست سۈپىتىدە كۆرۈنۈشنى كۆزلىگەنىدى. خىتاي 2024-يىلى ۋېنېزۇئېلادىن تەخمىنەن 1 مىليارد 600 مىليون دوللارلىق مال سېتىۋالغان بولۇپ، بۇنىڭ يېرىمىغا يېقىنى خام نېفىتتۇر.