ئىران دۆلەت تاراتقۇلىرى دىنىي رەھبەر ئايەتۇللاھ ئەلى ھاماننىنىڭ ئىسرائىلىيە ۋە ئامېرىكا ھۇجۇمىدا ھاياتىدىن ئايرىلغانلىقىنى ئېلان قىلدى. بۇ باياناتتىن كېيىن، ئىنقىلابىي مۇھاپىزەتچىلەر قىسمى ئىنتىقام ئېلىشقا چاقىرىق قىلدى.
دۆلەت تېلېۋىزىيە ئىستانسىسى 1989-يىلىدىن بۇيان ۋەزىپە ئۆتەۋاتقان 86 ياشلىق ھامانىنىڭ ۋاپاتىدىن كېيىن، مەملىكەت بويىچە 40 كۈنلۈك ماتەم ۋە يەتتە كۈنلۈك رەسمىي دەم ئېلىش ئېلان قىلىنغانلىقىنى خەۋەر قىلدى.
پروگرامما جەريانىدا بىر رىياسەتچى: «دىنىي رەھبەرنىڭ شېھىت بولۇشى بىلەن ئۇنىڭ يولى ۋە مۇساپىسى يوقاپ كەتمەيدۇ، شۇنداقلا ئۇنتۇلمايدۇ. ئەكسىچە تېخىمۇ زور بىر قەتئىي ئىرادە ۋە قىزغىنلىق بىلەن داۋاملاشتۇرۇلىدۇ» دېدى.
ئىران ئىنقىلابىي مۇھاپىزەتچىلەر قىسمى ئېلان قىلغان باياناتىدا، ھامانىنىڭ «قاتىللىرى» نىڭ جازالىنىدىغانلىقىنى بىلدۈردى. باياناتتا: «ئىران مىللىتىنىڭ ئىنتىقامى ئېغىر ۋە قەتئىي بولىدۇ» دېگەن ئىبارىلەرگە ئورۇن بېرىلدى.
ئىران تاراتقۇلىرى ھۇجۇمدا دىنىي رەھبەرنىڭ قىزى، كۈيئوغلى ۋە نەۋرىسىنىڭمۇ ھاياتىدىن ئايرىلغانلىقىنى خەۋەر قىلدى. فارس خەۋەر ئاگېنتلىقى ۋە باشقا تاراتقۇ ئورگانلىرى ئائىلە ئەزالىرىنىڭ ئۆلۈمىنى ئىشەنچلىك مەنبەلەرنىڭ دەلىللىگەنلىكىنى خەۋەر قىلدى.
ترامپ: «بۇ پەقەت ئىران خەلقى ئۈچۈنلا ئەمەس، بەلكى ھامانى ۋە ئۇنىڭ شاھمات شېرىكلىرى تەرىپىدىن ئۆلتۈرۈلگەن ياكى مېيىپ قىلىنغان ئامېرىكىلىقلار ۋە دۇنيانىڭ نۇرغۇن دۆلەتلىرىدىكى كىشىلەر ئۈچۈنمۇ بىر ئادالەتتۇر» دېدى.
نېتانياھۇ بولسا ئېلان قىلغان سىنلىق ئۇچۇرىدا: «بۇ ئەتىگەن ئېلىپ بارغان كۈچلۈك ۋە تۇيۇقسىز ھۇجۇمىمىز بىلەن زالىم ھامانىنىڭ تۇرالغۇسىنى يوقاتتۇق» دېگەن ئىبارىلەرنى ئىشلەتتى.
ھامانى يېقىن ئەتراپىدىكىلەر بىلەن كۆرۈشۈۋاتقان پەيتتە ھۇجۇم يۈز بەرگەن
ئامېرىكىلىق ئىككى مەنبە ۋە مەسىلىدىن خەۋەردار بىر ئامېرىكىلىق ئەمەلدارنىڭ ئېيتىشىچە، ئىسرائىلىيە ۋە ئامېرىكا شەنبە كۈنى ئېلىپ بېرىلغان ھۇجۇمنى ھامانىنىڭ يۇقىرى دەرىجىلىك ياردەمچىلىرى بىلەن ئۆتكۈزىدىغان يىغىنىغا توغرىلاپ پىلانلىغان.
ئىسرائىلىيە ھامانىدىن باشقا يەنە، سابىق دۆلەت خەۋپسىزلىك كېڭىشىنىڭ كاتىپى ئەلى شەيخانى بىلەن ئىنقىلابىي مۇھاپىزەتچىلەر قىسمىنىڭ قوماندانى مۇھەممەد پاكپۇرنىڭمۇ ئۆلتۈرۈلگەنلىكىنى ئىلگىرى سۈردى.
ئىرانلىق ئىككى مەنبە رويتېرز ئاگېنتلىقىغا، ھامانىغا قىلىنغان ھۇجۇمدىن سەل ئىلگىرى شەيخانى ۋە ئالىي دۆلەت خەۋپسىزلىك كېڭىشىنىڭ كاتىپى ئەلى لارىجانى بىلەن بىخەتەر بىر جايدا كۆرۈشكەنلىكىنى ئېيتتى.
بىر يۇقىرى دەرىجىلىك ئىسرائىلىيە ئەمەلدارى ھامانىنىڭ جەسىتىنىڭ تېپىلغانلىقىنى دەۋا قىلدى.
ترامپ Truth Social ھېساباتىدىكى ھەمبەھرلىگەن ئۇچۇرىدا، ئىران رەھبىرىنىڭ ھەرىكەتلىرى ئىستىخبارات تەرىپىدىن ئېنىقلانغاندىن كېيىن ئۆلتۈرۈلگەنلىكىنى بىلدۈردى. ئۇ: «ئۇ بىزنىڭ ئىستىخباراتىمىز ۋە ئىنتايىن تەرەققىي قىلغان ئىز قوغلاش سىستېمىلىرىمىزدىن قېچىپ قۇتۇلالمىدى. ئىسرائىلىيە بىلەن يېقىندىن ھەمكارلاشتۇق. ئۇنىڭ ياكى ئۇنىڭ بىلەن بىرگە ئۆلتۈرۈلگەن باشقا رەھبەرلەرنىڭ قىلالايدىغان ھېچقانداق ئىشى يوق ئىدى» دېدى.
كىملىكىنى ئاشكارىلىماسلىق شەرتى بىلەن سۆزلىگەن ئامېرىكالىق مەنبەلەر، يىغىن ئۇچۇرىنىڭ دەلىللىنىشى بىلەن ھاۋا ۋە دېڭىز ھەرىكىتىنىڭ باشلانغانلىقىنى يەتكۈزدى.
ئامېرىكىلىق ئەمەلدار، تۇيۇقسىزلىق ئامىلىنى ساقلاپ قېلىش ئۈچۈن ھۇجۇمنىڭ ئالدى بىلەن ھامانىنى نىشان قىلغانلىقىنى، بولمىسا ئىران رەھبىرىنىڭ يوشۇرۇنۇۋېلىش ئېھتىماللىقى بارلىقى ھەققىدە ئانالىز ئېلىپ بېرىلغانلىقىنى ئېيتتى.
بىر ئامېرىكىلىق مەنبە، يىغىننىڭ ئەسلىدە شەنبە كۈنى كەچتە ئۆتكۈزۈلۈشىنىڭ كۈتۈلگەنلىكىنى، ئەمما ئەتىگەن سائەتلەردە بايقالغانلىقى ئۈچۈن ھۇجۇمنىڭ ئالدىغا سۈرۈلگەنلىكىنى بايان قىلدى.
يىغىن ئۆتكۈزۈلگەن جاي تېخى ئېنىق ئەمەس.
مەشغۇلاتنىڭ بىرىنچى باسقۇچىدا ھامانىنىڭ تېھراندىكى يۇقىرى دەرىجىلىك قوغدىلىدىغان تۇرالغۇسى زەربىگە ئۇچرىدى. رويتېرز ئاگېنتلىقى تەكشۈرگەن سۈنئىي ھەمراھ سۈرەتلىرى تۇرالغۇنىڭ ۋەيران بولغانلىقىنى دەلىللىدى.
