تۈركىيە ئەمەلدارلىرى لىۋىيە باش ئىشتاب باشلىقى مۇھەممەد ئەلھەدداد ۋە تۆت نەپەر يۇقىرى دەرىجىلىك ھەربىي ئەمەلدارنىڭ ئەنقەرەنىڭ جەنۇبىدا يۈز بەرگەن ئايروپىلان قازاسىدا ھاياتىدىن ئايرىلغانلىقىنى دەلىللىدى.
لىۋىيە ھۆكۈمىتى باش ئىشتاب باشلىقى مۇھەممەد ئەلھەدداد ۋە ئۇنىڭغا ھەمراھ بولغان تۆت نەپەر يۇقىرى دەرىجىلىك ھەربىي ئەمەلدارنىڭ، ئەنقەرە ئەتراپىدا يۈز بەرگەن ئايروپىلان قازاسىدا ھاياتىدىن ئايرىلىشى سەۋەبىدىن دۆلەت مىقياسىدا ئۈچ كۈنلۈك ماتەم ئېلان قىلدى.
لىۋىيە مىللىي بىرلىك ھۆكۈمىتى سەيشەنبە كۈنى بايانات ئېلان قىلىپ، قازا قىلغانلارنىڭ ئائىلە-تاۋابىئاتلىرىغا ۋە لىۋىيە قوراللىق قىسىملىرىدىكى سەبداشلىرىغا چوڭقۇر تەزىيە بىلدۈردى.
باياناتتا، ئۈچ كۈنلۈك ماتەم مەزگىلىدە بارلىق دۆلەت ئورگانلىرىدا دۆلەت بايرىقىنىڭ يېرىم چۈشۈرۈلىدىغانلىقى، رەسمىي مۇراسىم ۋە تەبرىكلەش پائالىيەتلىرىنىڭ توختىتىلىدىغانلىقى تەكىتلەندى.
مىللىي بىرلىك ھۆكۈمىتى باياناتىدا يەنە: «ھۆكۈمىتىمىز ھاياتىدىن ئايرىلغانلارنىڭ ئائىلىلىرىگە ۋە قوراللىق قىسىملاردىكى سەبداشلىرىغا ئەڭ سەمىمىي تەزىيەسىنى بىلدۈرىدۇ ۋە قايغۇسىغا ئورتاقلىشىدۇ» دېيىلدى ھەمدە مەرھۇملارغا ئاللاھتىن رەھمەت، يېقىنلىرىغا سەۋر تىلەندى.
بۇنىڭدىن ئىلگىرى لىۋىيە رىياسەت كېڭىشىنىڭ رەئىسى مۇھەممەد مەنفى تۈركىيەنىڭ پايتەختى ئەنقەرە ئەتراپىدا يۈز بەرگەن ئايروپىلان قازاسىدا ۋاپات بولغان باش ئىشتاب باشلىقى مۇھەممەد ئەلھەدداد ۋە يۇقىرى دەرىجىلىك ھەربىي ئەمەلدارلار ئۈچۈن تەزىيە بىلدۈرگەنىدى.
مەنفى ئىجتىمائىي تاراتقۇ سۇپىسى X تە ئېلان قىلغان باياناتىدا، بۇ پاجىئەنى «لىۋىيە ھەربىي قۇرۇلمىسى ۋە پۈتكۈل مىللەت ئۈچۈن ئېغىر يوقىتىش» دەپ باھالىدى.
ئۇ سۆزىدە مۇنداق دېدى: «لىۋىيە ھاياتىنى ۋەتەنگە خىزمەت قىلىشقا ئاتىغان، كەسكىن ۋەزىيەتتە مەسئۇلىيىتىنى ساداقەت بىلەن ئادا قىلغان، ۋەزىپىسىنى يۇقىرى ئىنتىزام ۋە پىداكارلىق روھى بىلەن ئىجرا قىلىپ، دۆلەت مەنپەئەتى، بىخەتەرلىكى ۋە مۇقىملىقىنى ھەممىدىن ئەلا بىلگەن مىللىي ھەربىي رەھبەرلىرىدىن ئايرىلىپ قالدى».
مەنفى سۆزىنىڭ ئاخىرىدا، قازا قىلغانلارنىڭ ئائىلىلىرىگە ۋە قوراللىق قىسىم ئەزالىرىغا ھېسداشلىق بىلدۈردى.
تۈركىيە ئىچكى ئىشلار مىنىستىرى ئەلى يەرلىكايا تېخىمۇ ئىلگىرى بەرگەن باياناتىدا، ئەلھەدداد ۋە ھەمراھلىرىنىڭ تىرابلۇسقا قاراپ يولغا چىققان «Falcon 50» تىپلىق ئايروپىلاننىڭ قالدۇقلىرىنىڭ ئەنقەرە ئەتراپىدىكى ھايمانا ناھىيەسىنىڭ جەنۇبىدىن تېپىلغانلىقىنى ئۇقتۇرغانىدى.
