ياۋروپا-ئوتتۇرا دېڭىز يەر تەۋرەش ئىلمى مەركىزى، ئافغانىستاننىڭ ھىندىكۇش رايونىدا مەيدانغا كەلگەن شىددەتلىك يەر تەۋرەشنىڭ پايتەخت كابىلدىن باشقا، قوشنا پاكىستان ۋە ھىندىستان باشقۇرۇشىدىكى كەشمىردىمۇ ھېس قىلىنغانلىقىنى ئېلان قىلدى.
پاكىستاننىڭ شىمالىدىكى خەيبەر پاختۇنخۋا ئۆلكىسىگە قاراشلىق سۋات رايونىدا ياشايدىغانلار، شەنبە كۈنى يۈز بەرگەن تەۋرىنىشتىن كېيىن كىشىلەرنىڭ قورقۇنچ ئىچىدە ئۆيلىرىدىن قېچىپ چىققانلىقىنى ئېيتتى.
پاكىستان مېتېئورولوگىيە ئىدارىسى يەر تەۋرەش مەركىزىنىڭ ئافغانىستاننىڭ ھىندىكۇش رايونى ئىكەنلىكىنى مەلۇم قىلدى.
يەر تەۋرەش پاكىستاننىڭ پايتەختى ئىسلاماباد بىلەن شەرقتىكى پەنجاپ ۋە ئافغانىستان چېگراسىدىكى خەيبەر پاختۇنخۋا ئۆلكىلىرىدىن باشقا، پاكىستان باشقۇرۇشىدىكى كەشمىردىمۇ ھېس قىلىندى.
دەسلەپكى ئېنىقلاشلارغا ئاساسلانغاندا، يەر تەۋرەشتە ئادەم ئۆلۈش ياكى يارىلىنىش ۋەقەسى كۆرۈلمىدى.
سۋاتتا ياشايدىغان بىر كىشى: «بۇ يەردە تەۋرىنىش ئىنتايىن شىددەتلىك بولدى ۋە بىر قەدەر ئۇزۇن داۋاملاشتى. كىشىلەر ئۆيلىرىدىن يۈگۈرۈپ چىقىشتى؛ ئاياللار ۋە بالىلارنىڭ ۋەھىمە ئىچىدە يىغلاپ كەتكەنلىكى كۆرۈلدى» دېدى.
ياۋروپا-ئوتتۇرا دېڭىز يەر تەۋرەش ئىلمى مەركىزى يەر تەۋرەشنى 6 بال، چوڭقۇرلۇقىنى بولسا 100 كىلومېتىر دەپ ئېلان قىلدى. ئامېرىكا گېئولوگىيەلىك تەتقىقات مەركىزى بولسا يەر تەۋرەشنىڭ 6.1 بال ئەتراپىدا بولغانلىقىنى ئۆلچىدى.
ياۋروپا-ئوتتۇرا دېڭىز يەر تەۋرەش ئىلمى مەركىزىنىڭ بىلدۈرۈشىچە، پاكىستاندا شەنبە كۈنى سەھەردە يەنە بىر قېتىم 5.4 بال يەر تەۋرەش مەيدانغا كەلگەن.
