ئىران مەسىلىسى بويىچە تەتقىقات ئېلىپ بېرىۋاتقان بىر كىشىلىك ھوقۇق تەشكىلاتى چارشەنبە كۈنى ئېلان قىلغان باياناتىدا، ئىراندا يۈز بەرگەن نارازىلىق نامايىشلىرىدا ھاياتىدىن ئايرىلغانلارنىڭ سانىنىڭ 38 گە يەتكەنلىكىنى بىلدۈردى.
ئامېرىكاغا جايلاشقان مەزكۇر تەشكىلاتنىڭ تور بېتىدە ئېلان قىلىنغان دوكلاتتا، نامايىشلارنىڭ پۈتۈن مەملىكەت مىقياسىدا داۋاملىشىۋاتقىنىغا 11 كۈن بولغانلىقى قەيت قىلىندى.
دوكلاتتا كۆرسىتىلىشىچە، نارازىلىق نامايىشلىرى 31 ۋىلايەتنىڭ ھەممىسىدە ئۆتكۈزۈلۈۋاتقان بولۇپ، نامايىشلاردا 34 نامايىشچى ۋە تۆت دۆلەت خەۋپسىزلىك كۈچى خادىمى ھاياتىدىن ئايرىلغان.
348 جايدا ئۆتكۈزۈلگەن نامايىشلاردا ئونلىغان كىشى يارىلانغان، 2 مىڭ 217 كىشى قولغا ئېلىنغان.
دائىرىلەر ھاياتىدىن ئايرىلغانلار ۋە يارىلانغانلار ھەققىدە تېخىچە ھېچقانداق بايانات ئېلان قىلمىدى.
ئامېرىكا پىرېزىدېنتى دونالد ترامپ جۈمە كۈنى ئەگەر تېھران نامايىشچىلارغا قارشى ئۆلۈم خەۋپى يارىتىدىغان كۈچ ئىشلەتسە، ۋاشىنگتوننىڭ نامايىشچىلارغا ياردەم بېرىدىغانلىقىنى جاكارلىدى. بۇ بايانات ئىراننىڭ يۇقىرى دەرىجىلىك ئەمەلدارلىرىنىڭ غەزىپىنى قوزغىدى.
ئىران يېقىنقى ھەپتىلەردە ئىقتىسادىي ئەھۋالنىڭ يامانلىشىپ كېتىشى ۋە رىيالنىڭ دوللارغا بولغان پېرېۋوت نىسبىتىنىڭ 1 مىليون 350 مىڭدىن ئېشىپ، قىممىتىنىڭ تېز سۈرەتتە تۆۋەنلەپ كېتىشى سەۋەبىدىن كەڭ كۆلەملىك نارازىلىق نامايىشلىرىغا سەھنە بولماقتا.
