ئۇكرائىنالىق بىر يۇقىرى دەرىجىلىك ئەمەلدار جۈمە كۈنى فىرانسىيە ئاخبارات ئاگېنتلىقى (AFP) غا بەرگەن باياناتىدا، ئۇكرائىنا سۆھبەت ۋەكىللىرىنىڭ ۋاشىنگتوننىڭ ئۇكرائىنادىكى ئۇرۇشنى ئاخىرلاشتۇرۇش پىلانىنى مۇزاكىرە قىلىش ئۈچۈن، بۇ ھەپتە ئاخىرى ئامېرىكا قوشما ئىشتاتلىرىنى زىيارەت قىلىشنى پىلانلاۋاتقانلىقىنى ئېيتتى.
مەسىلىنىڭ سەزگۈر بولۇشى سەۋەبىدىن ئىسمىنىڭ ئاشكارىلىنىشىنى خالىمىغان مەنبە: «ھەيئەتنىڭ بۇ ھەپتىنىڭ ئاخىرلىرى ئامېرىكا تەرەپ بىلەن كۆرۈشۈشى پىلانلانماقتا» دېدى.
Bloomberg News نىڭ خەۋىرىگە قارىغاندا، ھەيئەت يۇقىرى دەرىجىلىك خەۋپسىزلىك ئەمەلدارى رۇستەم ئۇمەروۋ ۋە تاشقى ئىشلار مىنىستىرلىقىنىڭ بىرىنچى مۇئاۋىن مىنىستىرى سېرگىي كىسلىتسيا قاتارلىقلاردىن تەشكىل تاپقان بولۇپ، ھەيئەتنىڭ ئامېرىكا ئالاھىدە ئەلچىسى ستېۋ ۋىتكوف ۋە ئاقساراي سابىق مەسلىھەتچىسى جارېد كۇشنېر بىلەن سۆھبەت ئۆتكۈزۈشى كۈتۈلمەكتە ئىكەن.
سۆھبەتلەرنىڭ فلورىدادا ئۆتكۈزۈلۈش ئېھتىماللىقى يۇقىرى ئىكەن
مەزكۇر ئەمەلدار، ئۇكرائىنا پىرېزىدېنتى ۋولودىمىر زېلېنسكىينىڭ سابىق باش مەسلىھەتچىسى ئاندىرى يېرماكنىڭمۇ دەسلەپتە سۆھبەتلەرگە قاتنىشىشىنىڭ پىلانلانغانلىقىنى، بىراق يېرماكنىڭ جۈمە كۈنى ۋەزىپىسىدىن ئېلىپ تاشلانغانلىقىنى بىلدۈردى.
