تۈركىيە تاشقى ئىشلار مىنىستىرلىقى خاقان فىداننىڭ پەيشەنبە كۈنى (2-ئۆكتەبىر) رەسمىي زىيارەتتە بولۇش ئۈچۈن ئەرەب بىرلەشمە خەلىپىلىكىگە بارىدىغانلىقىنى ئېلان قىلدى.
فدان ئەڭ ئاخىرقى قېتىم 5-ماي ئەرەب بىرلەشمە خەلىپىلىكىدە زىيارەتتە بولغان ۋە بۇ زىيارىتى جەريانىدا ئەرەب بىرلەشمە خەلىپىلىكى دۆلەت باشلىقى شەيخ مۇھەممەد بىن زەيىد ئال نەھيان تەرىپىدىن قوبۇل قىلىنغانىدى. فىدان يەنە تاشقى ئىشلار مىنىستىرى شەيخ ئابدۇللاھ بىن زەيىد ئال نەھيان بىلەنمۇ سۆھبەتلەشكەنىدى.
فداننىڭ بۇ زىيارىتى جەريانىدا تۈركىيەنىڭ ئەرەب بىرلەشمە خەلىپىلىكى بىلەن بولغان كۆپ تەرەپلىمىلىك ھەمكارلىقىنى تېخىمۇ تەرەققىي قىلدۇرۇش ئارزۇسىنى تەكىتلىشى مۆلچەرلەنمەكتە. تۈركىيە تاشقى ئىشلار مىنىستىرى يەنە رايون خاراكتېرلىك ئۆزگىرىشلەر ھەققىدە پىكىر ئالماشتۇرىدۇ ۋە دىققىتىنى بولۇپمۇ ئامېرىكا پىرېزىدېنتى دونالد ترامپنىڭ 29-سېنتەبىردە ئېلان قىلغان پىلانىدىن كېيىن غەززەدە ئۇرۇش توختىتىش ۋە تىنچلىقنى ئىشقا ئاشۇرۇش تىرىشچانلىقىغا مەركەزلەشتۈرىدۇ.
بۇنىڭدىن باشقا، فىداننىڭ ئۇرۇش سەۋەبىدىن زور دەرىجىدە ۋەيران بولغان سۈرىيەدە مۇقىملىق ۋە قايتا قۇرۇشنى ئىشقا ئاشۇرۇش مەقسىتىدە سۈرىيە ھۆكۈمىتىنى قوللاشنىڭ مۇھىملىقىنىمۇ تەكىتلىشى كۈتۈلمەكتە.
تۈركىيە بىلەن ئەرەب بىرلەشمە خەلىپىلىكى ئوتتۇرىسىدىكى ئىككى تەرەپلىك مۇناسىۋەتلەر يېقىنقى يىللاردا كۆرۈنەرلىك تەرەققىياتلارنى باشتىن كەچۈردى. جۇمھۇر رەئىس رەجەپ تاييىپ ئەردوغاننىڭ 2023-يىلى ئىيۇلدىكى ئەرەب بىرلەشمە خەلىپىلىكى زىيارىتى جەريانىدا، ئىككى دۆلەت «يۇقىرى دەرىجىلىك ئىستراتېگىيەلىك كېڭەش» قۇرۇش توغرىسىدا كېلىشىم ھاسىل قىلىپ، مۇناسىۋەتلەر ئىستراتېگىيەلىك شېرىكلىك سەۋىيەسىگە كۆتۈرۈلدى.
«يۇقىرى دەرىجىلىك ئىستراتېگىيەلىك كېڭەش» نىڭ تۇنجى نۆۋەتلىك يىغىنى 2025-يىلى 16-ئىيۇل ئەنقەرەدە ئۆتكۈزۈلگەن بولۇپ، يىغىنغا ئەردوغان بىلەن ئەرەب بىرلەشمە خەلىپىلىكىدىن شەيخ مۇھەممەد بىرلىكتە رىياسەتچىلىك قىلغانىدى.
ئەرەب بىرلەشمە خەلىپىلىكى تۈركىيەنىڭ پارس قولتۇقى رايونىدىكى ئەڭ چوڭ سودا شېرىكى ھېسابلىنىدۇ. ئىككى دۆلەت ئوتتۇرىسىدىكى سودا ھەجىمىنىڭ 2024-يىلى تەخمىنەن 16 مىليارد دوللارغا يېتىشى بىلەن ئۆزئارا ئىقتىسادىي مۇناسىۋەتلەر تېخىمۇ مۇستەھكەملەندى.
