چەت ئەللىك كىشىلىك ھوقۇق پائالىيەتچىلىرىنىڭ قايسى دۆلەت پۇقراسى ئىكەنلىكى ئاشكارىلانمىدى.
پەلەستىن زېمىنلىرىنى بېسىۋالغان ئىسرائىلىيەلىكلەرنىڭ، ئىشغالىيەت ئاستىدىكى ئىيوردان دەرياسىنىڭ غەربىي قىرغىقىغا قاراشلىق ئەبۇ فەللاھ يېزىسىغا قىلغان ھۇجۇمىدا 2 پەلەستىنلىك بىلەن بەزى چەت ئەللىك كىشىلىك ھوقۇق پائالىيەتچىلىرى يارىلاندى.
يەرلىك مەنبەلەرنىڭ بىلدۈرۈشىچە، پەلەستىن زېمىنلىرىنى بېسىۋالغان ئونلارچە ئىسرائىلىيەلىك، راماللاھ شەھىرىنىڭ شىمالىي قىسمىدىكى ئەبۇ فەللاھ يېزىسىدا دېھقانچىلىق بىلەن شۇغۇللىنىدىغان ۋە تېرىلغۇ يەرلىرىگە بارماقچى بولغان پەلەستىنلىكلەرگە ھۇجۇم قىلغان.
پەلەستىنلىكلەرگە قىلىنغان ھۇجۇملارغا نارازىلىق بىلدۈرۈش ئۈچۈن رايوندا تۇرۇۋاتقان چەت ئەللىك كىشىلىك ھوقۇق پائالىيەتچىلىرىمۇ ئىشغالچى ئىسرائىلىيەلىكلەرنىڭ نىشانىغا ئايلانغان.
ئىسرائىلىيەلىك ھۇجۇمچىلارنىڭ ياش ئاققۇزۇش بومبىسى ئىشلىتىشى ۋە تاياق-توقماق بىلەن ھۇجۇم قىلىشى نەتىجىسىدە 2 پەلەستىنلىك ۋە بەزى چەت ئەللىك كىشىلىك ھوقۇق پائالىيەتچىلىرى يارىلانغان.
يارىلانغانلارنىڭ ئېنىق سانى ھەققىدە مەلۇمات بېرىلمىدى، چەت ئەللىك كىشىلىك ھوقۇق پائالىيەتچىلىرىنىڭ قايسى دۆلەت پۇقراسى ئىكەنلىكىمۇ تىلغا ئېلىنمىدى.
ئىسرائىلىيە ئارمىيەسى بىلەن پەلەستىن زېمىنلىرىنى بېسىۋالغان ئىسرائىلىيەلىكلەر، ئىيوردان دەرياسىنىڭ غەربىي قىرغىقىنىڭ ھەرقايسى رايونلىرىغا پات-پات بېسىپ كىرىپ تۇرىدۇ. بۇ ھۇجۇملار دائىم ئۆلۈم، يارىلىنىش، قولغا ئېلىش، مال-مۈلۈكلەرگە زىيان يەتكۈزۈش، زىرائەت ۋە چارۋىلارغا زىيان سېلىش بىلەن ئاخىرلىشىدۇ.
