ئىران تاشقى ئىشلار مىنىستىرى ئابباس ئاراكچى پىرېزىدېنت مەسئۇد پېزېشكىياننىڭ تەكلىپنامە تاپشۇرۇۋالغانلىقىنى، ئەمما مىسىردىكى غەززە باشلىقلار يىغىنىغا قاتناشمايدىغانلىقىنى ئېلان قىلدى.
دۆلەت ئاخبارات ئاگېنتلىقى IRNA، مىسىرنىڭ ئىراننى دۈشەنبە كۈنى قىزىل دېڭىز ساھىل شەھىرى شارم ئەل-شەيختە ئۆتكۈزۈلىدىغان باشلىقلار يىغىنىغا قاتنىشىشقا تەكلىپ قىلغانلىقىنى خەۋەر قىلدى.
بىراق، دۈشەنبە كۈنى ئەتىگەندە X سەھىپىسىدە ھەمبەھىرلىگەن تاشقى ئىشلار مىنىستىرى ئاراكچى، باشلىقلار يىغىنىدىكى ئورتاق رىياسەتچى ئامېرىكا قوشما ئىشتاتلىرىنى كۆرسىتىپ مۇنداق دېدى: «پىرېزىدېنت پېزېشكىيانمۇ، بىزمۇ ئىران خەلقىگە ھۇجۇم قىلغان، تەھدىت سالغان ۋە ئېمبارگو يۈرگۈزۈشنى داۋاملاشتۇرۇۋاتقان مۇناسىۋەتلىك تەرەپلەر بىلەن بىر يەرگە جەم بولالمايمىز».
ۋاشىنگتون، ئىيۇن ئېيىدا ئىران بىلەن ئىسرائىلىيە ئوتتۇرىسىدىكى 12 كۈنلۈك ئۇرۇشقا ئىسرائىلىيەنى قوللاپ ئارىلىشىپ، بومباردىمان قىلىشقا ھەسسە قوشقان ئىدى.
مىنىستىر، شۇنداقتىمۇ تېھراننىڭ «غەززەدىكى ئىسرائىلىيە ئىرقىي قىرغىنچىلىقىنى ئاخىرلاشتۇرۇش» ۋە پەلەستىنلىكلەرنىڭ ئۆز تەقدىرىنى ئۆزى بەلگىلەش ھوقۇقىنى قوغداش ئۈچۈن ھەر تۈرلۈك تەشەببۇسلارنى قوللايدىغانلىقىنى بىلدۈردى.
ئىران، ئىسرائىلىيەنى ئېتىراپ قىلمايدۇ ۋە 1979-يىلى ئامېرىكا قوللىغان ئىران شاھىنى ئاغدۇرۇپ تاشلىغان ئىنقىلابتىن بۇيان پەلەستىن دەۋاسىنى تاشقى سىياسىتىنىڭ ئۇل تېشى قىلىپ كەلمەكتە.
ئامېرىكا قوشما ئىشتاتلىرى پىرېزىدېنتى دونالد ترامپ ۋە مىسىر پىرېزىدېنتى ئابدۇلفەتتاھ سىسىنىڭ ئورتاق رىياسەتچىلىكىدىكى غەززە باشلىقلار يىغىنى ئۇرۇش توختىتىشنى مۇستەھكەملەش ۋە ئۇرۇشتىن كېيىنكى سىياسىي رامكا سىزىشنى مەقسەت قىلىدۇ.
باشلىقلار يىغىنىغا يىگىرمىدىن ئارتۇق دۆلەتنىڭ رەھبەرلىرىنىڭ قاتنىشىشى كۈتۈلمەكتە.
