تۈركىيەنىڭ ب د ت دىكى ۋەكىلى ئەھمەد يىلدىز ئىسرائىلىيەنىڭ بىر تەرەپلىمە قەدەملىرىنىڭ ئىشغال ئاستىدىكى غەربىي قىرغاقتىكى قانۇنسىز مەۋجۇتلۇقىنى مۇستەھكەملەشنى مەقسەت قىلىدىغانلىقىنى بىلدۈردى. ئۇ غەززەدە ئۇرۇش توختىتىش كېلىشىمىنى تولۇق ئەمەلىيلەشتۈرۈش ۋە ئىسرائىلىيەنىڭ غەززەدىن پۈتۈنلەي چېكىنىپ چىقىشىنى تەلەپ قىلدى.
چارشەنبە كۈنى پەلەستىندىكى ۋەزىيەتكە ئالاقىدار ب د ت خەۋپسىزلىك كېڭىشىنىڭ يىغىنىدا سۆز قىلغان ئەھمەد يىلدىز، ھەممەيلەننىڭ دىققىتى غەززەدىكى نازۇك ۋەزىيەتكە مەركەزلەشكەن بىر پەيتتە، «ئىشغالچى كۈچنىڭ غەربىي قىرغاقتىكى قانۇنسىز مەۋجۇتلۇقىنى كۈچەيتىشنى نىشان قىلغان بىر تەرەپلىمە قەدەملىرىنى داۋاملاشتۇرۇۋاتقانلىقى»نى ئەسكەرتتى. يىلدىز سۆزىدە: «تۈركىيە 2803-نومۇرلۇق خەۋپسىزلىك كېڭىشى قارارى ۋە ئامېرىكا پىرېزىدېنتى دونالد ترامپنىڭ 20 ماددىلىق پىلانىنى ئۆز ئىچىگە ئالغان ئۇرۇش توختىتىش بەلگىلىمىلىرىنىڭ تولۇق ئىجرا قىلىنىشىنى تەلەپ قىلىدۇ» دېدى.
ئۇرۇش توختىتىشنى داۋاملاشتۇرۇشنىڭ تېخىمۇ كۆپ ئۆلۈم-يېتىمنىڭ ئالدىنى ئېلىش، ئىنسانپەرۋەرلىك ياردەملەرنى يەتكۈزۈش ۋە ئەھمىيەتلىك سىياسىي سۆھبەتكە پۇرسەت يارىتىش ئۈچۈن ھاياتىي ئەھمىيەتكە ئىگە ئىكەنلىكىنى تەكىتلىگەن يىلدىز، تەكرارلىنىۋاتقان ھۇجۇملارنى ۋە ياردەملەرگە قويۇلغان چەكلىمىلەرنى ئەيىبلەيدىغانلىقىنى، غەززەگە كىرىدىغان ياردەم مىقدارىنىڭ كۆرۈنەرلىك ئاشۇرۇلۇشى ۋە توسالغۇسىز يېتىپ بېرىشى كېرەكلىكىنى تىلغا ئالدى.
يىلدىز غەززەنى قايتا قۇرۇش مۇساپىسىنى باشلاش ئۈچۈن ئىسرائىلىيەنىڭ ئۇ يەردىن تولۇق چېكىنىشىنىڭ زۆرۈرلۈكىنى تەكىتلەپ، تۈركىيەنىڭ قايتا قۇرۇش خىزمەتلىرىدە ئاكتىپ رول ئېلىشقا تەييار ئىكەنلىكىنى بىلدۈردى. ئىشغال ئاستىدىكى غەربىي قىرغاق مەسىلىسىدە بولسا، ئەنقەرەنىڭ ئىسرائىلىيەنىڭ زېمىننى ئۆزىگە قوشۇۋېلىش سىياسىتىگە قەتئىي قارشى ئىكەنلىكىنى تەكرارلىغان يىلدىز، ئىسرائىلىيەنىڭ بۇ خىل بىر تەرەپلىمە تەدبىرلىرىگە «خەلقئارا قانۇننىڭ ئېغىر دەرىجىدە دەپسەندە قىلىنىشى» دەپ باھا بەردى.
يىلدىز خەلقئارا جەمئىيەت ۋە خەۋپسىزلىك كېڭىشىنى مەسئۇلىيەتنى ئادا قىلىشقا چاقىرىپ: «كېڭەش ئىسرائىلىيەنى غەربىي قىرغاقتىكى جىددىيچىلىكنى ئەۋج ئالدۇرۇشتىن ۋاز كېچىشكە، ئۇرۇش توختىتىش بەلگىلىمىلىرىنى تولۇق ئىجرا قىلىشقا ۋە قانۇنسىز ئىشغالىيىتىگە خاتىمە بېرىشكە مەجبۇرلىشى كېرەك... غەززەدىكى ئۇرۇش توختىتىشتىن كېيىن بارلىققا كەلگەن پۇرسەت ئىككى دۆلەتلىك ھەل قىلىش چارىسىنى ئەمەلىيلەشتۈرۈشكە ئايلاندۇرۇلۇشى كېرەك. تۈركىيە بۇ تىرىشچانلىقلاردا ئىجابىي ۋە ئىشەنچلىك شېرىك سۈپىتىدە ھەرىكەت قىلىشنى داۋاملاشتۇرىدۇ» دېگەنلەرنى قەيت قىلدى.
