ئىسرائىلىيەنىڭ ئاشقۇن ئوڭچىل ئىچكى بىخەتەرلىك ئىشلىرى مىنىستىرى ئىتامار بېن-گۋىر، ئىسرائىلىيە تۈرمىسىدىكى پەلەستىنلىك ئايال تۇتقۇنلار تۇرۇۋاتقان كامېرغا باستۇرۇپ كىرگەن دەقىقىلىرىنىڭ ۋىدېيو كۆرۈنۈشلىرىنى ئاممىۋى ئورتاقلىشىش تور بېتىدىكى سەھىپىسىدە ھەمبەھىرلىدى.

ۋىدېيودا پەلەستىنلىك بىر ئايال تۇتقۇننىڭ تۈرمە شارائىتىنىڭ ئىنتايىن ناچارلىقىنى، ئەڭ ئاساسلىق شەخسىي ئېھتىياجلاردىنمۇ مەھرۇم قالغانلىقىنى بايان قىلىپ: «ئۈچ كۈن بولدى يۇيۇنالمىدۇق. كىيىملىرىمىز پاكىز ئەمەس، شارائىت ئىنتايىن ناچار» دېگەنلىكى ئاڭلىنىدۇ.

بېن-گۋىر بولسا تۇتقۇنلارغاجاۋابەن: «تۈرمىدىكى ياخشى كۈنلىرىڭلار تۈگىدى. ئەمدى ۋەزىيەت ئەنە شۇنداق. بۇلارغا ئاساسلىق مەسئۇل كىشى مەن ۋە مەن بۇنىڭدىن مەمنۇن» دەپ مەسخىرە قىلدى. ئۇ يەنە شارائىتنى ياخشىلاشنى تەلەپ قىلغان ئايال تۇتقۇنغا: «سىلەرگە نېمە ئۈچۈن ياردەم قىلىشىم كېرەك؟» دەپ مەسخىرە قىلدى.

بېن-گۋىر ئىچكى بىخەتەرلىك ئىشلىرى مىنىستىرى ۋەزىپىسىگە تەيىنلەنگەندىن بۇيان، ئىسرائىلىيە تۈرمىلىرىدىكى پەلەستىنلىك تۇتقۇنلارنىڭ كىشىلىك ھوقۇق دەپسەندىچىلىكلىرى بارغانسېرى ئېغىرلاشماقتا. ئىسرائىلىيەلىك بۇ مىنىستىر بۇنىڭدىن ئىلگىرىمۇ تۇتقۇنلارنى كۆپ قېتىم ھاقارەتلىگەن بولۇپ، شارائىتنى ياخشىلاشنى تەلەپ قىلغان بىر ئايال تۇتقۇنغا: «بۇ يەر مېھمانخانا ئەمەس» دېگەن ئىدى.

پەلەستىن ۋە خەلقئارالىق كىشىلىك ھوقۇق تەشكىلاتلىرىنىڭ مەلۇماتىغا قارىغاندا، ئىسرائىلىيە تۈرمىلىرىدە 350ى بالا، 94ى ئايال بولۇپ، جەمئىي 9 مىڭ 500 دىن ئارتۇق پەلەستىنلىك تۇتقۇن ياتماقتا. ئاچلىق، قىيناش ۋە داۋالاشقا سەل قاراش قاتارلىق ئېغىر شارائىتقا دۇچ كەلگەن ئونلىغان پەلەستىنلىك، ئىسرائىلىيە تۈرمىلىرىدىكى ناچار مۇئامىلە سەۋەبىدىن ھاياتىدىن ئايرىلدى.