ئىران پىرېزىدېنتى مەسئۇد پەزەشكىيان بىرلەشكەن دۆلەتلەر تەشكىلاتى (ب د ت)نىڭ 81-نۆۋەتلىك ئومۇمىي كېڭەش يىغىنىغا قاتنىشىش ئۈچۈن بارغان نىيۇيوركتا ئامېرىكا فوكس خەۋەرلىرى (Fox News) قانىلىنىڭ زىيارىتىنى قوبۇل قىلدى.
ئۇ ئىراننىڭ ئۇرۇش ياكى كېلىشىمدىن قايسىنى تاللايدىغانلىقى ھەققىدىكى سوئالغا: «بىز ئۇرۇشنى تاللىمايمىز، ئۇرۇش بىزگە تېڭىلدى، بىز ئۇرۇش قىلىش كويىدا ئەمەس» دەپ جاۋاب بەردى. پەزەشكىيان ھورمۇز بوغۇزىدىكى ئىختىلاپلار سەۋەبىدىن بىكار قىلىنغان، ئەمما ئەسلىدە 60 كۈن ئىچىدە ئاخىرقى تىنچلىق كېلىشىمى ئىمزالاشنى مەقسەت قىلغان ئىيۇندىكى ئەھدىنامىنى تىلغا ئېلىپ، تېھراننىڭ ۋاشىنگتون بىلەن كېلىشىم تۈزۈش يۆنىلىشىدە ئىلگىرىلەشنى خالايدىغانلىقىنى تەكىتلىدى.
ئىككى دۆلەت ئوتتۇرىسىدىكى جىددىيچىلىك داۋاملىشىۋاتقان بىر پەيتتە مۆتىدىل پوزىتسىيە بىلدۈرگەن پەزەشكىيان مۇنداق دېدى: «سىلەرنىڭ پىرېزىدېنتىڭلار (دونالد ترامپ) بىلەن بىر كېلىشىمگە كەلگەن ئىدۇق. شۇنىڭغا ئاساسەن ئىلگىرىلەشنى خالايمىز ۋە ھېلىھەم شۇنى ئارزۇ قىلىمىز.» ئۇ يەنە ئامېرىكانىڭ 28-فېۋرالدىن بۇيان داۋاملىشىۋاتقان ئۇرۇشنى ئاخىرلاشتۇرۇش ياكى ئاخىرلاشتۇرماسلىقتىن ئىبارەت ئىككى ئىشنىڭ بىرىنى تاللىشى كېرەكلىكىنى ئېيتتى.
ئۇ ئىراننىڭ خەلقئارا قانۇن ۋە يادرو قوراللىرىنى كېڭەيتمەسلىك شەرتنامىسى (NPT) دائىرىسىدىكى مەجبۇرىيەتلىرىگە ئەمەل قىلىدىغانلىقىنى بىلدۈرۈپ، يەمەندىكى ھۇسىيلار توغرىسىدا: «ھۇسىيلار ئۆز ھەرىكىتىگە ئۆزلىرى مەسئۇل بولىدۇ. ئۇلار بىزدىن بۇيرۇق ئالمايدۇ» دېدى.
شۇنداقلا، ھايات ياكى ئەمەسلىكى قىزىقىش قوزغاپ كېلىۋاتقان ئىران رەھبىرى مۇجتەبا ھامانېي بىلەن تەخمىنەن بىر ئاي ئىلگىرى يۈزتۇرا كۆرۈشكەنلىكىنى، بىللە يەتتە سائەتتەك ۋاقىت ئۆتكۈزگەنلىكىنى ۋە ئۇنىڭ سالامەتلىكىنىڭ «ئىنتايىن ياخشى» ئىكەنلىكىنى سۆزلىرىگە ئىلاۋە قىلدى.
