يەر تەۋرەشتىن كېيىن داككا ئاھالىلىرى كوچىلارغا ئۆزىنى ئاتتى. يەر تەۋرەشنىڭ مەركىزى پايتەخت داككانىڭ شەرقىي شىمالى ئىكەنلىكى بىلدۈرۈلدى.
بىر ساقچى پونكىتى ئەمەلدارىنىڭ باياناتىغا قارىغاندا، جۈمە كۈنى باڭلادىشتا يۈز بەرگەن 5.7 بال چوڭلۇقىدىكى يەر تەۋرەش پايتەخت داككادا كەم دېگەندە ئۈچ كىشىنىڭ جېنىغا زامىن بولغان.
بۇ ئۈچ كىشى داككادىكى باڭشال رايونىدا بەش قەۋەتلىك بىر بىنانىڭ رېشاتكىلىرىنىڭ ئۆرۈلۈپ چۈشۈشى نەتىجىسىدە ھاياتىدىن ئايرىلغان.
باڭشال ساقچى پونكىتىدا ۋەزىپە ئۆتەۋاتقان ساقچى ئوفىتسېرى ئاشىش بوزې ئانادولۇ ئاگېنتلىقىغا بەرگەن باياناتىدا، ۋەقەدە ئۈچ كىشىنىڭ ھاياتىدىن ئايرىلغانلىقىنى دەلىللىدى.
يەرلىك ئوت ئۆچۈرۈش ئىدارىسى داككا ئىچى - سىرتىدا يەر تەۋرەش تەسىر كۆرسەتكەن ياكى زىيان سالغان يەتتە بىنانىڭ ئېنىقلاپ چىقىلغانلىقىنى، كەم دېگەندە بىر كىشىنىڭ يارىلانغانلىقىنى بىلدۈردى.
يەر تەۋرەش شۇ جاي ۋاقتى سائەت 10:38 دە يۈز بەرگەن بولۇپ، باڭلادىش مېتېئورولوگىيە ئىدارىسىنىڭ بىلدۈرۈشىچە، مەركىزى پايتەخت داككانىڭ تەخمىنەن 50 كىلومېتىر شەرقىي شىمالىي تەرىپىدىكى نارسلىڭدى رايونى ئىكەن.
يەر تەۋرەش پەقەت بىر نەچچە سېكۇنت داۋاملاشقان بولسىمۇ، تەۋرىنىش سەۋەبىدىن داككا ئاھالىلىرى بىنالاردىن ۋە ئۆيلەردىن ئۆزىنى سىرتقا ئېتىپ، كوچىلاردا بىخەتەر جاي تېپىشقا تىرىشقان.
