پ ك ك تېررورلۇق تەشكىلاتىنىڭ ئەزالىرى ئەنقەرەنىڭ «تېررورسىز تۈركىيە» نىشانىغا ئاساسەن، جۈمە كۈنى ئىراقنىڭ سۇلەيمەنىيە ۋىلايىتىدە قورال تاشلاشقا باشلىدى.

تۈركىيە دۆلەت خەۋپسىزلىك كۈچلىرىنىڭ كەسكىن ۋە ئۈنۈملۈك تېررورىزمغا قارشى كۈرەش ھەرىكىتىدىن كېيىن، پ ك ك ماي ئېيىدا ئۆزىنى تارقىتىدىغانلىقىنى ۋە قورال تاشلايدىغانلىقىنى جاكارلىغانىدى. بۇ، تۈركىيەنىڭ تېررورىزمغا قارشى نەچچە ئون يىللىق كۈرىشىدىكى مۇھىم بىر بۇرۇلۇش نۇقتىسى دەپ قارالماقتا.

تېررورىزمغا قارشى كۈرىشىنى دىپلوماتىيە ساھەسىگىمۇ كېڭەيتكەن تۈركىيە دۆلىتىنىڭ، بولۇپمۇ ياۋروپا ۋە ئوتتۇرا شەرقتىكى خەلقئارا ھەمكارلاشقۇچىلىرىغا قاراتقان نەچچە يىل داۋاملاشقان مۇقىم بېسىمىنىڭ نەتىجىسى كۆرۈلدى. پ ك ك نىڭ چەت ئەل پايتەختلىرىدە ئەركىن پائالىيەت ئېلىپ بېرىش، پۇل يۇيۇش ۋە ھەر خىل سىياسىي نىقابلار ئاستىدا مەبلەغ توپلاش ئىقتىدارى كۆرۈنەرلىك دەرىجىدە ئاجىزلاشتۇرۇلدى. تۈركىيەنىڭ گېئوسىياسىي تەسىرىنىڭ زورىيىشىمۇ دۆلەتنىڭ ئەندىشىلىرىنىڭ يەر شارى خاراكتېرلىك كۈچلەر تەرىپىدىن تېخىمۇ ئەستايىدىل مۇئامىلە قىلىنىشىغا زېمىن ھازىرلاپ بەردى.

ئەنقەرە ئىقتىسادىي مۇناسىۋەتلەر، ئېنېرگىيە دىپلوماتىيەسى ۋە رايونلۇق ھەمكارلىقلار ئارقىلىق پ ك ك نىڭ چەت ئەلدىكى قوللاش تورلىرىنى تەدرىجىي ئاجىزلاشتۇردى.

ئادالەت ۋە تەرەققىيات پارتىيەسى باياناتچىسى ئۆمەر چەلىك چارشەنبە كۈنى كېچىسى  ئېلان قىلغان  باياناتىدا،  قورال تاپشۇرۇش جەريانىنىڭ قىسقا ۋاقىت ئىچىدە تاماملىنىشى كېرەكلىكىنى بىلدۈردى.

ئۆمەر چەلىك «‹NTV› تېلېۋىزىيە قانىلى» نىڭ زىيارىتىنى قوبۇل قىلغاندا بەرگەن باياناتىدا، تۈركىيە مىللىي ئىستىخبارات ئىدارىسى ۋە تۈركىيە قوراللىق قىسىملىرىدىن تەشكىل تاپقان مېخانىزىمنىڭ قورالسىزلىنىش جەريانىنى كۆزىتىدىغانلىقىنى ئەسكەرتىپ مۇنداق دېدى:

«(ئىراقتا) قورال تاشلاش جەريانى 3-5 ئايدىن ئېشىپ كەتسە، بۇ جەريان ئىغۋاگەرچىلىككە ئوچۇق ھالەتكە كېلىپ قالىدۇ.»

 تۈركىيە ئۇدا 40 يىلدىن ئارتۇق ۋاقىتتىن بۇيان، پۇقرالار ۋە تۈركىيە دۆلەت خەۋپسىزلىك كۈچلىرىنى نىشان قىلغان ھۇجۇملىرى داۋامىدا 40 مىڭدىن ئارتۇق كىشىنىڭ ھاياتىدىن ئايرىلىشىنى كەلتۈرۈپ چىقارغان پ ك ك غا قارشى ئىزچىل كۈرەش قىلىپ كەلمەكتە.