تېھران ئاھالىلىرى ترامپنىڭ ئەڭ ئاخىرقى تەھدىتلىرىدىن كېيىن ئېنىقسىزلىققا تەييارلىق قىلماقتا

زەھرا ئارغاۋان ۋە مەھدى ئالىشىر تېھران ئۈستىدىن پېتىۋاتقان كۈننى كۆزىتىپ، ھاۋا ھۇجۇملىرىنىڭ ئاۋازلىرىغا تەييارلىنىپ بالكونلىرىدا تۇراتتى.

ئامېرىكا پىرېزىدېنتى دونالد ترامپنىڭ ئەڭ ئاخىرقى ئۇلتىماتۇمىنىڭ مۇددىتى توشۇشقا ئاز قالغان بىر پەيتتە، ئۇلارنىڭ ئوي - پىكرىنى يېڭى قورقۇنچلار قاپلىۋالغان ئىدى: ئەگەر ئەسلىھەلەر بومباردىمان قىلىنسا، توك قانچىلىك ۋاقىت ئۈزۈلۈپ قالىدۇ؟ ئەگەر كۆۋرۈكلەر ۋەيران بولسا، ئۇلار شەھەردىن قانداق چىقىپ كېتىدۇ؟

بەش ھەپتىدىن كېيىن، ئۇلار ئامېرىكا ۋە ئىسرائىلىيە ئۇرۇش ئايروپىلانلىرىنىڭ غۇڭۇلداشلىرىغا، پارتلاش ئاۋازلىرىغا ۋە ئۇيقۇسىز كېچىلەرگە كۆنۈپ قالدى. نۇرغۇن كىشىلەرگە ئوخشاش ئۇلارمۇ پايتەختتىن ئايرىلغان، ئەمما ئامانلىق ئىزدەپ يەنە قايتىپ كەلگەن ئىدى. توي قىلغىنىغا ئون يىلدىن ئاشقان بۇ ئەر-خوتۇن «كوۋىد-19» يۇقۇمىنى ۋە ئالدىنقى يىلى ئىيۇن ئېيىدا يۈز بەرگەن 12 كۈنلۈك ئۇرۇشنى باشتىن كەچۈرگەن ئىدى.

ئۇلار پارتلاشقا قارىتا تەدبىر سۈپىتىدە دېرىزىلىرىنىڭ گىرۋەكلىرىگە سۈزۈك لېنتا چاپلىدى. ئەينەكلەر ۋە نازۇك بۇيۇملار يا يۆتكىۋېتىلدى ياكى مۇقىملاشتۇرۇلدى. زۆرۈر تېپىلغاندا ئايرىلىشقا توغرا كەلسە ئىشلىتىش ئۈچۈن ھۆججەتلەر، دورىلار ۋە ئەڭ زۆرۈر ئېھتىياجلىق بۇيۇملار قاچىلانغان بىر سومكا تەييار ھالەتتا تۇرماقتا.

ھەپتە ئاخىرىدا ھاقارەت ئارىلاش تەھدىت سالغان ترامپ: «سەيشەنبە ئېلېكتىر ئىستانسىسى كۈنى ۋە كۆۋرۈك كۈنى بولىدۇ» دەپ قەسەم ئىچتى ۋە ئىران رەھبەرلىرى ھورمۇز بوغۇزىنى ئاچمىسا «دوزاختا ياشايدىغانلىقى» نى ئېيتتى.

ئارغاۋان: «راستىنى ئېيتقاندا، ۋەزىيەت ھەقىقەتەن ئېنىقسىز، توكنىڭ قانچىلىك ۋاقىت ئۈزۈلۈپ قالىدىغانلىقىنى ياكى توكسىز تۇرمۇشنىڭ قانداق بولىدىغانلىقىنى تېخى تولۇق تەسەۋۋۇر قىلالمايمىز» دېدى.

ئالىشىر ئۆزى ۋە ئايالىنىڭ توك  ۋە سۇ بولمىغان ئەھۋالدا ئەڭ كۆپ بولغاندا بىر ھەپتە بەرداشلىق بېرەلەيدىغانلىقىنى ئېيتتى. ئۇ: «ئەگەر تېخىمۇ ئۇزۇن داۋاملاشسا، چوقۇم چاتاق چىقىدۇ» دېدى.

ئۇلارنىڭ مەسىلىلىرى 28-فېۋرالدا ئامېرىكا ۋە ئىسرائىلىيەنىڭ تۇنجى قېتىم ئىراننى بومباردىمان قىلىشىدىن خېلى بۇرۇنلا باشلانغان ئىدى.

ئىران ھۆكۈمىتىنىڭ يانۋار ئېيىدىكى پۈتۈن مەملىكەت مىقياسىدىكى نامايىشلارنى قاتتىق باستۇرۇشىدىن كېيىن تورغا كىرىش قاتتىق چەكلەندى. تورنى كۆزىتىش ئورگىنى NetBlocks نىڭ بىلدۈرۈشىچە، بۇ، ئىران تارىخىدىكى ئەڭ ئۇزۇن تور ئۈزۈلۈپ قېلىش ۋەقەسى ھېسابلىنىدىكەن.

ئارغاۋان ئىرانلىقلارغا فىرانسۇز تىلى ئۆگىتىدىغان كىچىك بىر تىل كۇرسىنى باشقۇرىدۇ.

ئۇ: «مەكتىپىمىز ئاساسەن تور مەكتىپى ئىدى، ئوقۇغۇچىلىرىمىز چەت ئەلدىكى بالىلار بىلەن بىرلىكتە تىل ئۆگىنەتتى، ئوقۇغۇچىلىرىمىزنىڭ تەخمىنەن %50 ى چەت ئەللەردە ياشايتتى. ئەمما ھازىر تور ئۈزۈلۈپ قېلىش سەۋەبىدىن ئىشلىرىمىز ھەقىقەتەن ئاقساپ قالدى» دېدى.

بۇ ئەر-خوتۇن ئۇرۇشنىڭ باشلىنىشىغا ئىسرائىلىيە ۋە ئامېرىكا سەۋەبچى دەپ قاراپ بۇ ئىككى دۆلەتنى ئەيىبلىمەكتە ھەمدە دىپلوماتىك بىر ھەل قىلىش چارىسى تېپىلىشىنى ئۈمىد قىلماقتا.

ئارغاۋان: «پات ئارىدا بىر كېلىشىم ھاسىل قىلىنىشىنى ۋە بۇنىڭ كىشىلەرگە پايدىسى بولۇشىنى ئۈمىد قىلىمىز، چۈنكى ھازىر بۇنىڭ ئۈچۈن ئەڭ ئېغىر بەدەل تۆلەۋاتقانلار يەنىلا ئاددىي خەلقتۇر» دېدى.