نىيۇيورك شەھەر باشلىقى زوھران مامدانى، دۆلەت رەئىسى نىكولاس مادۇرو ۋە رەپىقىسى سىلىيە فلورېسنىڭ كېچىدە ئېلىپ بېرىلغان ھەرىكەت بىلەن تۇتقۇن قىلىنىشىدىن كېيىن، ۋېنېزۇئېلادىكى «ھاكىمىيەت ئالماشتۇرۇشقا ئۇرۇنۇش» دەپ سۈپەتلىگەن بۇ قەدەمدىن يېنىش ئۈچۈن ئامېرىكا پىرېزىدېنتى دونالد ترامپقا «بىۋاسىتە» تېلېفون قىلغانلىقىنى ئېيتتى.
شەنبە كۈنى ئۆتكۈزۈلگەن ئاخبارات ئېلان قىلىش يىغىنىدا سۆز قىلغان مامدانى: «بۇ ھەرىكەتكە قارشى ئىكەنلىكىمنى بىلدۈرۈپ قويۇش ئۈچۈن پىرېزىدېنتقا تېلېفون قىلدىم ۋە ئۇنىڭ بىلەن بىۋاسىتە سۆزلەشتىم» دېدى.
ئۆزىنىڭ قارشى تۇرۇشىنىڭ «ھاكىمىيەت ئالماشتۇرۇشقا ئۇرۇنۇش» قا ھەمدە فېدېراتسىيە ۋە خەلقئارا قانۇننىڭ ئىزچىل قوغدىلىشى كېرەكلىكىگە ئىشىنىدىغان پىرىنسىپلىرىغا ئاساسلىنىدىغانلىقىنى بىلدۈرگەن مامدانى، مەزكۇر قەدەملەرنىڭ قانۇنغا خىلاپ ئىكەنلىكىنى ئىلگىرى سۈردى.
مامدانى ئەتىگەندە ئېلان قىلغان باياناتىدىمۇ مادۇرو ۋە رەپىقىسىنىڭ قولغا ئېلىنىشىغا سەۋەب بولغان ئامېرىكا ھەربىي ھەرىكىتىنى «بىر ئۇرۇش ھەرىكىتى» ۋە «ئوچۇق- ئاشكارە ھاكىمىيەت ئالماشتۇرۇش ئۇرۇنۇشى» دەپ ئاتىغان ئىدى.
مامدانى X سۇپىسىدا ھەمبەھىرلىگەن باياناتىدا، ئامېرىكانىڭ ھەرىكىتى ھەمدە مادۇرو بىلەن رەپىقىسى سىلىيە فلورېسنىڭ نىيۇيوركتا فېدېراتسىيە نازارىتى ئاستىدا تۇتۇپ تۇرۇلۇشىغا مۇناسىۋەتلىك پىلانلار ھەققىدە ئۇچۇر بېرىلگەنلىكىنى قەيت قىلدى.
«ئىگىلىك ھوقۇقى بولغان بىر دۆلەتكە بىر تەرەپلىمە ھۇجۇم قىلىش، بىر ئۇرۇش ھەرىكىتىدۇر ھەمدە فېدېراتسىيە ۋە خەلقئارا قانۇنغا خىلاپتۇر» دېگەن مامدانى، ئامېرىكا تاشقى سىياسىتىدە خەتەرلىك بىر ۋەزىيەتنىڭ كۈچىيىۋاتقانلىقى ھەققىدە ئاگاھلاندۇرۇش بەردى.
ھەربىي ھەرىكەتنىڭ نەتىجىسىنىڭ پەقەت ۋېنېزۇئېلا بىلەنلا چەكلىنىپ قالمايدىغانلىقىنى تەكىتلىگەن مامدانى، بۇنىڭ نىيۇيوركتا ياشايدىغان ئون مىڭلىغان ۋېنېزۇئېلالىققا بىۋاسىتە تەسىر كۆرسىتىدىغانلىقىنى ئېيتتى.
«مېنىڭ ئالدىنقى نىشانىم ئۇلارنىڭ ۋە ھەر بىر نىيۇيوركلۇقنىڭ بىخەتەرلىكى» دېگەن مامدانى، ھۆكۈمىتىنىڭ ئۆزگىرىشلەرنى يېقىندىن كۆزىتىدىغانلىقىنى ۋە زۆرۈر تېپىلغاندا يېتەكچىلىك قىلىدىغانلىقىنى ئىپادىلىدى.
مامدانىنىڭ بۇ باياناتلىرى، ئامېرىكا پىرېزىدېنتى دونالد ترامپنىڭ ئامېرىكا قوراللىق كۈچلىرىنىڭ ۋېنېزۇئېلادا «كەڭ كۆلەملىك بىر ھۇجۇم» ئېلىپ بارغانلىقىنى، مادۇرو ۋە رەپىقىسىنىڭ قولغا ئېلىنىپ دۆلەت سىرتىغا چىقىرىلغانلىقىنى ئېلان قىلغاندىن كېيىن ئوتتۇرىغا چىقتى. ترامپ كېيىنچە، بۇ ئىككەيلەننىڭ فېدېراتسىيە جىنايىتى بىلەن سوتلىنىش ئۈچۈن نىيۇيوركقا ئېلىپ بېرىلغانلىقىنى ئاشكارىلىغان ئىدى.
