ھاماس يازما بايانات ئېلان قىلىپ: «دوھادا ۋاسىتىلىك سۆھبەت قايتا باشلاندى. بۇ قېتىملىق سۆھبەت تولۇق ئۇرۇش توختىتىش كېلىشىمى، ئىشغالىيەتچى كۈچلەرنىڭ غەززەدىن چېكىنىشى ۋە يۇرتىدىن ئايرىلىپ قالغانلارنىڭ ئۆيلىرىگە قايتىشى قاتارلىقلارغا مەركەزلىشىدۇ» دېدى.

باياناتتا يەنە، ھاماسنىڭ سەمىمىي ۋە ئىجابىي پوزىتسىيە بىلەن پەلەستىن خەلقىنىڭ تەلەپلىرىنى چۆرىدىگەن ھالدا قىسقا ۋاقىت ئىچىدە كېلىشىم ھاسىل قىلىش ئۈچۈن تىرىشىۋاتقانلىقى، كېلىشىمنىڭ نىشانىنىڭ ئىسرائىلىيەنىڭ غەززەدىكى ئىرقىي قىرغىنچىلىقى ۋە ئىرقىي تازىلاش ئۇرۇشىنى توختىتىش ئىكەنلىكى قەيت قىلىندى.

تۈنۈگۈن، ئىسرائىلىيە سۆھبەت ئۆمىكىنىڭ ھاماس بىلەن ۋاسىتىلىك ئەسىر ئالماشتۇرۇش سۆھبىتىنى داۋاملاشتۇرۇش ئۈچۈن قاتارنىڭ پايتەختى دوھاغا بارىدىغانلىقى بىلدۈرۈلگەنىدى.

ئىسرائىلىيە باش مىنىستىرلىق مەھكىمىسى مەتبۇئات ئىشلىرى ئىشخانىسى يازما بايانات ئېلان قىلىپ، باش مىنىستىر بېنيامىن نېتانياھۇنىڭ موسساد ۋە ئارمىيە ئەمەلدارلىرىنى ئۆز ئىچىگە ئالغان سۆھبەت ئۆمىكىنىڭ دوھاغا بېرىشىغا قوشۇلغانلىقى بىلدۈرۈلگەنىدى.

ئىسرائىلىيە باش مىنىستىرى نېتانياھۇ ئىسرائىلىيە ۋە خەلقئارا جەمئىيەت تەرىپىدىن سىياسىي سەۋەبلەر تۈپەيلىدىن ھاماس بىلەن ئەسىر ئالماشتۇرۇش كېلىشىمى تۈزمەسلىك بىلەن ئەيىبلەنمەكتە.

نېتانياھۇ 20-دېكابىردا ئامېرىكانىڭ «The Wall Street Journal» گېزىتىگە بايانات بېرىپ: «ھاماس پۈتۈنلەي يوقىتىلغۇچە ئۇرۇشنىڭ داۋاملىشىدىغانلىقىنى، ھاماسنىڭ ئىسرائىلىيە چېگرالىرىدىكى مەۋجۇتلۇقىنى قوبۇل قىلمايدىغانلىقى»نى بىلدۈرگەنىدى.

غەززەدە 101 ئىسرائىلىيەلىك ئەسىرنىڭ بارلىقى، بۇلارنىڭ كەم دېگەندىمۇ ئۈچتىن بىرىنىڭ ئۆلگەنلىكى تەخمىن قىلىنماقتا.