پېنتاگون «ئىسرائىلىيە F-15 پىروگراممىسى» دائىرىسىدە، ئىسرائىلىيە ھاۋا ئارمىيەسىنى يېڭى جەڭ ئايروپىلانلىرى بىلەن تەمىنلەش ئۈچۈن «بوئىڭ» (Boeing) شىركىتى بىلەن 8.6 مىليارد دوللارلىق توختام ئىمزالىدى.
پېنتاگون دۈشەنبە كۈنى ئېلان قىلغان باياناتىدا، بۇ توختامنىڭ 25 دانە يېڭى «F-15IA» تىپلىق ئايروپىلاننى لايىھەلەش، سىستېمىلاشتۇرۇش، سىناق قىلىش، ئىشلەپچىقىرىش ۋە تاپشۇرۇپ بېرىش خىزمەتلىرىنى، شۇنداقلا كەلگۈسىدە ئېھتىياجغا قاراپ يەنە قوشۇمچە 25 ئايروپىلان ئىشلەپچىقىرىش تاللاش ھوقۇقىنى ئۆز ئىچىگە ئالىدىغانلىقىنى بىلدۈردى.
باياناتتا مۇنداق دېيىلدى: «بۇ كېلىشىم ئىسرائىلىيە ھاۋا ئارمىيەسى ئۈچۈن 25 دانە يېڭى F-15IA ئايروپىلانىنىڭ لايىھەسى، سىستېمىلىق بىرىكتۈرۈلۈشى، زاپچاسلىرىنىڭ قۇراشتۇرۇلۇشى، سىنىقى، ئىشلەپچىقىرىلىشى ۋە يەتكۈزۈپ بېرىلىشىنى؛ شۇنىڭ بىلەن بىرگە، قوشۇمچە 25 دانە ئايروپىلان ئۈچۈن زاكاز تاللاش ھوقۇقىنى ئۆز ئىچىگە ئالىدۇ».
مىنىستىرلىقنىڭ بىلدۈرۈشىچە، پىروگرامما خىزمەتلىرى ئامېرىكانىڭ مىسسورى ئىشتاتىدا ئېلىپ بېرىلىدىغان بولۇپ، 2035-يىلى 12-ئاينىڭ 31-كۈنىگىچە تاماملىنىشى پىلانلانغان.
بۇ بايانات، ئامېرىكا قوشما ئىشتاتلىرى پىرېزىدېنتى دونالد ترامپ بىلەن بېنيامىن نېتانياھۇنىڭ فلورىدادىكى سۆھبىتىدىن كېيىنلا ئېلان قىلىندى.
نېتانياھۇ بۇ زىيارەت جەريانىدا يەنە، ئامېرىكا دۆلەت مۇداپىئە مىنىستىرى پېت ھېگسېت بىلەن يېپىق سۆھبەت ئۆتكۈزگەنىدى.
ئىسرائىلىيەنى چەكلىمىسىز قوللاش
ئامېرىكا جو بايدىن ۋە دونالد ترامپ ھۆكۈمەتلىرى دەۋرىدە، يەنى غەززەدىكى ئىرقىي قىرغىنچىلىق باشلانغاندىن بۇيانقى ئىككى يىل ئىچىدە، ئىسرائىلىيەگە كەم دېگەندە 21.7 مىليارد دوللارلىق ھەربىي ياردەم بەردى.
ئىسرائىلىيە شەرتسىز قورال ياردىمىدىن باشقا يەنە، ھەر يىلى بېرىلىدىغان ئالاھىدە ئىمتىيازلاردىن، ئۇرۇش مەزگىلىدىكى قوشۇمچە فوندلاردىن ۋە دۆلەت مەجلىسىنىڭ نازارىتىدىن خالىي بولۇشتەك ئەۋزەللىكلەردىن بەھرىمەن بولماقتا.
ئىسرائىلىيەنىڭ غەززەدە يۈرگۈزۈۋاتقان ئىرقىي قىرغىنچىلىق ئۇرۇشىدا تەخمىنەن 71 مىڭ پەلەستىنلىك ھاياتىدىن ئايرىلغان بولۇپ، ئامېرىكا ئىسرائىلىيەنى داۋاملىق ھەربىي ياردەم ۋە قورال-ياراغ بىلەن تەمىنلىگەنلىكى سەۋەبىدىن ئېغىر تەنقىدلەرگە دۇچ كەلمەكتە.
