ئىتالىيە باش مىنىستىرى جورجىيا مېلونى پەيشەنبە كۈنى ئېلان قىلغان باياناتىدا، ئىسرائىلىيەنىڭ غەززەگە قىلغان ھۇجۇملىرىدا رايوندىكى بىردىنبىر كاتولىك چېركاۋىنىڭ زەربىگە ئۇچرىغانلىقىنى بىلدۈردى. ANSA ئاگېنتلىقىمۇ بۇ ھۇجۇمدا ئىككى ئايالنىڭ ھاياتىدىن ئايرىلغانلىقىنى خەۋەر قىلدى.
«ئىسرائىلىيەنىڭ غەززەگە قىلغان ھۇجۇملىرى مۇقەددەس ئائىلە چېركاۋىغىمۇ زەربە بەردى» دېگەن مېلونى، پۇقرالارغا قارىتىلغان بۇ خىلدىكى ھۇجۇملارنى «قوبۇل قىلغىلى بولمايدىغان» قىلمىش دەپ تەنقىد قىلغان.
مەزكۇر ھۇجۇمدا پەلەستىن رايونىدىكى بىردىنبىر كاتولىك چېركاۋى بولغان «مۇقەددەس ئائىلە چېركاۋى» زىيانغا ئۇچرىدى. ۋاتىكان بۇ ھۇجۇم غا قارىتا تېخى رەسمىي ئىنكاس قايتۇرمىدى. ئىسرائىلىيە ئارمىيەسى ۋەقەنىڭ تەكشۈرۈلۈشكە باشلانغانلىقىنى ئۇقتۇردى.
«قوبۇل قىلغىلى بولمايدۇ»
ئىتالىيەنىڭ ANSA ئاگېنتلىقىنىڭ خەۋىرىدە، ھۇجۇمدا 6 كىشىنىڭ ئېغىر يارىلانغانلىقى، شۇنداقلا ئىسرائىلىيە-پەلەستىن ئۇرۇشى توغرىسىدا پاپا فىرانسىسقا قەرەللىك مەلۇمات بېرىپ تۇرغان چېركاۋ پوپى گابرىئېلې رومانېللىنىڭ پۇتىدىن يېنىك يارىلانغانلىقى ئەسكەرتىلدى.
باش مىنىستىر مېلونى باياناتىدا مۇنداق دېدى:
«ئىسرائىلىيەنىڭ غەززەگە قىلغان ھۇجۇملىرى مۇقەددەس ئائىلە چېركاۋىغىمۇ زىيان سالدى. ئىسرائىلىيەنىڭ ئايلاردىن بۇيان پۇقرالارغا قاراتقان بۇ خىلدىكى ھۇجۇملىرىنى قوبۇل قىلغىلى بولمايدۇ. ھېچقانداق ھەربىي ھەرىكەت بۇنداق قىلمىشنى ئاقلىيالمايدۇ.»
