ئىسرائىلىيە ئارمىيەسى سۈرىيەنىڭ جەنۇبىدىكى قۇنەيترا ۋىلايىتىنىڭ شىمالىي يېزىلىرىغا جايلاشقان جەباتا ئەلھاشاب بازىرىغا باستۇرۇپ كىرىپ، ئىككى كىشىنى تۇتقۇن قىلدى.

سۈرىيە دۆلەتلىك تېلېۋىزىيە قانىلى ئەلئىخبارىيەنىڭ خەۋىرىگە قارىغاندا، ئىسرائىلىيە ئەسكەرلىرى جەباتا ئەلھاشاب بازىرىغا باستۇرۇپ كىرىپ، نۇرغۇن ئۆيلەرنى ئاختۇرغان. باستۇرۇپ كىرىش جەريانىدا ئىككى كىشى ئىسرائىلىيە ئەسكەرلىرى تەرىپىدىن تۇتقۇن قىلىنغان.

ئىسرائىلىيە ئارمىيەسى 2024-يىلى دېكابىردا بەششار ئەسەد ھاكىمىيىتى ئاغدۇرۇلغاندىن كېيىن، 1974-يىلى ئىمزالانغان «كۈچلەرنى ئايرىۋېتىش كېلىشىمى» گە خىلاپلىق قىلىپ، سۈرىيەنىڭ جەنۇبىدىكى بېسىۋالغان دىرئە ۋە قۇنەيترا ۋىلايەتلىرىدە 10 بازا ۋە ھەربىي پونكىت قۇرغان ئىدى.

سۈرىيە پىرېزىدېنتى ئەھمەد شارانىڭ ئىلگىرى بەرگەن باياناتىغا ئاساسلانغاندا، ئىسرائىلىيە ئارمىيەسى 2024-يىلى 8-دېكابىردىن 2025-يىلى 18-ئىيۇلغىچە بولغان ئارىلىقتا، سۈرىيەنىڭ ھەرقايسى رايونلىرىغا 1000 دىن ئارتۇق ھاۋا ھۇجۇمى ۋە 400 گە يېقىن قۇرۇقلۇق ھۇجۇمى ئېلىپ بارغان.