ئامېرىكا پىرېزىدېنتى دونالد ترامپ ئىراندا «ناھايىتى ئۈنۈملۈك بىر ھاكىمىيەت ئالمىشىش» يۈز بەرگەنلىكىنى تىلغا ئېلىپ، بۇ دۆلەت بىلەن مۇناسىۋەت ئورنىتىدىغانلىقىنى بىلدۈردى. چارشەنبە كۈنى «Truth Social» سۇپىسىدا ھەمبەھىرلىگەن ئۇچۇرىدا، ترامپ مۇنداق دېدى: «بىز ناھايىتى ئۈنۈملۈك بىر ھاكىمىيەت ئالمىشىشنى باشتىن كەچۈردى دەپ بېكىتتۇق ئامېرىكا ئىران بىلەن يېقىندىن ھەمكارلىشىدۇ!»
ئۇ سۆزىنى داۋاملاشتۇرۇپ: «ئۇران قويۇلدۇرۇشقا بولمايدۇ. ئامېرىكا ئىران بىلەن بىرلىكتە، يەر ئاستىغا چوڭقۇر كۆمۈلگەن بارلىق يادرو 'چاڭ-توزانلىرىنى' (B-2 بومباردىمانچى ئايروپىلانلىرى ئارقىلىق) قېزىپ چىقىرىدۇ. بۇ رايون نۆۋەتتە ۋە ئەڭ بېشىدىن تارتىپ، ئىنتايىن سەزگۈر سۈنئىي ھەمراھ كۆزىتىشى (ئالەم بوشلۇقى قىسىملىرى!) ئاستىدا تۇرۇۋاتىدۇ. ھۇجۇم قىلىنغان كۈندىن باشلاپ ھېچقانداق نەرسىگە تەگكۈزۈلمىدى» دېدى.
ترامپ يەنە ئىقتىسادىي تەدبىرلەردە ئىلگىرىلەش بولغانلىقىنى تەكىتلەپ مۇنداق دېدى: «بىز ئىران بىلەن تاموژنا بېجى ۋە جازالارنى يېنىكلىتىش مەسىلىسىنى سۆزلىشىۋاتىمىز ۋە سۆزلىشىشنى داۋاملاشتۇرىمىز. 15 ماددىلىق پىلاننىڭ كۆپىنچىسىدە ئاللىقاچان كېلىشىم ھاسىل قىلىندى.»
ئۇ يەنە: «ئىراننى ھەربىي قورال بىلەن تەمىنلىگەن ھەر قانداق دۆلەتنىڭ ئامېرىكىغا ساتىدىغان ماللىرىدىن دەرھال %50 تاموژنا بېجى ئېلىنىدۇ، بۇ قارار دەرھال ئىجرا قىلىنىدۇ. ھېچقانداق ئالاھىدە ئەھۋالغا يول قويۇلمايدۇ ياكى كەچۈرۈم قىلىنمايدۇ!» دەپ قوشۇمچە قىلدى.
سەيشەنبە كۈنى ئامېرىكا پىرېزىدېنتى «ئىرانغا قارىتىلغان بومباردىمان ۋە ھۇجۇمنى ئىككى ھەپتە توختىتىپ تۇرۇشقا قوشۇلغانلىقىنى» ئېلان قىلغان ئىدى.
بۇ بايانات ترامپنىڭ ئىرانغا ھۆرمۈز بوغۇزىنى قايتا ئېچىش ۋە كېلىشىمنى قوبۇل قىلىش ئۈچۈن بەرگەن مۆھلىتى توشۇشقا ئىككى سائەتكە يەتمىگەن ۋاقىت قالغاندا ئېلان قىلىندى. ئامېرىكا رەھبىرى ئەگەر قوشۇلمىسا، «پۈتۈن بىر مەدەنىيەتنىڭ» يوقىتىلىدىغانلىقىنى ئېيتقان ئىدى.
رايون خاراكتېرلىك جىددىيچىلىك 28-فېۋرال ئامېرىكا ۋە ئىسرائىلىيەنىڭ ئىرانغا قارشى بىرلىكتە ھەرىكەت باشلىشىدىن كېيىن كۈچەيگەن بولۇپ، ئۇ قېتىملىق ھۇجۇمدا ئەينى ۋاقىتتىكى ئالىي رەھبەر ئەلى خامىنېينىمۇ ئۆز ئىچىگە ئالغان 1340 تىن ئارتۇق ئادەم قازا قىلغان ئىدى.
ئىران بۇنىڭغا جاۋابەن ئىسرائىلىيەدىن سىرت، ئامېرىكا ھەربىي كۈچلىرى تۇرۇۋاتقان ئىيوردانىيە، ئىراق ۋە پارس قولتۇقى دۆلەتلىرىنى ئۇچقۇچىسىز ئايروپىلان ۋە باشقۇرۇلىدىغان بومبا بىلەن ھۇجۇ نىشانى قىلغان ئىدى. تېھران يەنە ھۆرمۈز بوغۇزىدىن ئۆتىدىغان دېڭىز قاتنىشىنى چەكلىگەن بولسىمۇ، لېكىن ئۇرۇش توختىتىش كېلىشىمى دائىرىسىدە بوغۇزنى قايتا ئېچىشقا قوشۇلدى.
