تۈركىيە ئىستاتىستىكا ئىدارىسى تەرىپىدىن ئېلىپ بېرىلغان «ئائىلە خەۋەرلىشىش تېخنىكىلىرىنى ئىشلىتىش تەكشۈرۈشى-2026» نىڭ نەتىجىسى ئېلان قىلىندى.

تەكشۈرۈش نەتىجىسىگە ئاساسلانغاندا، بۇ يىل مەملىكەت بويىچە 16 ياشتىن 74 ياشقىچە بولغانلار ئارىسىدا تور ئىشلىتىش نىسبىتى %92.3 بولغان. بۇ نىسبەت ئۆتكەن يىلى %90.9 ئىدى. ئايرىپ قارىغاندا، بۇ ياش گۇرۇپپىسىدىكى ئەرلەردە تور ئىشلىتىش نىسبىتى %94.8، ئاياللاردا بولسا %89.9 بولغان.

تور ئارقىلىق ئاممىۋى مۇلازىمەتلەردىن پايدىلانغۇچىلارنىڭ نىسبىتى %76 كە يەتتى

يېقىنقى بىر يىل ئىچىدە شەخسىي مەقسەتتە رەسمىي ئورگانلارنىڭ تور بېكەتلىرى ۋە ئەپلىرىنى ئىشلەتكەنلەر ھەمدە تور ئارقىلىق ئاممىۋى مۇلازىمەتلەردىن پايدىلانغانلارنىڭ نىسبىتى %76 دەپ بېكىتىلدى. بۇ نىسبەت ئەرلەردە %82.7، ئاياللاردا بولسا %69.4 نى ئىگىلىگەن.

«ئېلېكتىرونلۇق ھۆكۈمەت» (e-Devlet) مۇلازىمەتلىرىنى ئىشلەتكەن كىشىلەرنىڭ ياش قۇرۇلمىسىغا قارىغاندا، بۇ نىسبەتنىڭ ئەڭ يۇقىرى چەك  25–34 ياشلىقلار گۇرۇپپىسىدا %93 بولغانلىقى؛ ئەڭ تۆۋەن چەك 65–74 ياشلىقلار گۇرۇپپىسىدا %31.3 بولغانلىقى كۆرۈلدى.

2025-يىلى %55.7 بولغان تور ئارقىلىق شەخسىي مەقسەتتە مال ۋە مۇلازىمەت سېتىۋېلىش ياكى زاكاز قىلىش (ئېلېكتىرونلۇق سودا) نىسبىتى، بۇ يىل %60 كە ئۆرلىدى.

يېقىنقى ئۈچ ئايدا تور ئارقىلىق مائارىپ، كەسپىي ياكى شەخسىي مەقسەتلەر ئۈچۈن ئۆگىنىش پائالىيەتلىرىگە قاتناشقانلارنىڭ نىسبىتى بۇ يىل ئۆتكەن يىلقىغا سېلىشتۇرغاندا 5.2 پوئېنت ئېشىپ، %22.9 غا يەتتى. بۇ نىسبەتنىڭ ئەرلەردە %22.4، ئاياللاردا بولسا %23.5 بولغانلىقى ئېنىقلاندى.

كىشىلەرنىڭ %90 ى «WhatsApp» ئىشلەتتى

ئەڭ كۆپ ئىشلىتىلگەن ئىجتىمائىي تاراتقۇ ۋە ئۇچۇرلىشىش ئەپلىرى رەت تەرتىپى بويىچە: %90 بىلەن «WhatsApp»، %77.6 بىلەن «YouTube» ۋە %71.1 بىلەن «Instagram» بولدى. جىنس ئايرىمىسى بويىچە قارىغاندا، ئەرلەرنىڭ %92.5 ى «WhatsApp»، %80.1 ى «YouTube» ۋە %71.9 ى «Instagram» ئىشلەتكەن بولسا؛ ئاياللارنىڭ %87.6 ىنىڭ «WhatsApp»، %75 ىنىڭ «YouTube» ۋە %70.2 ىنىڭ «Instagram» ئەپلىرىنى ئىشلەتكەنلىكى مەلۇم بولدى.