ئامېرىكا پىرېزىدېنتى دونالد ترامپ، ئەگەر بارلىق ناتو دۆلەتلىرى رۇسىيەدىن نېفىت سېتىۋېلىشنى توختاتسا ۋە رۇسىيە نېفىتى سېتىۋالغان خىتايغا %50-%100 لىك تاموژنا بېجى قويسا، رۇسىيە-ئۇكرائىنا ئۇرۇشىنىڭ ئاخىرلىشىدىغانلىقىنى ئېيتتى.
ترامپ، شەنبە كۈنى ئىجتىمائىي تاراتقۇ سۇپىسىدا يوللىغان يازمىسىدا، ناتونىڭ ئۇرۇشتا غەلىبە قىلىشقا بولغان ۋەدىسىنىڭ «%100 دىن كۆپ تۆۋەن» ئىكەنلىكىنى ۋە بەزى ئىتتىپاقداش ئەزالارنىڭ رۇسىيە نېفىتى سېتىۋېلىشىنىڭ «ئەجەبلىنەرلىك» ئىكەنلىكىنى بىلدۈردى.
ئۇ ناتو ئەزالىرىغا خىتاب قىلىپ: «بۇ ئەھۋال، رۇسىيەگە قارشى سۆھبەتتىكى ئورنىڭىز ۋە سودىلىشىش كۈچىڭىزنى زور دەرىجىدە ئاجىزلاشتۇرۇۋېتىدۇ» دېدى.
بۇ بايانات، رۇسىيەنىڭ بىر قانچە ئۇچقۇچىسىز ئايروپىلانىنىڭ پولشا ھاۋا بوشلۇقىغا كىرىشى بىلەن جىددىيلىكنىڭ كۈچىيىۋاتقان بىر پەيتتە ئېلان قىلىندى. رۇسىيە ئۇچقۇچىسىز ئايروپىلانلىرى پولشا ھاۋا مۇداپىئە سىستېمىسى تەرىپىدىن ئېتىپ چۈشۈرۈلگەن ئىدى.
يەنە بىر تەرەپتىن، ئامېرىكا پارلامېنتى ترامپنى، جازا تەدبىرلىرىنى كۈچەيتىدىغان قانۇن لايىھەسى مەسىلىسىدە قايىل قىلىشقا تىرىشماقتا.
خىتايغا تاموژنا بېجى
پىرېزىدېنت، ناتو ئەزالىرىنىڭ خىتايغا %50 تىن %100 گىچە تاموژنا بېجى قويۇشى كېرەكلىكىنى، بۇ باجلارنىڭ، رۇسىيەنىڭ 2022-يىلى ئۇكرائىناغا قاراتقان ھۇجۇمى بىلەن باشلانغان ئۇرۇش ئاخىرلاشقاندا ئەمەلدىن قالدۇرۇلۇشى مۇمكىنلىكىنى بىلدۈردى.
ترامپ: «خىتاينىڭ رۇسىيە ئۈستىدە كۈچلۈك كونتروللۇقى، ھەتتا تەسىرى بار» دەپ يازدى ۋە كۈچلۈك تاموژنا بېجىنىڭ «بۇ تەسىرنى يوقىتىدىغانلىقىنى» بىلدۈردى.
ترامپ، يازمىسىدا ئۇرۇشنىڭ مەسئۇلىيىتىنى ئۇنىڭدىن ئىلگىرىكى دېموكراتچى جو بايدىن ۋە ئۇكرائىنا دۆلەت باشلىقى ۋولودىمىر زېلېنسكىيگە يۈكلىدى. ئەمما، رۇسىيە دۆلەت باشلىقى ۋىلادىمىر پۇتىننى بۇ مەسئۇلىيەتكە كىرگۈزمىدى.
ترامپ ئىلگىرى، ئۇكرائىنادىكى ئۇرۇشنى ئاخىرلاشتۇرۇش مەسىلىسىدە ئىلگىرىلەش بولمىسا، رۇسىيە نېفىتى سېتىۋالغان دۆلەتلەرگە ئىككىنچى دەرىجىلىك جازا يۈرگۈزۈش بىلەن تەھدىت سالغان ئىدى.
ئامېرىكا ھازىر، ھىندىستاننىڭ رۇسىيە نېفىتى ئىمپورتىنى داۋاملاشتۇرغانلىقى سەۋەبلىك بۇ دۆلەتنىڭ مەھسۇلاتلىرىغا %25 لىك قوشۇمچە تاموژنا بېجى قويغان ئەھۋالدا تۇرماقتا.
گ 7 دۆلەتلىرى ۋە ياۋروپا ئىتتىپاقى رۇسىيە بىلەن بولغان سودا مۇناسىۋىتىنى ئۈزگەن ۋە رۇسىيە نېفىتىغا باھا چېكى بېكىتكەن ئىدى. بۇنىڭغا قارىتا، رۇسىيە خىتاي ۋە ھىندىستان قاتارلىق دۆلەتلەرگە نېفىت سېتىشنى كۆپەيتكەن ئىدى.
