ئۇكرائىنا رۇسىيەگە قارشى تېخىمۇ كۆپ ياردەم ۋە قورال - ياراغ تەلەپ قىلماقتا.
رۇسىيە ئۇكرائىنانىڭ پايتەختى كىيېۋ ۋە پورت شەھىرى ئودېسساغا ئۇچقۇچىسىز ھاۋا ئاپپاراتلىرى ئارقىلىق كەڭ كۆلەملىك ھۇجۇم قىلدى. ئۇكرائىنا دائىرىلىرى بۇ ھۇجۇملاردا بىر كىشىنىڭ ھاياتىدىن ئايرىلغانلىقىنى ۋە بىر تۇغۇت دوختۇرخانىسىنىڭ ھۇجۇم نىشانى قىلىنغانلىقىنى بىلدۈرۈپ، تېخىمۇ كۆپ ياردەم تەلىپىدە بولدى.
موسكۋا ئۇكرائىناغا قارىتىلغان ھۇجۇملىرىنى داۋاملاشتۇرۇۋاتقان بىر پەيتتە، ئۇكرائىنامۇ رۇسىيەنىڭ ئىچكى رايونلىرىغىچە رۇسىيەگە قارشى ھۇجۇملارنى ئېلىپ باردى.
ئالدىنقى ھەپتىنىڭ ئاخىرلىرى ئىستانبۇلدا ئۆتكۈزۈلگەن تىنچلىق سۆھبەتلىرىدە ئەسىر ئالماشتۇرۇش توغرىسىدا كېلىشىم ھاسىل قىلىندى. بۇ، سۆھبەتلەردىكى مۇھىم بىر قەدەم دەپ قارالسىمۇ، ئۇرۇشنى ئاخىرلاشتۇرىدىغان كېلىشىم تېخىچە ھاسىل قىلىنالمىدى.
كىيېۋنىڭ مەركىزىدە كەم دېگەندە 12 پارتلاش، ھاۋا مۇداپىئە ئوقلىرى ۋە ئۇچقۇچىسىز ھاۋا ئاپپاراتلىرىنىڭ ئاۋازلىرى ئاڭلاندى. ھۇجۇملاردا كەم دېگەندە يەتتە رايون نىشان قىلىندى، بىنالار ۋە ماشىنىلار كۆيۈپ كەتتى، نۇرغۇن كىشى يارىلاندى.
ئەسىر ئالماشتۇرۇش
دۈشەنبە كۈنى ئەتىگەندە ئۇكرائىنا بىلەن رۇسىيە تۇنجى باسقۇچتا 25 ياشتىن كىچىك ئەسىرلەرنى ئالماشتۇردى. ئەمما قانچىلىك ئەسكەرنىڭ ئالماشتۇرۇلغانلىقى ھەققىدە مەلۇمات بېرىلمىدى.
ئەسىر ئالماشتۇرۇشتىن خۇرسەن ئىكەنلىكىنى ئەسكەرتكەن ئۇكرائىنا پىرېزىدېنتى ۋولودىمىر زېلېنسكىي، ئۆتكەن ھەپتە ئېلان قىلغان باياناتىدا، مەۋجۇت رۇسىيە ھەيئىتى بىلەن يەنە سۆھبەت ئېلىپ بېرىشنىڭ «مەنىسىز» ئىكەنلىكىنى ئىلگىرى سۈردى. زېلېنسكىي بۇرۇن بۇ ھەيئەتنى «كاللىسى ئىشلىمەيدىغان ئادەملەر» دەپ ئاتىغان ۋە ئۇرۇش توختىتىش كېلىشىمى ھاسىل قىلىنالمىغانلىقىنى بىلدۈرگەن ئىدى.
يەكشەنبە كۈنى، رۇسىيە ئارمىيەسى قىسمەن رۇسىيەنىڭ كونتروللۇقىدىكى دونېتسك ۋە زاپورىجيا رايونلىرى بىلەن چېگرىلىنىدىغان ئۇكرائىنانىڭ دنىپروپېتروۋسك رايونىغا ھۇجۇم قىلغانلىقىنى بىلدۈردى. بۇ، ئۇدا ئۈچ يىلدىن كۆپرەك ۋاقىتتىن بۇيانقى ئۇرۇشلاردا تۇنجى قېتىملىق ئىش بولدى.
رۇسىيە ئۇرۇشنى توختىتىش شەرتى سۈپىتىدە ئۇكرائىنانىڭ موسكۋا ئىشغال قىلدى دەپ ئىگىلىۋالغان زېمىنلاردىن ۋاز كېچىشىنى ۋە شىمالىي ئاتلانتىك ئەھدى تەشكىلاتىغا ئەزا بولماسلىقىنى تەلەپ قىلماقتا. شۇنداقلا، كىيېۋ ۋە ياۋروپا ئىتتىپاقى تەلەپ قىلغان 30 كۈنلۈك شەرتسىز ئۇرۇش توختىتىشنى رەت قىلىپ، بۇنىڭ ئۇكرائىنا قىسىملىرىنىڭ غەربتىن كەلگەن قورال - ياراغلار بىلەن قايتا قوراللىنىشىغا يول ئاچىدىغانلىقىنى ئىلگىرى سۈرمەكتە.
ئۇكرائىنا بولسا رۇسىيەنىڭ پۈتۈن زېمىنلىرىدىن تولۇق چېكىنىپ چىقىپ كېتىشىنى ۋە غەربتىن بىخەتەرلىك كاپالىتى تەلەپ قىلماقتا. موسكۋانىڭ تەلەپلىرىنى بولسا «ئۇلتىماتوم» دەپ ئاتىماقتا.
