يەكشەنبە كۈنى تېھراندا ئىراننىڭ ۋاپات بولغان ئالىي رەھبىرى ئەلى ھامانېنىڭ تابۇتى ئالدىدا دەپنە نامىزى ئوقۇلدى. بۇ پايتەختتە كەڭ كۆلەملىك قاتنىشىش بىلەن ئېلىپ بېرىلغان ئىككى كۈنلۈك مۇراسىمنىڭ ئىككىنچى كۈنى ئىدى.
ھامانې 1989-يىلىدىن باشلاپ ئىسلام جۇمھۇرىيىتىنى باشقۇرۇپ كېلىۋاتقان بولۇپ، 28-فېۋرالدا، 86 يېشىدا، ئامېرىكا بىلەن ئىسرائىلىيەنىڭ ئىرانغا قاراتقان ئۇرۇشىنىڭ تۇنجى كۈنىدە ئېلىپ بېرىلغان بىر ھاۋا ھۇجۇمىدا ئۆلتۈرۈلگەن ئىدى.
يەكشەنبە كۈنىدىكى مۇراسىم، تېھراننىڭ بۈيۈك مۇسەللا مەجمۇئەسىدە، قۇمدىكى مەدىرىسىلەردە دەرس بېرىدىغان 97 ياشلىق داڭلىق شىئە دىنىي ئالىمى جافەر سۇبخانى تەرىپىدىن يېتەكلەندى.
ھامانېنىڭ ئوغلى ۋە ئۇنىڭ ئورنىغا رەھبەر كۆرسىتىلگەن ۋارىسى مۇجتەبا ھامانېنىڭ 28-فېۋرالدىكى ھۇجۇمدا يارىلانغانلىقى ئىلگىرى سۈرۈلگە بولۇپ، ئۇ ئالىي رەھبەر دەپ جاكارلانغاندىن كېيىن جەمئىيەتنىڭ ئالدىغا چىقمىدى ۋە جىنازا نامازلىرىدىمۇ كۆرۈنمىدى.
ۋاپات بولغان رەھبەرنىڭ باشقا ئۈچ ئوغلى، مەسئۇد، مۇستافا ۋە مەيسام مۇراسىمغا قاتناشتى.
يەكشەنبە كۈنى پۈتۈن ئىران مىقياسىدا رەسمىي دەم ئېلىش كۈنى دەپ ئېلان قىلىندى. كۈننىڭ كېيىنكى سائەتلىرىدە ھامانېنىڭ جەسىتى، دۈشەنبە كۈنى پايتەختتە ئۆتكۈزۈلىدىغان ماتەم يۈرۈشلىرىگە تەييارلىق قىلىش مەقسىتىدە قويۇلغان بۈيۈك مۇسەللا مەجمۇئەسىدىن ئېلىنىدۇ.
دۆلەت تېلېۋىزىيەسىنىڭ كۆرۈنۈشلىرىدە جۇمھۇر رەئىس مەسئۇد پېزەشكىيان، پارلامېنت باشلىقى ۋە ئىراننىڭ باش سۆھبەتچىسى مۇھەممەد باقىر گالىباف قاتارلىق يۇقىرى دەرىجىلىك ئەمەلدارلار بىلەن بىرگە مۇراسىمغا قاتناشقانلىقى كۆرۈلدى.
بەش ھەپتىلىك قەتتىق توقۇنۇشتىن كېيىن، ئۇرۇش توختىتىش ۋە ئامېرىكا بىلەن تۈزۈلگەن دەسلەپكى كېلىشىمدىن كېيىن يېقىن شەرقتىكى تۇقۇنۇش ھازىرچە توختاىغان ۋەزىيەتتە تۇرماقتا. ئەمما ھەم ۋاشىنگتون ھەم تېھران، ئۇرۇشنىڭ ھەر قانداق بىر دەقىقىدە قايتىدىن باشلىنىپ كېتىشى مۇمكىنلىكى ھەققىدە ئاگاھلاندۇرۇش بەرمەكتە.
دۈشەنبە كۈنى ئۆتكۈزۈلىدىغان ماتەم يۈرۈشىدىن كېيىن، ھامانېنىڭ جىنازىسى سەيشەنبە كۈنى قۇم شەھىرىگە، چارشەنبە كۈنى قوشنا ئىراققا يۆتكىلىدۇ ۋە پەيشەنبە كۈنى شەرقىي شىمالدىكى تۇغۇلغان يۇرتى مەشھەد شەھىرىدە دەپنە قىلىنىدۇ.
