تۈركىيە جۇمھۇرىيىتى ئەدلىيە مىنىستىرى ئاقىن گۈرلەك چەت ئەلگە قېچىپ  كەتكەن فەتۆ (FETÖ / فەتھۇللاھچى تېررورلۇق تەشكىلاتى) ئەزالىرىنى تۈركىيەگە قايتۇرۇپ كېلىش ئۈچۈن ئېلىپ بېرىلىۋاتقان قانۇنىي كۈرەشنىڭ قەتئىيلىك بىلەن داۋاملىشىۋاتقانلىقىنى بىلدۈرۈپ، بۇ ھەقتىكى مۇھىم سانلىق مەلۇماتلارنى ئاشكارىلىدى.

مىنىستىر گۈرلەك تېررورلۇق تەشكىلاتىنىڭ يۇقىرى دەرىجىلىك رەھبەرلىرىنى ئۆز ئىچىگە ئالغان «مېڭە ئەترىتى»نى قايتۇرۇپ كېلىش توغرىسىدىكى ھۆججەتلىرىنىڭ، قولغا چۈشكەن يېڭى دەلىل-ئىسپاتلار ئاساسىدا قايتىدىن تەھرىرلىنىپ، ئالاقىدار دۆلەتلەرگە قايتا ئەۋەتىلگەنلىكىنى ئېلان قىلدى.

119 دۆلەتكە 2950 قايتۇرۇپ بېرىش تەلىپى يوللاندى

فەتۆ ۋە پ ي گ (PYD) گە قارشى كۈرەش دائىرىسىدە خەلقئارا قانۇن يوللىرىنىڭ ئاكتىپ ئىشلىتىلىۋاتقانلىقىنى تەكىتلىگەن مىنىستىر گۈرلەك، قايتۇرۇپ بېرىش مۇساپىسىگە ئالاقىدار تۆۋەندىكى سانلىق مەلۇماتلارنى بەردى:

بۈگۈنگىچە فەتۆ ۋە پ ي گ ئەزاسى 2765 كىشى ھەققىدە تەييارلانغان جەمئىي 2950 قايتۇرۇپ بېرىش تەلىپى، ئەدلىيە مىنىستىرلىقى تەرىپىدىن 119 دۆلەتكە يەتكۈزۈلدى. بۇ تەلەپلەر تېررورلۇق تەشكىلاتى ئەزالىرى سادىر قىلغان جىنايەتلەرنىڭ دەلىللىرى بىلەن بىرگە، خەلقئارا قانۇنغا ئۇيغۇن رەۋىشتە تەييارلانغان ھۆججەتلەردىن تەركىب تاپقان.

ئەڭ كۆپ تەلەپ گېرمانىيە ۋە ئامېرىكاغا سۇنۇلدى

قايتۇرۇپ بېرىش تەلەپلىرىنىڭ جۇغراپىيەلىك تارقىلىشىغا قارىغاندا، ھۆججەتلەرنىڭ زور بىر قىسمى ياۋروپا دۆلەتلىرى ۋە ئامېرىكا قوشما ئىشتاتلىرى (ئامېرىكا)غا مەركەزلەشكەن. مىنىستىر گۈرلەك ئاشكارا قىلغان سانلىق مەلۇماتلارغا ئاساسلانغاندا، گېرمانىيە، ئامېرىكا ۋە بېلگىيە ئەڭ كۆپ قايتۇرۇپ بېرىش تەلىپى سۇنۇلغان ئالدىنقى ئۈچ دۆلەت بولغان؛ مۇنداقچە ئېيتقاندا، گېرمانىيەگە 777 ھۆججەت، ئامېرىكاغا 728 ھۆججەت، بېلگىيەگە 142 ھۆججەت سۇنۇلغان.

گۈرلەك سۆزىنىڭ ئاخىرىدا، فەتۆ ئەزاسى خائىنلارنى قايتۇرۇپ كېلىش ئۈچۈن ئېلىپ بېرىلىۋاتقان كۈرەشنىڭ ئۈزلۈكسىز داۋاملىشىدىغانلىقىنى ئالاھىدە تەكىتلىدى.