شەنبە كۈنى باكۇدا سۆز قىلغان جۇمھۇر رەئىس رەجەپ تاييىپ ئەردوغان، تۈركىيەنىڭ ئەزەربەيجان بىلەن ئەرمېنىيە ئوتتۇرىسىدا مەڭگۈلۈك تىنچلىقنى ئىشقا ئاشۇرۇشقا بولغان چاقىرىقىنى ۋە بۇنى قوللايدىغانلىقىنى تەكىتلىدى.
ئەزەربەيجاننىڭ قاراباغدىكى غەلىبىسىنىڭ بەش يىللىقىنى تەبرىكلەش مۇراسىمىدا سۆز قىلغان ئەردوغان، 30 يىللىق ئەرمېنىيە ئىشغالىيىتىنىڭ ئاخىرلاشقانلىقىنى ماختاپ، بۇنى كاۋكازىيە ئۈچۈن بىر بۇرۇلۇش نۇقتىسى دەپ ئاتىدى.
ئەردوغان ئازاد قىلىشنىڭ پەقەت چوڭ بىر ئادالەتسىزلىكنى ئاخىرلاشتۇرۇپلا قالماي، يەنە رايونلۇق مۇقىملىق ئۈچۈن «يېڭى بىر دەۋر» نى باشلىغانلىقىنى ئېيتىپ، بارلىق تەرەپلەرنى غەلىبىنى مەڭگۈلۈك تىنچلىققا ئايلاندۇرۇشقا چاقىردى.
ئەردوغان: «بىز نە ئۆچمەنلىك قىلىمىز، نە ئۆتمۈشتىكى ئازابلارنىڭ قايتا يۈز بېرىشىگە يول قويىمىز» دېدى ۋە ئۇرۇشتىن كېيىنكى دەۋرنى كاۋكازىيەدە مەڭگۈلۈك تىنچلىققا بارىدىغان يولدىكى بىر مۇھىم ئابىدە دەپ قارايدىغانلىقىنى بىلدۈردى.
ھەمكارلىقنى كۈچەيتىش
جۇمھۇر رەئىس ئەردوغان، ئەزەربەيجان جۇمھۇر رەئىسى ئىلھام ئەلىيېۋنىڭ ئەرمېنىيە بىلەن تىنچلىق كېلىشىمى ھاسىل قىلىش يۆنىلىشىدىكى «سەمىمىي تىرىشچانلىقلىرى» نى مەدھىيەلەپ، ئەرمېنىيە باش مىنىستىرى نىكول پاشىنيان تەرىپىدىن بېسىلغان «ئىجابىي قەدەملەر» نىمۇ ماختىدى.
ئەردوغان: «ئاللاھ خالىسا، بۇ شانلىق غەلىبە ھەر ئىككى رەھبەرنىڭ ئىجابىي پوزىتسىيەسى بىلەن رايوندا خاتىرجەملىك ۋە تىنچلىقنى مۇستەھكەملەيدىغان مەڭگۈلۈك بىر كېلىشىم بىلەن نەتىجىلىنىدۇ» دېدى ھەمدە تۈركىيەنىڭ بۇ جەرياننى ھەر جەھەتتىن قوللاشقا تەييار ئىكەنلىكىنى قوشۇمچە قىلدى.
ئەردوغان يەنە قاراباغ ئۇرۇشىدا جەڭ قىلغان ئەزەربەيجانلىق ئەسكەرلەر ۋە غازىلارغا چوڭقۇر ھۆرمەت بىلدۈرۈپ، ئۇلارنىڭ كۈرىشىنى «قەھرىمانلىق» دەپ تەرىپلىدى.
جۇمھۇر رەئىس ئەردوغان قاراباغدىكى غەلىبىنىڭ «رايوندىكى گېئوپولىتىكىلىق تەڭپۇڭلۇقنى ئۆزگەرتكەنلىكى» نى بىلدۈرۈپ، تۈركىيەنىڭ ئەزەربەيجاننىڭ ئىلگىرىلىشىدىن پەخىرلىنىدىغانلىقىنى ئېيتتى.
بارغانسېرى تەرەققىي قىلىۋاتقان ئىككى تەرەپلىك مۇناسىۋەتلە ئۈستىدىمۇ توختالغان جۇمھۇر رەئىس، تەبىئىي گاز تۇرۇبا يولى ۋە قاتناش كارىدورى قاتارلىق چوڭ كۆلەملىك ئېنېرگىيە لايىھەلىرىنىڭ ئىككى دۆلەت ئوتتۇرىسىدىكى ھەمكارلىقنى كۈچەيتكەنلىكى تەرەپكە ھەممىنىڭ دىققىتىنى تارتتى.
