ئاغدۇرۇپ تاشلانغان ۋېنېزۇئېلا پىرېزىدېنتى نىكولاس مادۇرۇنى قوللايدىغان تەخمىنەن 2000 كىشى يەكشەنبە كۈنى كاراكاستا نامايىش ئۆتكۈزۈپ، ئامېرىكا كۈچلىرى تەرىپىدىن تۇتقۇن قىلىنىپ نيۇيوركقا ئېلىپ كېتىلگەن مادۇرۇ ۋە رەپىقىسىنىڭ قويۇپ بېرىلىشىنى تەلەپ قىلدى.
نامايىشچىلار ۋېنېزۇئېلا بايرىقىنى پۇلاڭلىتىپ، «جۇمھۇر رەئىسىمىزنى قويۇپ بېرىڭلار» دەپ يېزىلغان لوزۇنكىلارنى كۆتۈردى. شۇنداقلا، ترامپنىڭ ۋاشىنگتوننىڭ ۋېنېزۇئېلانى «باشقۇرىدىغانلىقى» ھەققىدىكى سۆزىگە جاۋابەن، «ۋېنېزۇئېلا ھېچكىمنىڭ مۇستەملىكىسى ئەمەس» دەپ توۋلىدى.
ۋېنېزۇئېلا مۇداپىئە مىنىستىرى ۋلادىمىر پادرىنو لوپېز، مادۇرۇنىڭ بىخەتەرلىك گۇرۇپپىسى، ھەربىي خادىملار ۋە پۇقرالارنىڭ «رەھىمسىزلەرچە» ئۆلتۈرۈلگەنلىكىنى ئېيتتى. دوختۇرلاردىن ئىگىلەنگەن مەلۇماتلارغا قارىغاندا، تەخمىنەن 70 كىشى ئۆلگەن، 90 كىشى يارىلانغان.
كاراكاستىكى نامايىشچىلار مادۇرۇنىڭ يېقىن ئەتراپىدىكى خائىنلار تەرىپىدىن سېتىلغانلىقىغا، بۇ خىيانەتنىڭ ئامېرىكا ئالاھىدە قىسىملىرىنىڭ ھەربىي بازىغا كىرىپ ئۇنى تۇتۇۋېلىشىغا يول ئاچقانلىقىغا ئىشىنىدۇ. مادۇرۇنىڭ ئوغلىمۇ ئىجتىمائىي تاراتقۇدا بايانات ئېلان قىلىپ : «خائىنلارنىڭ كىملىكىنى تارىخ كۆرسىتىپ بېرىدۇ» دېدى.
