تۈركىيە جۇمھۇرىيىتى ئەدلىيە مىنىستىرى ئاقىن گۈرلەك، ئىسرائىلىيە باش مىنىستىرى بېنيامىن نېتانياھۇغا قارىتا «ئىرقىي قىرغىنچىلىق» جىنايىتى بىلەن قوزغالغان سوتلىنىش دائىرىسىدە، خەلقئارا جىنايى ئىشلار ساقچى تەشكىلاتى (INTERPOL) تەرىپىدىن «قىزىل رەڭلىك تۇتۇش بۇيرۇقى» چىقىرىشنىڭ تەلەپ قىلىنغانلىقىنى ئېلان قىلدى.
مىنىستىر گۈرلەك ئاممىۋى ئورتاقلىشىش تور بېتى NSosyal سەھىپىسىدە ئېلان قىلغان باياناتىدا، غەززەگە ئىنسانپەرۋەرلىك ياردەم يەتكۈزۈش ئۈچۈن يولغا چىققان «خەلقئارا سۇمۇد فىلوتى» كىشىلىك ھوقۇق پائالىيەتچىلىرىگە قارىتا خەلقئارا سۇ تەۋەلىكىدە ئېلىپ بېرىلغان ھۇجۇمغا مۇناسىۋەتلىك ئەدلىيەلىك مۇساپىنىڭ قەتئىيلىك بىلەن داۋاملىشىۋاتقانلىقىنى تەكىتلىدى.
ئىستانبۇل 11-ئېغىر جىنايى ئىشلار سوت مەھكىمىسى تەرىپىدىن نېتانياھۇ ۋە ئافەك موسكوۋىتچنى ئۆز ئىچىگە ئالغان 35 جاۋابكار ئۈستىدىن سوتلىنىش مۇساپىسىنىڭ داۋاملىشىۋاتقانلىقىنى ئەسكەرتكەن گۈرلەك مۇنداق دېدى:
«دەۋا دائىرىسىدە نېتانياھۇ ۋە ئافەك موسكوۋىتچ ئۈستىدىن <ئىرقىي قىرغىنچىلىق> جىنايىتى بىلەن 2026-يىلى 14-ئىيۇلدا چىقىرىلغان تۇتقۇن قىلىش بۇيرۇقىغا ئاساسەن، ئەدلىيە مىنىستىرلىقىمىز تەرىپىدىن ئۇلارنى خەلقئارا سەۋىيەدە تۇتۇش ئۈچۈن <قىزىل رەڭلىك تۇتۇش بۇيرۇقى> چىقىرىش تەكلىپى ئىچكى ئىشلار مىنىستىرلىقىمىزغا سۇنۇلدى، مۇناسىۋەتلىك ھۆججەتلەر تاشقى ئىشلار مىنىستىرلىقىمىزغا ئەۋەتىلدى.»
گۈرلەك نېتانياھۇ ۋە موسكوۋىتچنىڭ غەززەگە ئىنسانپەرۋەرلىك ياردەم يەتكۈزۈۋاتقان پۇقرالارغا خەلقئارا سۇ تەۋەلىكىدە قوراللىق ھۇجۇم قىلىش ۋە كىشىلىك ھوقۇق پائالىيەتچىلىرىنى تۇتقۇن قىلىش قىلمىشلىرى تۈپەيلىدىن «ئىنسانىيەتكە قارىشى جىنايەت»، «ئىرقىي قىرغىنچىلىق»، «ئادەم تۇتقۇن قىلىش»، «قەستەن يارىلاندۇرۇش»، «خورلاش»، «مال-مۈلۈككە زىيان يەتكۈزۈش»، «ئېغىر تالان-تاراج» ۋە «قاتناش ۋاسىتىلىرىنى قاچۇرۇش» قاتارلىق جىنايەتلەر بىلەن سوتلىنىۋاتقانلىقىنى بىلدۈردى.
ئەدلىيە مىنىستىرى غەززەدە ئىرقىي قىرغىنچىلىق سىياسىتى يۈرگۈزۈۋاتقان نېتانياھۇ ھاكىمىيىتىنىڭ دەخلى-تەرۇز قىلىنغىلى بولمايدىغان ۋە جاۋابكارلىققا تارتىلمايدىغانلىقىغا دائىر قاراشنى ھەرگىز قوبۇل قىلمايدىغانلىقىنى تەكىتلەپ: «غەززەدە سادىر قىلىنغان جىنايەتلەرنىڭ يوشۇرۇپ قېلىنىشىغا، جاۋابكارلارنىڭ جازالاشتىن قۇتۇلۇپ قېلىشىغا يول قويمايمىز. دۆلەت ئىچى ۋە خەلقئارا قانۇننىڭ بارلىق ئىمكانىيەتلىرىنى قەتئىيلىك بىلەن ئىشقا سالىمىز» دېدى.
تۈركىيە 2025-يىلى نويابىردا غەززەدىكى ئىرقىي قىرغىنچىلىقتا رولى بولغان نېتانياھۇ ۋە باشقا گۇماندارلار ئۈستىدىن تۇتقۇن قىلىش بۇيرۇقى چىقارغان ئىدى. مەزكۇر بۇيرۇقلار ئىسرائىلىيەنىڭ غەززەدىكى پۇقرالارغا قارىتا ئېلىپ بارغان «سىستېمىلىق» ھۇجۇملىرى، ئىرقىي قىرغىنچىلىق قىلمىشلىرى ۋە ئىنسانىيەتكە قارىشى جىنايەتلىرى ئۈستىدىكى ئەتراپلىق تەكشۈرۈشتىن كېيىن ئېلان قىلىنغان ئىدى.
