سەيشەنبە كۈنى ئېلىپ بېرىلغان بېلەت تاشلاشتا، كېڭەش پالاتاسى ھۆكۈمەتنى 21-نويابىرغىچە مەبلەغ بىلەن تەمىنلەشنى بەلگىلەيدىغان ۋە ئاۋام پالاتاسىدا ماقۇللانغان قانۇن لايىھەسىنىڭ تەستىقلىنىشى ئۈچۈن زۆرۈر بولغان ئاۋازغا ئېرىشەلمىدى. 49 ئاۋازغا قارشى 45 ئاۋازغا ئېرىشكەن قانۇن لايىھەسىنىڭ تەستىقلىنىشى ئۈچۈن 60 ئاۋازغا ئېرىشىشى شەرت ئىدى.
ھەر ئىككى پارتىيە ھۆكۈمەتنىڭ قايتىدىن ئېچىلىشىغا توسقۇنلۇق قىلىش بىلەن بىر-بىرىنى ئەيىبلەشنى داۋاملاشتۇرماقتا.
ماقۇللىنىشى ئۈچۈن 60 ئاۋازغا ئېرىشىشى شەرت بولغان قانۇن لايىھەسىنى كۆپ ساندىكى دېموكراتىلار ۋە بىرنەچچە جۇمھۇرىيەتچى پالاتا ئەزاسى رەت قىلىپ ئاۋاز بەردى. دېموكراتىك گۇرۇپپا ئىچىدىكى نېۋادا پالاتا ئەزاسى كاتېرىن كورتېز ماستو ۋە مايىنېدىن مۇستەقىل پالاتا ئەزاسى ئانگۇس كىڭ، قانۇن لايىھەسىنى قوللىغان جۇمھۇرىيەتچىلەرنىڭ قاتارىدىن ئورۇن ئالدى.
جۇمھۇرىيەتچى پالاتا ئەزاسى راند پائۇل قانۇن لايىھەسىنى رەت قىلىپ ئاۋاز بەردى. بۇ ئەھۋال جۇمھۇرىيەتچىلەرنىڭ كەم دېگەندە سەككىز دېموكرات پالاتا ئەزاسىنىڭ قوللىشىغا ئېھتىياجلىق بولۇشىنى كەلتۈرۈپ چىقاردى. كېڭەش پالاتاسىدىكى كۆپ سانلىقلار رەھبىرى جون تۇنېمۇ «قايتا قاراپ چىقىش تەكلىپى» سۇنۇش ئۈچۈن «رەت قىلىپ» ئاۋاز بەردى.
بۇرۇنقى بېلەت تاشلاشلاردا قانۇن لايىھەسىنى قوللىغان دېموكرات پالاتا ئەزاسى جون فېتتېرمان، سەيشەنبە كەچتىكى بېلەت تاشلاشقا قاتناشمىدى.
ئىقتىسادىي جەھەتتىن بىر ئىزدا توختاپ قېلىش
ھۆكۈمەتنىڭ تاقىلىپ قېلىشى بىۋاسىتە زور ئىقتىسادىي كىرىزىسنى كەلتۈرۈپ چىقارمىسىمۇ، ئامېرىكادا كۈندىلىك ھاياتنىڭ نۇرغۇن ساھەلىرىدە ئېغىر قالايمىقانچىلىقلارنى كەلتۈرۈپ چىقارماقتا، ھەمدە دۇنيادىكى ئەڭ چوڭ ئىقتىسادىي گەۋدىنىڭ ئەھۋالىغا مۇناسىۋەتلىك ئېنىقسىزلىقنى ئاشۇرماقتا.
نۇرغۇن فېدېراتسىيە خىزمەتچى خادىملىرى يا مائاشسىز ئىشلەشكە مەجبۇر بولماقتا ياكى تاكى يېڭى خامچوت لايىھەسى ماقۇللانغانغا قەدەر مەجبۇرىي دەم ئېلىشقا چىقىرىلماقتا. ھەر بىر فېدېراتسىيە ئورگىنىنىڭ قايسى خىزمەتچىلىرنىڭ «ھالقىلىق» ئىكەنلىكىنى بەلگىلەيدىغان ئۆزىنىڭ تاقىلىش پىلانى بار.
ھۆكۈمەت تاقىلىپ قالغان 1-ئۆكتەبىردىن بۇيان، ترامپ ھۆكۈمىتى 4108 خىزمەتچى خادىمنى ئىشتىن بوشاتتى. پىرېزىدېنت دونالد ترامپ ھۆكۈمەتنىڭ تاقىلىپ قېلىشى سەۋەبىدىن تاقىلىدىغان دېموكراتىك پىروگراممىلارنىڭ تىزىملىكىنى ئېلان قىلىدىغانلىقىنىمۇ بىلدۈردى.
