ياۋروپا ئىتتىپاقى تاشقى مۇناسىۋەتلەر ۋە خەۋپسىزلىك سىياسىتى ئالىي ۋەكىلى كايا كاللاس (Kaja Kallas) گىرېتسىيەنىڭ ئالدىنقى قاتاردىكى گېزىتلىرىدىن بىرى بولغان «Ta Nea»غا بەرگەن باياناتىدا، ياۋروپا ئىتتىپاقىنىڭ بولۇپمۇ مۇداپىئە ساھەسىدە تۈركىيە بىلەن ھەمكارلىق ئورنىتىشقا ئىنتايىن ئېھتىياجلىق ئىكەنلىكىنى بىلدۈردى.
كايا كاللاس ياۋروپا ئىتتىپاقىنىڭ 150 مىليارد ياۋرولۇق مۇداپىئە پىلانى بولغان «SAFE»قا تۈركىيەنىڭ قاتنىشىشىنى توسۇشقا تىرىشىۋاتقان گىرېتسىيەگە قاراتقان ئاگاھلاندۇرۇش تۈسىدىكى سۆزلىرىنى داۋاملاشتۇرۇپ مۇنداق دېدى:
«بىز تۈركىيە بىلەن ئىمكانقەدەر كۆپرەك ھەمكارلىق ئورنىتىشنى تەۋسىيە قىلىمىز. مۇداپىئە ساھەسىگە كەلسەك، تۈركىيەنىڭ ‹SAFE› پىلانىغا قاتناشماسلىقى سەۋەبىدىن، نۆۋەتتە ياۋروپا ئىتتىپاقىغا ئەزا دۆلەتلەر تۈركىيە بىلەن تېخىمۇ يېقىن ھەمكارلىق ئورنىتىش ئۈچۈن تىرىشىۋاتىدۇ؛ چۈنكى ئۇلارنىڭ كۆپىنچىسى تۈركىيە بىلەن بىرلىكتە ناتودا ئورۇن ئالماقتا ۋە تۈركىيە ئۇ يەردىمۇ ئىنتايىن مۇھىم رول ئوينىماقتا.»
كاللاس گىرېتسىيە گېزىتى مۇخبىرىنىڭ «تۈركىيەنىڭ ياۋروپا ئىتتىپاقىغا ئەزا ئىككى دۆلەتكە تەھدىت سېلىۋاتقانلىقى» توغرىسىدىكى قۇترىتىش خاراكتېرلىك سوئالىغا جاۋاب بەرگەندە، ياۋروپانىڭ دەل مۇشۇ خىل مۇداپىئە ساھەسىدە تۈركىيە بىلەن ھەمكارلىشىشقا مۇھتاج ئىكەنلىكىنى قايتا ئەسكەرتىپ، تۈركىيەنىڭ ياۋروپا خەۋپسىزلىك سىستېمىسىدىكى مۇھىم ئورنىنى ئالاھىدە تەكىتلىدى.
