ئەنقەرە، ياۋروپا پارلامېنتىنىڭ 2023-2024-يىللىق تۈركىيە دوكلاتىنى «ئەمەلىيەتكە ئۇيغۇن بولمىغان، بىر تەرەپلىمە يەكۈنلەرگە ئاساسلانغان» دەۋالار بىلەن تۈركىيەگە قارشى پىكىرلەرنى تەرغىب قىلغانلىقى ھەمدە ياۋروپا ئىتتىپاقى-تۈركىيە مۇناسىۋىتىنى ئاجىزلاشتۇرغانلىقىنى ئىلگىرى سۈرۈپ ئەيىبلىدى.
تۈركىيە، ياۋروپا پارلامېنتىنىڭ 2023-2024-يىللىق تۈركىيە دوكلاتىنى قەتئىي رەت قىلدى ۋە ئۇنى ئەنقەرەنىڭ ئىچكى ۋە تاشقى سىياسەتلىرىگە قارىتىلغان «ئەمەلىيەتكە ئۇيغۇن بولمىغان، بۇرمىلانغان ۋە بىر تەرەپلىمە قاراشلار بىلەن تولغان» بىر ھۆججەت دەپ ئاتىدى.
تۈركىيە تاشقى ئىشلار مىنىستىرلىقى چارشەنبە كۈنى بايانات ئېلان قىلىپ، ياۋروپا پارلامېنتى ئومۇمىي يىغىنىدا قوبۇل قىلىنغان مەزكۇر دوكلاتنى تەنقىد قىلدى ۋە بۇ ھۆججەتنىڭ «تېررورلۇق تەشكىلاتلىرىنى ۋە تۈركىيەگە قارشى كۈچلەرنى قوللاشنى ئۆزىنىڭ مەۋجۇتلۇق ئاساسى قىلغان بەزى گۇرۇھلارغا تەشۋىقات مەيدانى ھازىرلاپ بېرىدىغان» ياۋروپا پارلامېنتىنىڭ بىر تەرەپلىمە قاراشلىرىنى ئەكس ئەتتۈرىدىغانلىقىنى بىلدۈردى.
باياناتتا يەنە: «تېررورلۇق تەشكىلاتلىرىنى ۋە تۈركىيەگە قارشى كۈچلەرنى ئۆزىنىڭ مەۋجۇتلۇق ئاساسى قىلغان بەزى گۇرۇھلارغا تەشۋىقات سورۇنى ھازىرلاپ بېرىدىغان ياۋروپا پارلامېنتىنىڭ دۆلىتىمىزدىكى سىياسىي ۋەزىيەت، تاشقى سىياسىتىمىز ھەمدە جۇمھۇر رەئىسىمىزنىڭ شىمالىي قىبرىس تۈرك جۇمھۇرىيىتىدە ئېلىپ بارغان زىيارىتىگە دائىر ئاساسسىز باھالىرىنى قەتئىي رەت قىلىمىز» دېگەن ئىبارىلەرگە ئورۇن بېرىلدى.
مىنىستىرلىق باياناتىدا يەنە ياۋروپا پارلامېنتىنى، بولۇپمۇ تۈركىيەنىڭ ئۇزۇندىن بۇيان داۋاملىشىۋاتقان ياۋروپا ئىتتىپاقىغا ئەزا بولۇش ئىلتىماسى نۇقتىسىدىن، تېخىمۇ ئىجابىي ۋە تەڭپۇڭ پوزىتسىيەدە بولۇشقا چاقىردى.
بايانات: «كەلگۈسىدە، ياۋروپا ئىتتىپاقىغا ئەزا بولۇش مۇساپىمىزنىمۇ ئۆز ئىچىگە ئالغان ھالدا، ياۋروپا ئىتتىپاقى بىلەن بولغان مۇناسىۋىتىمىزنىڭ ئۆزئارا مەنپەئەت يەتكۈزۈش ئاساسىدا راۋاجلىنىشى ئۈچۈن، ياۋروپا پارلامېنتىنىڭ ئۆز مەسئۇلىيىتىنى ئادا قىلىشىنى كۈتىمىز» دېگەن ئىبارىلەر بىلەن ئاخىرلاشتۇرۇلدى.
