جەنۇبىي كورېيە ھەربىي تەييارلىقنى كۈچەيتىش ۋە رايوندىكى يوشۇرۇن تەھدىتلەرنىڭ ئالدىنى ئېلىش ئۈچۈن، ئامېرىكادىن 624 دانە كىچىك دىئامېتىرلىق بومبا سېتىۋالىدۇ.
ئامېرىكا تاشقى ئىشلار مىنىستىرلىقى ئامېرىكا دۆلەت مۇداپىئە بىخەتەرلىك ھەمكارلىق ئىدارىسى (Defense Security Cooperation Agency) نىڭ جۈمە (2025-يىلى 5-دېكابىر) كۈنىدىكى باياناتىدا بىلدۈرۈلگىنىدەك، جەنۇبىي كورېيەگە قىممىتى 111 مىليون 800 مىڭ دوللار بولغان قورال-ياراغ سېتىپ بېرىش پىلانىنى تەستىقلىدى.
ئامېرىكا دۆلەت مۇداپىئە بىخەتەرلىك ھەمكارلىق ئىدارىسى جەنۇبىي كورېيەنىڭ قوشۇمچە 624 دانە «GBU-39/B» تىپلىق كىچىك دىئامېتىرلىق بومبا سېتىۋېلىشنى تەلەپ قىلغانلىقىنى بىلدۈردى.
بۇ بومبىلارنى كۈرەشچى ئايروپىلانلار بىلەن قۇرۇقلۇقتىكى نىشانلارغا يۇقىرى ئېنىقلىق بىلەن تاشلىغىلى بولىدىغان بولۇپ، تانكا ۋە بىرونىۋىكلارنى ۋەيران قىلىش كۈچىگە ئىگە.
تەۋسىيە
باياناتتا مۇنداق دېيىلدى: «بۇ قېتىمقى قورال-ياراغ سېتىش، ئاسىيا-تىنچ ئوكيان رايونىدىكى سىياسىي مۇقىملىق ۋە ئىقتىسادىي تەرەققىياتنىڭ مۇھىم كۈچى ھېسابلىنىدىغان بىر چوڭ ئىتتىپاقداشنىڭ بىخەتەرلىكىنى مۇستەھكەملەش ئارقىلىق ئامېرىكانىڭ تاشقى سىياسىتى ۋە دۆلەت بىخەتەرلىك نىشانلىرىنى قوللايدۇ.»
باياناتتا يەنە مۇنداق دېيىلدى: «بۇ بومبىلار جەنۇبىي كورېيەنىڭ ‹نۆۋەتتىكى ۋە كەلگۈسىدىكى تەھدىتلەرگە تاقابىل تۇرۇشى ۋە رايوندىكى تاجاۋۇزچىلىقنى توسۇشىغا ياردەم بېرىدۇ، شۇنداقلا جەنۇبىي كورېيە ئارمىيەسىنىڭ ئامېرىكا ھەربىي قىسىملىرى بىلەن راۋان ماسلىشىپ ھەرىكەت قىلىشىغا كاپالەتلىك قىلىدۇ.»
جەنۇبىي كورېيەگە سېتىلىدىغان قورال-ياراغلار ئامېرىكانىڭ دۆلەت مۇداپىئە شىركىتى «بويىڭ»(Boeing) تەرىپىدىن ئىشلەپچىقىرىلىدىغان بولۇپ، سېتىش-سېتىۋېلىش ئىشلىرىنىڭ ئەمەلگە ئېشىشى ئۈچۈن ئامېرىكا ھۆكۈمىتىنىڭ قوشۇمچە خادىملىرى ياكى ھۆددىگەرلىرىنىڭ جەنۇبىي كورېيەگە ئەۋەتىلىشىگە كېرەك يوق ئىكەن.
مۇناسىۋەتلىك ئۇچۇرلارTRT World - US to work closely with South Korea on nuclear submarines — Pentagon
