ئامېرىكانىڭ نام-شەرىپىنى ئاشكارىلاشنى خالىمىغان يۇقىرى دەرىجىلىك بىر ئەمەلدارى ئىسرائىلىيە باش مىنىستىرى بېنيامىن نېتانياھۇنى قاتتىق ئاگاھلاندۇرۇپ، ئەگەر ئىسرائىلىيە بىلەن ھاماس ئوتتۇرىسىدىكى ئۇرۇش توختىتىش كېلىشىمىنىڭ يىمىرىلىشىگە يول قويسا، ئامېرىكا پىرېزىدېنتى دونالد ترامپنىڭ قاتتىق جازاسىغا دۇچ كېلىدىغانلىقىنى ئېيتتى. بۇ خەۋەر ئىسرائىلىيە 12-قانىلىدا ئېلان قىلىندى.
ئاكسىيوس (Axios) مۇخبىرى ئىبرانىيچە تارقىتىدىغان ئىسرائىلىيە 12-قانىلىدا، ئامېرىكا ئەمەلدارىنىڭ نېتانياھۇنى «پىرېزىدېنت ترامپنىڭ ئالدىدا ناھايىتى ئىنچىكە ئارغامچا ئۈستىدە مېڭىۋاتقانلىقى» توغرىسىدا ئاگاھلاندۇرغانلىقىنى ئېيتتى ۋە ئۇ ئەمەلدارنىڭ، «بۇنداق داۋاملىشىۋەرسە كېلىشىم بۇزۇلىدۇ ۋە كېلىشىم بۇزۇلسا، دونالد ترامپ ئۇنى جازالايدۇ» دېگەنلىكىنى بىلدۈردى.
بۇ خەۋەرلەر، ئىسرائىلىيە پارلامېنتى-كېنسېتنىڭ ئىشغال قىلىنغان ئىيوردان دەرياسىنىڭ غەربىي قىرغىقىنىڭ بىر قىسمىنى ئۆزىگە قوشۇۋېلىشقا مۇناسىۋەتلىك قانۇن لايىھەسىنى قوبۇل قىلغاندىن كېيىن، ۋاشىنگتون بىلەن تېل ئاۋىۋ ئوتتۇرىسىدا جىددىيلىكنى تېخىمۇ ئۇلغايتقان بىر ۋاقىتتا ئېلان قىلىندى.
خەۋەرلەردە بىلدۈرۈلىشىچە، پەيشەنبە (23-ئۆكتەبىر) كۈنى ئىسىرائىلىيە زىيارىتىنى ئاخىرلاشتۇرغان مۇئاۋىن پىرېزىدېنت ج د ۋەنىس (JD Vance) ئىسىرائىلىيە پارلامېنتىنىڭ بىر كۈن ئىلگىرى ئىيوردان دەرياسىنىڭ غەربىي قىرغىقىنى ئۆزىگە قوشۇۋېلىش قانۇن تەكلىپ لايىھەسىنى تەستقلىغانلىقىنى بىلگەندە ئىنتايىن ھەيران قالغان.
ۋەنس تېل ئاۋىۋدىكى بېن گۇرىئون ئايرودۇرۇمىدا مۇخبىرلارغا سۆز قىلغاندا، ئىسىرائىلىيە پارلامېنتىدىكى بېلەت تاشلاشنى تەنقىد قىلىپ مۇنداق دېدى:
«ئەگەر بۇ سىياسىي ھىيلە بولسا، بۇ ناھايىتى ئەخمەقلىق. مەن شەخسەن بۇنىڭدىن بىئارام بولدۇم.»
ئىسرائىلىيەنىڭ ھەرىكىتى ترامپنىڭ ئاچچىقىنى كەلتۈرۈپ قويدى
بىر ئىسرائىلىيە ئەمەلدارى 12-قانالنىڭ زىيارىتىنى قوبۇل قىلغاندا، نېتانياھۇنىڭ بىر نەچچە كۈن ئىلگىرى بۇنداق ھەرىكەتنىڭ كۈچلۈك ئىنكاس قوزغايدىغانلىقى توغرىسىدا ئاگاھلاندۇرۇلغانلىقىنى، ئەمما ئۇنىڭ بېلەت تاشلاشنىڭ ئالدىنى ئېلىش ئۈچۈن ھېچقانداق ئىش قىلمىغانلىقىنى ئېيتتى.
ئىسىرائىلىيە پارلامېنتىدا ئىيوردا دەرياسىنىڭ غەربىي قىرغىقىنى قوشۇۋېلىش قانۇن تەكلىپ لايىھەسى ئۈچۈن ئىككى قېتىملىق بېلەت تاشلاندى. بۇ قانۇن-تەكلىپ لايىھەسىنىڭ ئوقۇلۇش باسقۇچى ھېسابلىنىدۇ. بۇنىڭ تولۇق قانۇنغا ئايلىنىشى ئۈچۈن يەنە ئۈچ قېتىم بېلەت تاشلىنىشى كېرەك.
بۇ قانۇن لايىھەسى ئۆتكەن ئاي (سېنتەبىر) پىرېزىدېنت ترامپنىڭ ئاشكارا قارشى تۇرىدىغانلىقىنى بىلدۈرگەنلىكىگە قارىماي ئاۋازغا قويۇلدى.
پىرېزىدېنت ترامپ «ئىسرائىلىيەنىڭ ئىيوردان دەرياسىنىڭ غەربىي قىرغىقىنى ئۆزىگە قوشۇۋېلىشىغا يول قويمايدىغانلىقى» نى ئېيتقان ئىدى.
مۇئاۋىن پىرېزىدېنت ج د ۋەنسنىڭ ئىسىرائىلىيە زىيارىتى، ئىسىرائىلىيە پارلامېنتىدىكى ئىيوردان دەرياسىنىڭ غەربىي قىرغىقىغا مۇناسىۋەتلىك بېلەت تاشلاش بىلەن ئوخشاش ۋاقىتقا توغرا كەلدى.
ج د ۋەنس 10-ئۆكتەبىر ئىجرا قىلىنىشقا باشلىغان غەززە ئۇرۇش توختىتىش كېلىشىمى قوغداش تىرىشچانلىقلىرىنىڭ بىر قىسمى سۈپىتىدە ئىسىرائىلىيەدە زىيارەتتە بولغان ئىدى.
مۇناسىۋەتلىك ئۇچۇرلارTRT World - Israeli Knesset move to annex occupied West Bank a threat to Gaza deal — Rubio
