تاشقى ئىشلار مىنىستىرلىقى مەنبەلىرىدىن ئىگىلەنگەن ئۇچۇرلارغا ئاساسلانغاندا، فىدان زىيارىتىنىڭ بىرىنچى كۈنى تورونتو شەھىرىدىكى دارلىڭتون يادرو ئەسلىھەسىنى ئېكسكۇرسىيە قىلىدۇ.

مەزكۇر ئەسلىھەنى زىيارەت قىلىش ئارقىلىق، كانادانىڭ يادرو ئېنېرگىيەسى ساھەسىدىكى ئىقتىدارىنى نەق مەيداندا كۆزدىن كەچۈرۈش مەقسەت قىلىنماقتا.

مىنىستىر خاقان فىداننىڭ سودا-سانائەتچىلەر، ئاممىۋى تەشكىلاتلارنىڭ مەسئۇللىرى ۋە ئاكادېمىكلارنىڭ ئىشتىراكىدا ئۆتكۈزۈلىدىغان يىغىنغا قاتنىشىشى، زىيارىتىنىڭ ئىككىنچى كۈنى پايتەخت ئوتتاۋادا كانادا تاشقى ئىشلار مىنىستىرى ئانىتا ئاناند بىلەن كۆرۈشۈشى پىلانلانماقتا.

زىيارەت دائىرىسىدە ئۆتكۈزۈلىدىغان سۆھبەتلەردە، فىداننىڭ تۈركىيە-كانادا مۇناسىۋەتلىرىنى ۋە ھەمكارلىقىنى چوڭقۇرلاشتۇرۇش ھەمدە كۆپ خىللاشتۇرۇش بىلەن بىرگە، مۇناسىۋەتلەرنى ئىستراتېگىيەلىك شېرىكچىلىك سەۋىيەسىگە يەتكۈزۈش مەسىلىلىرىدىكى قاراشلىرىنى ۋە كۈتۈنۈشلىرىنى ئوتتۇرىغا قويۇشى مۆلچەرلەنمەكتە.

بۇ دائىرىدە، فىداننىڭ يۇقىرى دەرىجىلىك ئۇچرىشىشلار ۋە ئۆزئارا زىيارەتلەرنى كۆپەيتىشنىڭ پايدىلىق بولىدىغانلىقىنى تىلغا ئېلىشى، 2025-يىلى 2 مىليارد 700 مىليون دوللار ئەتراپىدا بولغان ئىككى تەرەپلىك سودا سوممىسىنى تەڭپۇڭ ۋە سىجىل تەرىقىدە يۇقىرى كۆتۈرۈش ھەمدە سودا يولىدىكى توسالغۇلارنى ئازايتىشقا قارىتىلغان خىزمەتلەرنى كۈچەيتىش كېرەكلىكىنى تەكىتلىشى پىلانلانماقتا.

باشلانغان ئەركىن سودا كېلىشىمى مۇساپىسىنى كېچىكتۈرمەي نەتىجىلەندۈرۈش كۈتۈنۈشىنى يەتكۈزۈشى مۆلچەرلىنىۋاتقان فىداننىڭ، تۈركىيە بىلەن كانادا ئوتتۇرىسىدا يادرو ئېنېرگىيەسى ساھەسىنىمۇ ئۆز ئىچىگە ئالغان ئېنېرگىيە ساھەسىدە يېڭى ھەمكارلىق پۇرسەتلىرىنى يارىتىشقا بولىدىغانلىقىنى بىلدۈرۈشى، دۆلەت مۇداپىئە سانائىتى ساھەسىدە تېخىمۇ ئىلگىرىلىگەن ھالدا ھەمكارلىق ئورنىتىش ۋە ئىككى تەرەپلىك ھەربىي مۇناسىۋەتلەرنىڭ شەرتنامە ئاساسىنى يارىتىش يۆنىلىشىدىكى ئورتاق تىرىشچانلىقلارنى كۈچەيتىش كېرەكلىكىنى تەكىتلىشى كۆزدە تۇتۇلماقتا.

فىداننىڭ ئامېرىكا بىلەن ئىران ئوتتۇرىسىدا ھاسىل قىلىنغان كېلىشىمنى بۇزۇشقا قارىتىلغان ئىغۋاگەرچىلىكلەرگە قارشى ھوشيار تۇرۇش كېرەكلىكىنى تىلغا ئېلىشى، رۇسىيە بىلەن ئۇكرائىنا ئوتتۇرىسىدا يېقىنقى مەزگىلدە توقۇنۇشلارنىڭ كەسكىنلىشىشىنىڭ خەلقئارا جەمئىيەتتە پەيدا قىلغان ئەندىشىلىرىنى كۆرسىتىپ ئۆتۈشى كۈتۈلمەكتە.

ئىككى تەرەپلىك مۇناسىۋەتلەر

مىنىستىر ئاناند ئەڭ ئاخىرقى قېتىم 17-مارتتا تۈركىيەنى زىيارەت قىلغان ئىدى.

2025-يىلى ئىككى دۆلەت ئوتتۇرىسىدىكى ئومۇمىي سودا سوممىسى 2 مىليارد 700 مىليون دوللارغا يەتكەن بولۇپ، تۈركىيەنىڭ ئېكسپورتى 1 مىليارد 570 مىليون دوللار، ئىمپورتى بولسا 1 مىليارد 160 مىليون دوللارغا يەتكەن ئىدى.

مايدا تۈركىيە ھاۋا يوللىرى شىركىتىنىڭ كاناداغا ئىشقا ئاشۇرىدىغان ھەپتىلىك ئايروپىلان سەپىرىنىڭ سانى 12 دىن 21 گە كۆپەيتىلگەن ئىدى.