تۈركىيە ئىلغار كۈرەشچى ئايروپىلان «ياۋروپا كۈرەشچى تايفۇن»نى ئىشلەتكۈچى دۆلەت بولۇش يولىدا مۇھىم بىر قەدەم تاشلاپ، ئەنگلىيە بىلەن كېلىشىم ئىمزالىدى.
تۈركىيە بىلەن ئەنگلىيە، چارشەنبە كۈنى ئىستانبۇلدا ئۆتكۈزۈلگەن خەلقئارا دۆلەت مۇداپىئە سانائىتى يەرمەنكىسى دائىرىسىدە، بۇ ھەقتە بىر «ھەمكارلىق كېلىشىمى» ئىمزالىغانلىقىنى جاكارلىدى.
مەزكۇر كېلىشىم تۈركىيە دۆلەت مۇداپىئە مىنىستىرى ياشار گۈلەر بىلەن ئەنگلىيە دۆلەت مۇداپىئە مىنىستىرى جون ھېلېي ئوتتۇرىسىدىكى يۇقىرى دەرىجىلىك ئۇچرىشىشتىن كېيىن ئىمزالانغان بولۇپ، بۇ، تېخىمۇ كەڭ دائىرىلىك دۆلەت مۇداپىئە ھەمكارلىقىغا قاراپ تاشلانغان مۇھىم قەدەم ھېسابلىنىدۇ.
تۈركىيە دۆلەت مۇداپىئە مىنىستىرلىقىنىڭ باياناتىدا، مەزكۇر كېلىشىمنىڭ تۈركىيەنىڭ «ياۋروپا كۈرەشچى ئايروپىلانى»نى ئۆز ئارمىيەسىگە سەپلەش يولىدا ئەنگلىيە بىلەن ھەمكارلىشىشنىڭ يول خەرىتىسىنى سىزىپ بەرگەنلىكى قەيت قىلىندى.
مەزكۇر ھەمكارلىق كېلىشىمى، جۇمھۇر رەئىس رەجەپ تاييىپ ئەردوغان بىلەن ئەنگلىيە باش ۋەزىرى كېيىر ستارمېرنىڭ تېلېفون سۆھبىتىدە كېلىشىم جەريانىنى مۇزاكىرە قىلغىنىدىن بىر كۈن كېيىن ئىمزالاندى.
تۈركىيە، گېرمانىيە، ئەنگلىيە، ئىتالىيە ۋە ئىسپانىيە بىرلىشىپ ئىشلەپچىقارغان 40 دانە «ياۋروپا كۈرەشچى ئايروپىلانى»نى سېتىۋېلىش ئۈچۈن سۆھبەت ئېلىپ بارماقتا؛ ئەنقەرە بۇ ئايروپىلانلارنى سېتىۋېلىش تەلىپىنى تۇنجى قېتىم 2023-يىلى مارتتا ئوتتۇرىغا قويغانىدى.
گېرمانىيە تەمىنلىگەن زاپچاسلار بىلەن ئەنگلىيەدە ئىشلەپچىقىرىلىدىغان «ياۋروپا كۈرەشچى تايفۇن» ئايروپىلانى، دۇنيادىكى ئەڭ ئىلغار 4.5-ئەۋلاد كۆپ ئىقتىدارلىق كۈرەشچى ئايروپىلانلىرىنىڭ بىرى دەپ قارىلىدۇ.
بۇ كېلىشىم ئارقىلىق تۈركىيە، ھاۋا ئارمىيەسىنىڭ ئىقتىدارىنى كۆپ خىللاشتۇرۇش يولىدا يەنە بىر قەدەم تاشلاش بىلەن بىرگە، ناتودىكى مۇھىم ئىتتىپاقداشلىرى بىلەن بولغان دۆلەت مۇداپىئە ھەمكارلىقىنىمۇ كۈچەيتمەكتە.
ناتونىڭ ئىككىنچى چوڭ ئارمىيەسىگە ئىگە تۈركىيەنىڭ دۆلەت مۇداپىئە سالمىقى، يېقىنقى مەزگىللەردە نۇرغۇن ياۋروپا رەھبەرلىرى تەرىپىدىن ئالاھىدە تەكىتلىنىپ كەلمەكتە.
