غەززەدە ئۇرۇش توختىتىش كېلىشىمى ئىسرائىلىيە تەرىپىدىن ھەر كۈنى ئاياق ئاستى قىلىنىۋاتقان بىر مەزگىلدە ئېلىپ بېرىلغان ھاۋا ھۇجۇمى ۋە ئوق چىقىرىش نەتىجىسىدە ئۈچ پەلەستىنلىك ھاياتىدىن ئايرىلدى. كىچىك بالىلارنىمۇ ئۆز ئىچىگە ئالغان نۇرغۇن كىشى يارىلاندى.
شىفا دوختۇرخانىسىدىكى بىر سەھىيە مەنبەسى، سەيشەنبە كۈنى غەززە شەھىرىنىڭ غەربىدىكى نەسىر مەھەللىسىدە بىر ئۆينىڭ ئىسرائىلىيە ھاۋا ھۇجۇمى بىلەن نىشانغا ئېلىنىشىنىڭ ئارقىسىدىن ئىككى پەلەستىنلىكنىڭ جەسىتى بىلەن ئارىسىدا كىچىك بالىلارمۇ بولغان نۇرغۇن يارىدارنىڭ دوختۇرخانىغا ئېلىپ كېلىنگەنلىكىنى ئېيتتى.
ئانادولۇ ئاگېنتلىقى مۇخبىرىنىڭ بىلدۈرۈشىچە ھۇجۇم، ئەلباتۇل بىناسىدىكى بىر ئۆينى نىشان قىلغان. ئىككى پەلەستىنلىك ھاياتىدىن ئايرىلغان ۋە ئارىسىدا كىچىك بالىلارمۇ بولغان نۇرغۇن كىشى يارىلانغان.
ئەقسا شېھىتلىرى دوختۇرخانىسىدىن بىر سەھىيە مەنبەسى، ئەھمەد ئەبۇ مۇررنىڭ ئىسرائىلىيە قىسىملىرى تەرىپىدىن دەير ئەلبەلاھنىڭ شەرقىدە ئېتىپ تاشلىنىشىنىڭ ئارقىسىدىن جەسىتىنىڭ دوختۇرخانىغا ئېلىپ كېلىنگەنلىكىنى ئېيتتى.
غەززە سەھىيە مىنىستىرلىقىنىڭ مەلۇماتىغا قارىغاندا، ئىسرائىلىيەنىڭ ئۇرۇش توختىتىش كېلىشىمىگە خىلاپلىق قىلىشى نەتىجىسىدە 1 مىڭ 421 پەلەستىنلىك ھاياتىدىن ئايرىلغان، 4 مىڭ 983 كىشى يارىلانغان.
2023-يىلى ئۆكتەبىردىن بۇيان ئىسرائىلىيەنىڭ غەززەگە قاراتقان ئىرقىي قىرغىنچىلىق ئۇرۇشى 74 مىڭدىن ئارتۇق پەلەستىنلىكنىڭ ئۆلتۈرۈلىشىگە، 175 مىڭدىن ئارتۇق كىشىنىڭ يارىلىنىشىغا سەۋەب بولغان ھەمدە غەززەدىكى ئۇل ئەسلىھەلەرنىڭ تەخمىنەن 90 % ىنى ۋەيران قىلغان.
