تۈركىيە جۇمھۇرىيىتى دۆلەت مۇداپىئە مىنىستىرلىقى شىمالىي قىبرىس تۈرك جۇمھۇرىيىتىگە ئالتە دانە F-16 كۈرەشچى ئايروپىلانى ۋە زامانىۋى ھاۋا مۇداپىئە سىستېمىلىرىنىڭ ئورۇنلاشتۇرۇلغانلىقىنى دەلىللىدى. مەزكۇر قارار ئوتتۇرا شەرقتە داۋاملىشىۋاتقان ئۇرۇش ۋەزىيىتىدە، شىمالىي قىبرىس تۈرك جۇمھۇرىيىتىنىڭ خەۋپسىزلىكىنى يۇقىرى كۆتۈرۈشكە قارىتىلغان باسقۇچلۇق ئىستراتېگىيەلىك پىلاننىڭ مۇھىم بىر قىسمى ھېسابلىنىدۇ.
مىنىستىرلىق بۇ ھەربىي ئورۇنلاشتۇرۇشنىڭ «رايوندىكى يېقىنقى ئۆزگىرىشلەر دائىرىسىدە» ئېلىپ بېرىلغانلىقىنى بىلدۈردى. شۇنداقلا ۋەزىيەت تەرەققىياتىغا ئاساسەن ئېلىپ بېرىلىدىغان باھالاشلار نەتىجىسىدە، ئېھتىياج تۇغۇلغان تەقدىردە قوشۇمچە تەدبىرلەرنىڭ ئېلىنىدىغانلىقىنى ئۇقتۇردى. باياناتتا رايون خاراكتېرلىك جىددىيچىلىكلەر كۈچىيىۋاتقان مۇشۇنداق بىر مەزگىلدە، شىمالىي قىبرىس تۈركلىرىنىڭ بىخەتەرلىكىنى قوغداشنىڭ مۇھىملىقى ئالاھىدە تەكىتلەندى.
دۆلەت مۇداپىئە مىنىستىرلىقى باياناتىدا: «ئۆزگىرىشلەرگە ئاساسەن ئېلىپ بېرىلىدىغان باھالاشلار نەتىجىسىدە ئېھتىياج تۇغۇلسا، قوشۇمچە تەدبىرلەرنى ئېلىش داۋاملاشتۇرۇلىدۇ» دېگەنلەرنى قەيت قىلدى.
بۇ ھالقىلىق قارار ئىرانغا قارشى داۋاملىشىۋاتقان ئىسرائىلىيە-ئامېرىكا ئۇرۇشى ۋە شەرقىي ئاقدېڭىزىدا مۇقىمسىزلىقنىڭ ئېشىشىغا دائىر خەۋەرلەردىن كېيىن چىقىرىلدى. يېقىندا ئىران تەرىپىدىن قويۇپ بېرىلگەن بىر باشقۇرۇلىدىغان بومبىنىڭ تۈركىيە ھاۋا تەۋەلىكىگە كىرىشتىن ئىلگىرى توسۇپ قېلىنغانلىقى مەلۇم بولغان ئىدى. يەنە بىر تەرەپتىن، جەنۇبىي قىبرىس رۇم ھاكىمىيىتى كونترول قىلىۋاتقان زېمىنلاردا ئەنگلىيەگە تەۋە بىر ھەربىي بازا مەۋجۇت بولۇپ تۇرماقتا.
1983-يىلى قۇرۇلغاندىن كېيىن تۈركىيە تەرىپىدىن رەسمىي ئېتىراپ قىلىنغان شىمالىي قىبرىس تۈرك جۇمھۇرىيىتى، 1960-يىلىدىكى «كاپالەت شەرتنامىسى» بويىچە ئەنقەرەنىڭ كاپالەتچىلىك ئورنى دائىرىسىدە ئۇزۇندىن بۇيان تۈرك قىسىملىرىغا ساھىبخانلىق قىلىپ كەلمەكتە.
