ياۋروپا ئىتتىپاقى ئىسرائىلىيە دۆلەت مۇداپىئە مىنىستىرى يىسرائىل كاتز ۋە ئىچكى بىخەتەرلىك ئىشلىرى مىنىستىرى ئىتامار بېن گۋىرنىڭ غەززە خەلقىنى كۆچۈرۈش ھەققىدىكى باياناتلىرىنى كەسكىن رەت قىلدى. ياۋروپا ئىتتىپاقى كومىتېتىنىڭ باياناتچىسى خىرىستىيان ۋىگاند، ئانادولۇ ئاگېنتلىقى (AA) مۇخبىرىنىڭ سوئالىغا جاۋاب بېرىپ، غەززە رايونىدا نوپۇس ياكى زېمىن جەھەتتە ئېلىپ بېرىلىدىغان ھەرقانداق ئۆزگەرتىش ئۇرۇنۇشىغا قارشى ئىكەنلىكىنى بىلدۈردى.
ۋىگاند بارلىق تەرەپلەرنى جىددىيچىلىكنى ئەۋج ئالدۇرۇشنىڭ ئورنىغا، ئۇنى پەسەيتىشكە چاقىردى. ئۇ يەنە غەززەنىڭ ئىيوردان دەرياسىنىڭ غەربىي قىرغىقى بىلەن بىرلىكتە، كەلگۈسىدىكى پەلەستىن دۆلىتىنىڭ ئايرىلماس بىر قىسمى بولۇشى كېرەكلىكىنى تەكىتلىدى. ئىلگىرى بېن گۋىر 1 مىليون 860 مىڭ پەلەستىنلىكنى يەتتە يىل ئىچىدە مەجبۇرىي كۆچۈرۈش پىلانىنى ئوتتۇرىغا قويغان، كاتز بولسا بۇ پىلاننىڭ ئەمەلدىن قالمىغانلىقىنى ئەسكەرتكەن ئىدى. ياۋروپا ئىتتىپاقى بۇ خىل «ئېتنىك تازىلاش» نىيەتلىرىگە قەتئىي قارشى تۇرىدىغانلىقىنى جاكارلىدى.
