ئىران تاشقى ئىشلار مىنىستىرلىقى ۋە مۇزاكىرە ھەيئىتىنىڭ باياناتچىسى ئىسمائىل بەقايرى، ئامېرىكا بىلەن ئېلىپ بېرىلىۋاتقان مۇزاكىرىلەرنىڭ، ئامېرىكانىڭ ئىرانغا قاراتقان قىلمىشلىرى نەتىجىسىدە ئوتتۇرىغا چىققان پىكىر ئوخشاشماسلىقلىرى ئاساسىدا داۋاملىشىۋاتقانلىقىنى ئېيتتى.
بەقايرى ئۆزى قاتناشقان بىر تېلېۋىزىيە پروگراممىسىدا، ئامېرىكا قوشما ئىشتاتلىرى بىلەن ئېلىپ بېرىلىۋاتقان مۇزاكىرىلەرگە ئائىت مۇھىم باياناتلاردا بولدى.
ئامېرىكا بىلەن ئېلىپ بېرىلىۋاتقان مۇزاكىرە مۇساپىسىنىڭ داۋاملىشىۋاتقانلىقىنى ۋە تېخى كېلىشىمگە يېقىنلاشقان بىر نۇقتىغا كەلمىگەنلىكىنى بىلدۈرگەن بەقايرى، ئىران بىلەن ئامېرىكا ئوتتۇرىسىدا چوڭقۇر پىكىر ئوخشاشماسلىقلىرى بارلىقىغا ئىشارەت قىلىپ: «بىر قانچە قېتىملىق زىيارەت، بىر قانچە ھەپتە ياكى بىر قانچە ئاي ئىچىدە ئېلىپ بېرىلغان مۇزاكىرىلەر بىلەنلا جەزملەشتۈرۈلگەن بىر نەتىجىگە يېتىپ بارالايمىز دېگىلى بولمايدۇ» دېدى.
دىپلوماتىيەنىڭ ۋاقىت ئالىدىغانلىقىنى ۋە ئۇنى ئىلگىرى سۈرۈش ئۈچۈن ھەر بىر پۇرسەتتىن ئۈنۈملۈك پايدىلىنىش كېرەكلىكىنى ئەسكەرتكەن بەقايرى، مۇزاكىرىلەرنىڭ ھازىرقى ئاساسلىق مەركىزىي نۇقتىسىنىڭ ئۇرۇشنى ئاخىرلاشتۇرۇش ئىكەنلىكىنى، يادرو مەسىلىلىرىنىڭ بولسا بۇ باسقۇچتا كۈنتەرتىپكە كىرمىگەنلىكىنى ئەسلىتىپ ئۆتتى. لىۋاننى ئۆز ئىچىگە ئالغان ھالدا رايوندىكى بارلىق ئالدىنقى سەپلەردە ئۇرۇشنىڭ توختىتىلىشىنىڭ ئىنتايىن مۇھىملىقىنى تەكىتلىگەن بەقايرى، ھورمۇز بوغۇزى ۋە ئامېرىكا يولغا قويغان دېڭىز قامالى مەسىلىسىنىڭ يەنىلا مۇزاكىرە قىلىنىۋاتقانلىقىنى بىلدۈردى.
بەقايرى مۇزاكىرىلەردە قويۇقلاشتۇرۇلغان ئۇران مەسىلىسىگە كىرىشنىڭ تەرەپلەرنى بىر نەتىجىگە يەتكۈزمەيدىغانلىقىنى ئېيتىپ مۇنداق دېدى: «بۇنىڭ سەۋەبى ناھايىتى ئېنىق. بىز بۇ يولدىن ئىلگىرىمۇ ئۆتكەن ئىدۇق ۋە پىكىر ئوخشاشماسلىقلىرى شۇنچىلىك چوڭ ئىدىكى، ھېچ بىر كېلىشىمگە ھاسيىل قىلالمىدۇق. قارشى تەرەپ ئۆزىنىڭ مەنتىقسىز تەلەپلىرى تۈپەيلىدىن، ئاخىرىدا مۇزاكىرە ئۈستىلىنىڭ بۇزۇلۇشىغا سەۋەبچى بولدى ۋە ئىرانغا قارشى ھۇجۇملارنى ئېلىپ باردى.»
بەقايرى يەنە، ئامېرىكانىڭ ھەددىدىن زىيادە تەلەپلەردە بولۇۋاتقانلىقىنى ۋە بۇ تەلەپلەرنى ئوتتۇرىغا قويۇش ئۈچۈن ھەر بىر پۇرسەتتىن پايدىلىنىۋاتقانلىقىنىمۇ سۆزىگە ئىلاۋە قىلدى.
